ખાસ-ખબર ન્યૂઝ મોરબી
મોરબી જિલ્લા વહીવટી તંત્ર દ્વારા જિલ્લા કક્ષાએ 21 જૂન – આંતરરાષ્ટ્રીય યોગ દિવસની ઉજવણી સવારે 06:00 થી 08:00 દરમિયાન જિલ્લા પોલીસ પરેડ ગ્રાઉન્ડ ખાતે કરવામાં આવનાર છે.
સ્વસ્થ અને તંદુરસ્ત જીવન માટે યોગ અને સામાન્ય કસરત એ ખૂબ જ જરૂરી છે. આજના સમયમાં બેઠાડું જીવન અને વધારે પડતું તણાવ અનેક રોગનું કારણ બની રહ્યું છે. ત્યારે આ તમામ સમસ્યાઓના નિવારણ તરીકે લોકોને યોગનું મહત્વ સમજાવવા અને યોગને દૈનિક જીવનનો અભિન્ન અંગ બનાવવાના હેતુથી સમગ્ર દેશ દુનિયામાં આ વર્ષે ’યોગા ફોર વન અર્થ, વન હેલ્થ’ ની થીમ સાથે 21 જૂનના રોજ 11 માં આંતરરાષ્ટ્રીય યોગ દિવસની ઉજવણી કરવામાં આવનાર છે.
ગુજરાત રાજ્યમાં પણ રાજ્ય કક્ષાએ અને તેની સાથે તમામ જિલ્લાઓમાં પણ વિવિધ સ્થળોએ આંતરરાષ્ટ્રીય યોગ દિવસની ઉજવણી કરવામાં આવનાર છે. ત્યારે મોરબી જિલ્લા કક્ષાના કાર્યક્રમમાં બહોળી સંખ્યામાં સહભાગી બની આ કાર્યક્રમને સફળ બનાવવા સર્વે જિલ્લાવાસીઓને કલેક્ટરશ્રી કે.બી. ઝવેરી દ્વારા અનુરોધ કરવામાં આવ્યો છે.
- Advertisement -
મોરબી શહેર કક્ષાએ આંતરરાષ્ટ્રીય યોગ દિવસની ઉજવણી કરાશે
મોરબી મહાનગરપાલિકા દ્વારા મોરબી શહેર કક્ષાએ 21 જૂન – આંતરરાષ્ટ્રીય યોગ દિવસની ઉજવણી સવારે 06:00 થી 08:00 દરમિયાન મણીમંદિર ખાતે કરવામાં આવનાર છે. યોગ એ આપણી સંસ્કૃતિ છે અને આપણો વારસો છે. વિશ્વએ આપણી આ સંસ્કૃતિને સ્વીકારી છે, જેના ભાગરૂપે દર વર્ષે સમગ્ર વિશ્વમાં 21 જૂનના રોજ આંતરરાષ્ટ્રીય યોગ દિવસની ઉજવણી કરવામાં આવે છે. મોરબી શહેર કક્ષાએ આ આપણા અમુલ્ય વારસાને હેરિટેજ સાથે જોડી આંતરરાષ્ટ્રીય યોગ દિવસની ઉજવણી કરવામાં આવનાર છે. મોરબીની ઓળખ સમાન મણીમંદિર કે, જે સંસ્કૃતિ અને સ્થાપત્યની દ્રષ્ટિએ વિશેષ સ્થાન ધરાવે છે, ત્યારે મોરબીની વિરાસત સમાન સ્થળ એવા મણિમંદિર ખાતે યોગને હેરિટેજ સાથે સાંકળી આંતરરાષ્ટ્રીય યોગ દિવસની ઉજવણી કરવામાં આવનાર છે. ત્યારે મોરબી શહેર કક્ષાના કાર્યક્રમમાં સર્વે શહેરીજનોને બહોળી સંખ્યામાં ઉપસ્થિત રહેવા મોરબી મહાનગરપાલિકાના કમિશનરશ્રી સ્વપ્નિલ ખરે દ્વારા અનુરોધ કરવામાં આવ્યો છે.
