રોમાંચક મેચમાં ભારતનો ડંકો: આફ્રિકાને 17 રને હરાવી સિરિઝમાં 1-0ની લીડ

વિરાટ કોહલીની તોફાની સદી; કુલદીપ યાદવના 4 શિકાર સામે સાઉથ આફ્રિકાની ટક્કર વ્યર્થ

ખાસ-ખબર ન્યૂઝ નવી દિલ્હી

ભારતે સાઉથ આફ્રિકાને રોમાંચક પહેલી વન-ડેમાં 17 રનથી હરાવીને સિરીઝમાં 1-0ની લીડ મેળવી લીધી. રાંચીના ઉંજઈઅ સ્ટેડિયમમાં રવિવારે સાઉથ આફ્રિકાએ બોલિંગ પસંદ કરી હતી. ભારતે વિરાટ કોહલીની સદીના જોરે 349 રન બનાવ્યા. જવાબમાં મહેમાન ટીમે ટક્કર આપી, પરંતુ ટીમ 332 રન જ બનાવી શકી.
ભારત તરફથી કોહલી ઉપરાંત રોહિત શર્માએ 57 અને કેપ્ટન કેએલ રાહુલે 60 રન બનાવ્યા. બોલિંગમાં કુલદીપ યાદવે 4 વિકેટ ઝડપી. હર્ષિત રાણાએ 3 અને અર્શદીપ સિંહે 2 વિકેટ લીધી. સાઉથ આફ્રિકા તરફથી માર્કો યાન્સેન, નાન્દ્રે બર્ગર, કોર્બિન બોશ અને ઓટનિલ બાર્ટમેને 2-2 વિકેટ લીધી. મોટા ટાર્ગેટ સામે સાઉથ આફ્રિકાની શરૂઆત ખરાબ રહી. ટીમે 11 રન પર જ 3 વિકેટ ગુમાવી દીધી. મેથ્યુ બ્રીટ્ઝકીએ પછીથી ઇનિંગ્સ સંભાળી લીધી. તેને માર્કો યાન્સેનનો સાથ મળ્યો, પરંતુ બંને એક જ ઓવરમાં આઉટ થઈ ગયા. છેલ્લે કોર્બિન બોશે અડધી સદી ફટકારીને ટીમને જીતની નજીક પહોંચાડી, પરંતુ તેની ઇનિંગ્સ કામ ન આવી.

વિરાટ કોહલીએ સચિન તેંડુલકરને પાછળ છોડ્યો

વિરાટ કોહલી હવે એક ફોર્મેટમાં સૌથી વધુ સદી ફટકારનાર બેટર બની ગયો છે. તેણે વન-ડે ક્રિકેટમાં 52મી સદી પૂરી કરી, જે આ ફોર્મેટનો વર્લ્ડ રેકોર્ડ છે. તેના પછી ટેસ્ટ ક્રિકેટમાં 51 સદીઓ સાથે સચિન તેંડુલકર બીજા સ્થાને આવે છે. જ્યારે ઝ20 ઈન્ટરનેશનલમાં 5 સદીઓ સાથે રોહિત શર્મા સૌથી નાના ફોર્મેટમાં ટોચ પર છે.

રોહિતે તોડ્યો શાહિદ આફ્રિદીનો વર્લ્ડ રેકોર્ડ

20મી ઓવરમાં રોહિત શર્માએ માર્કો યાન્સેનના બોલ પર શાનદાર સિક્સર ફટકારી, અને આ જ શોટ સાથે તે વન-ડે ક્રિકેટમાં સૌથી વધુ સિક્સર ફટકારનાર બેટર બની ગયો. રોહિતે પાકિસ્તાનના શાહિદ આફ્રિદીના 351 સિક્સરના વર્લ્ડ રેકોર્ડને પાછળ છોડીને નવો કીર્તિમાન સ્થાપિત કર્યો.