અધિકારીએ મીડિયાકર્મીઓ સાથે ગાળાગાળી કરી, બીજી વખત નશાની હાલતમાં ધરપકડ
ખાસ-ખબર ન્યૂઝ ભાવનગર
- Advertisement -
ભાવનગરના સુભાષનગર વિસ્તારમાં એક જવાબદાર સરકારી અધિકારીની શરમજનક કરતૂત સામે આવી છે. મધ્યાહન ભોજન યોજનામાં નાયબ મામલતદાર તરીકે ફરજ બજાવતા મેહુલ ભટ્ટ ફરી એકવાર દારૂના નશામાં ધૂત હાલતમાં ઝડપાતા ચકચાર મચી ગઈ છે.
શહેરના સુભાષનગર વિસ્તારમાં આવેલા માનસ દર્શન બંગલોઝમાં રહેતા 53 વર્ષીય નાયબ મામલતદાર મેહુલ નિમેષભાઈ ભટ્ટને ઘોઘારોડ પોલીસે દારૂના નશામાં હોબાળો મચાવતા ઝડપી લીધા છે. પબ્લિક સર્વન્ટ હોવા છતાં કાયદાના લીરેલીરા ઉડાવતા આ અધિકારીની ધરપકડ કરવામાં આવી છે.
બે દિવસ પૂર્વે મેહુલ ભટ્ટ પોતાના ઘરે દારૂ પીધેલી હાલતમાં હોબાળો મચાવી રહ્યા હતા, જે અંગે ‘112’ નંબર પર જાણ કરવામાં આવી હતી. કંટ્રોલ રૂમની સૂચનાના આધારે ઘોઘારોડ પોલીસનો કાફલો તાત્કાલિક ઘટનાસ્થળે પહોંચ્યો હતો અને નશામાં ચૂર નાયબ મામલતદારની ધરપકડ કરી તેમને લોકઅપના હવાલે કર્યા હતા. જ્યારે સ્થાનિક મીડિયાના પ્રતિનિધિઓ આ ઘટનાનું કવરેજ કરવા પોલીસ સ્ટેશને પહોંચ્યા, ત્યારે નશાખોર અધિકારીએ પિત્તો ગુમાવ્યો હતો. તેમણે મીડિયાકર્મીઓ સાથે ગંદી ગાળાગાળી કરી હતી અને કેમેરામેન પાસેથી મોબાઈલ તેમજ રેકોર્ડિંગ કેમેરા છીનવી લેવાનો પ્રયાસ કરીને હોબાળો મચાવ્યો હતો.
આ અધિકારી આ પહેલા પણ નિલમબાગ પોલીસ સ્ટેશન વિસ્તારમાંથી નશાની હાલતમાં પકડાઈ ચૂક્યા છે. વારંવાર કાયદાનું ઉલ્લંઘન કરનારા નાયબ મામલતદાર સામે હવે ઘોઘારોડ પોલીસે પ્રોહિબિશન એક્ટ હેઠળ ગુનો નોંધી કાયદેસરની કાર્યવાહી હાથ ધરી છે. સરકારી હોદ્દા પર બેસીને આ પ્રકારે નશાખોરી અને ગેરવર્તન કરનારા અધિકારી સામે તંત્ર કેવા પગલાં લેશે તે જોવું રહ્યું.
