ગુનાખોરી, ટ્રાફિક સમસ્યાને અસરકારક રીતે પહોંચી વળવા માટે ગુજરાત પોલીસની નવી પહેલ
ખાસ-ખબર ન્યૂઝ ગાંધીનગર, તા.3
ગુનાખોરી અને ટ્રાફિકની સમસ્યાને વધુ અસરકારક રીતે પહોંચી વળવા માટે ગુજરાત પોલીસે એક નવી પહેલ કરી છે. આજે, ગૃહ રાજ્ય મંત્રી શ્રી હર્ષ સંઘવીએ ગાંધીનગર સચિવાલય ખાતેથી 50 ક્વિક રિસ્પોન્સ ટીમ (QRT) વિહિકલ-બાઈકને લીલી ઝંડી આપીને તેનું લોન્ચિંગ કર્યું હતું. આ અત્યાધુનિક બાઈક રાજ્યના વિવિધ જિલ્લાઓમાં ફાળવવામાં આવશે. આ પહેલથી પોલીસની ગતિશીલતા અને કાર્યક્ષમતામાં વધારો થશે, જે નાગરિકોની સુરક્ષા વ્યવસ્થાને પણ વધુ સુદૃઢ બનાવશે. આ કાર્યક્રમમાં ગૃહ વિભાગના અધિક મુખ્ય સચિવ એમ.કે. દાસ, રાજ્યના પોલીસ વડા વિકાસ સહાય સહિત અન્ય ઉચ્ચ અધિકારીઓ અને હોન્ડા કંપનીના પ્રતિનિધિઓ પણ ઉપસ્થિત રહ્યા હતા.
- Advertisement -
બાઈકના ખાસ ફીચર્સ
આ બાઈકનો મુખ્ય હેતુ એ છે કે પોલીસ વાન જ્યાં પહોંચી ન શકે તેવા સંવેદનશીલ સ્થળો પર તાત્કાલિક પહોંચીને ગુનાખોરી અને ટ્રાફિક જેવી સમસ્યાઓ પર ત્વરિત કાર્યવાહી કરી શકાય. હોન્ડા કંપનીના સહયોગથી તૈયાર કરાયેલા આ 350 સીસીના બાઈકમાં કેટલાક ખાસ ફીચર્સ ઉમેરવામાં આવ્યા છે.
ડ્યુઅલ ટોન સાયરન
પબ્લિક એડ્રેસ સિસ્ટમ
360 ડિગ્રી વિઝિબિલિટી માટે રીઅર ડોમ્સ
ફ્રન્ટ પોલિકાર્બોનેટ વિન્ડશીલ્ડ
સી હોક લાઈટ્સ
સાઈડ અને ટોપ બોક્સ
બાઈકમાં પાછળના ભાગમાં પોલીકાર્બોનેટ લેન્સવાળી લાઈટ પણ છે.
