જિલ્લા પંચાયત સહિતની સરકારી કચેરીઓમાં વંદે માતરમના મૂળ સ્વરૂપનું સમૂહગાન થયું

ગીર સોમનાથમાં વંદે માતરમ ગીતના 150 વર્ષની ઉજવણી

સ્વદેશીના શપથ ગ્રહણ કરી ઘરેલૂ ઉત્પાદનને પ્રોત્સાહિત કરવા માટે સંકલ્પબદ્ધ થતાં અધિકારીઓ-કર્મચારીઓ

ખાસ-ખબર ન્યૂઝ ગિર-સોમનાથ
ભારતના વંદે માતરમ ગીતના 150 વર્ષની ઉજવણીના ભાગરૂપે તા. 07મી નવેમ્બરના રોજ રાષ્ટ્રવ્યાપી ઉજવણીનું આયોજન કરવામાં આવ્યું છે. જેના ભાગરૂપે ગીર સોમનાથ જિલ્લામાં જિલ્લા પંચાયત પ્રમુખ મંજૂલાબહેન મૂછારની અધ્યક્ષતામાં વંદે માતરમ150ની ઉલ્લાસભેર ઉજવણી કરવામાં આવી હતી. ગીર સોમનાથ જિલ્લા પંચાયત ખાતે વિવિધ કચેરીઓના અધિકારીઓ-કર્મચારીઓની ઉપસ્થિતિમાં વંદે માતરમ્ ગીતના મૂળ સ્વરૂપનું સમૂહગાન કરવામાં આવ્યું હતું. આ સાથે જ ઉપસ્થિત સર્વેએ ’સ્વદેશી અપનાવો’ના શપથ ગ્રહણ કરી ઘરેલૂ ઉત્પાદનને પ્રોત્સાહિત કરવા સંકલ્પબદ્ધ થયાં હતાં. આ જ રીતે, કલેક્ટર કચેરી, જિલ્લાની તમામ નગરપાલિકાઓ, જિલ્લા પોલીસ અધિક્ષકશ્રીની કચેરી, તમામ પ્રાંત કચેરીઓ, તમામ મામલતદાર કચેરીઓ સહિત તમામ સરકારી કચેરીઓમાં પણ વંદે માતરમ્ના મૂળ સ્વરૂપનું સમૂહગાન કરવામાં આવ્યું હતું.

સોમનાથમાં રાષ્ટ્રગીત વંદે માતરમના 150 વર્ષની ઉજવણી

ભારતના સામાજિક, સાંસ્કૃતિક અને ભૌગોલિક વારસાનું પ્રત્યેક સ્પંદનમાં નિરૂપણ કરતા આપણા રાષ્ટ્રગીત “વંદે માતરમ” ના 150મી વર્ષગાંઠ પર શ્રી સોમનાથ મહાદેવના સાંનિધ્યમાં શ્રી સોમનાથ ટ્રસ્ટ પરિવાર પાઠશાળાના બાળકો, સ્થાનિકો અને ભક્તોએ ’અખંડ વંદે માતરમ્’ નું સમૂહગાન કર્યું હતું.