મોરબી કોર્ટે આરોપી વિજય સરડવાને કસૂરવાન ઠેરવ્યો; કુલ રૂ. 5.20 લાખનો દંડ અને ભોગ બનનારને વળતર ચૂકવવાનો આદેશ
ખાસ-ખબર ન્યૂઝ મોરબી
- Advertisement -
મોરબીમાં એક સંવેદનશીલ કેસમાં કોર્ટે મોરબી જિલ્લા શિક્ષક સંઘના પૂર્વ પ્રમુખને 10 વર્ષની સખ્ત કેદની સજા ફટકારી છે. આરોપી વિજય કેશવજીભાઈ સરડવા વિરુદ્ધ ભોગ બનનાર શિક્ષિકાએ સીટી એ ડિવિઝન પોલીસ મથકમાં ફરિયાદ નોંધાવી હતી.
મળતી માહિતી મુજબ, આરોપી વિજય સરડવાએ શિક્ષક સંઘના પ્રમુખ તરીકેનો હોદ્દો ધરાવતા હતા ત્યારે તા. 26-01-17 થી 28-02-18 દરમિયાન પરિણીત હોવા છતાં લગ્નના વાયદાઓ કરીને મિત્રતા કેળવી હતી. ત્યારબાદ રાજકોટ પોતાના ફ્લેટે લઈ જઈને અવારનવાર શરીર સંબંધ બાંધ્યો હતો. એટલું જ નહીં, આરોપીએ શિક્ષિકાનો બીભત્સ વિડીયો બનાવી તેના સગા સંબંધીઓને મોકલી સગાઈ અને લગ્ન જીવનમાં ભંગાણ પડાવવાની ધમકી આપી હતી. મોરબી કોર્ટમાં કેસ ચાલી જતા, સરકારી વકીલ એન. ડી. કારિયાની દલીલો અને પુરાવાઓને ધ્યાને લઈને કોર્ટે આરોપી વિજય સરડવાને કસૂરવાન ઠેરવ્યો હતો. કોર્ટે આરોપીને ઈંઙઈ કલમ 376 સહિતની કલમો હેઠળ 10 વર્ષની સખ્ત કેદ અને કુલ રૂ. 5.20 લાખનો દંડ ફટકાર્યો છે. આ ઉપરાંત, કોર્ટે ભોગ બનનાર શિક્ષિકાને રૂ. 5 લાખનું વળતર અને આરોપી જે દંડની રકમ ભરે તે રૂ. 5.20 લાખ પણ વળતર પેટે ચૂકવવાનો આદેશ આપ્યો છે.
