સ્ટુડન્ટ વિઝાના ઈચ્છુકો માટે

અમેરિકાના 47મા પ્રેસિડન્ટ ડોનાલ્ડ ટ્રમ્પે અનેક પરદેશી વિદ્યાર્થીઓના સ્ટુડન્ટ વિઝા કંઈ પણ કારણ આપ્યા સિવાય રદ કર્યા છે. એમને સ્વદેશ પાછા ચાલી જવાની આજ્ઞા કરી છે. અમેરિકાની કોર્ટે ટ્રમ્પના આ પગલાને મનાઈહુકમ દ્વારા સ્થગિત કર્યા છે. પરદેશી વિદ્યાર્થીઓ ખૂબ જ અવઢવમાં છે. એમની રાત્રિની નીંદર ઊડી ગઈ છે. અમેરિકામાં દર વર્ષે લગભગ દસ લાખથી વધુ પરદેશી વિદ્યાર્થીઓ ત્યાંની જુદી જુદી યુિનિર્સિટીઓમાં વધુ અભ્યાસ માટે જાય છે. ગયા વર્ષે ભારતમાંથી જ ત્રણ લાખથી વધુ વિદ્યાર્થીઓએ ‘એફ-1’ સંજ્ઞા ધરાવતા અમેરિકાના સ્ટુડન્ટ વિઝા મેળવ્યા હતા. આ વર્ષે પણ એટલી જ, કદાચ એથી પણ વધુ સંખ્યામાં ભારતીય વિદ્યાર્થીઓ અમેરિકામાં ભણવા જવાની ઈચ્છા ધરાવે છે. અમેરિકન યુનિવર્સિટીઓએ એમને પોતાને ત્યાં પ્રવેશ પણ આપ્યો છે અને એ દર્શાવતાં ફોર્મ આઈ-20 પણ મોકલાવ્યાં છે. હવે આ વિદ્યાર્થીઓએ સ્ટુડન્ટ વિઝાના ઈન્ટરવ્યૂની તારીખ મેળવીને, ઈન્ટરવ્યૂ આપીને પોતાની એક વિદ્યાર્થી તરીકેની લાયકાત પુરવાર કરીને ‘એફ-1’ સંજ્ઞા ધરાવતા નોન-ઈમિગ્રન્ટ કેટેગરીના સ્ટુડન્ટ વિઝા મેળવવાના રહેશે. એમના ઈન્ટરવ્યૂમાં એમણે નીચેની બાબતોનો ખ્યાલ રાખવો જોઈએ. એ જાણી લેવું જોઈએ કે કોન્સ્યુલર ઑફિસરો સ્ટુડન્ટ વિઝાના ઈચ્છુકો પાસેથી કેવા ઉત્તરોની અપેક્ષા રાખે છે. અમેરિકાની યુનિવર્સિટીઓ પરદેશી વિદ્યાર્થીઓને આવકારે છે. એનું એક કારણ એ છે કે પરદેશી વિદ્યાર્થીઓ એમને અમેરિકન સિટિઝન યા ગ્રીનકાર્ડધારક વિદ્યાર્થીઓ કરતાં ત્રણ ગણી ફી આપે છે. બીજું કારણ એ છે કે મોટા ભાગના અમેરિકન વિદ્યાર્થીઓ સ્કૂલનું ભણતર પૂરું થયા બાદ યુનિવર્સિટીમાં જવાનું ટાળે છે. જેઓ યુનિવર્સિટીમાં જાય છે તેઓ મોટા ભાગે લેન્ગ્વેજ, આર્ટ્સ, મ્યુઝિક, પેન્ટિંગ, રાઈટિંગ આવા આવા વિષયો પસંદ કરે છે. સાયન્સ, ટેક્નોલોજી, એન્જિનિયરિંગ, મેથેમેટિક્સ, આર્ટિફિશિયલ ઈન્ટેલિજન્સ, એકાઉન્ટસી, આવા વિષયો મોટા ભાગે અમેરિકાના વિદ્યાર્થીઓ પસંદ નથી કરતા. આથી અમેરિકાની યુનિવર્સિટીઓને પરદેશી વિદ્યાર્થીઓની ખૂબ જ જરૂર છે. આટલું જ નહીં, પણ અમેરિકાની કંપનીઓને પણ આ બધા વિષયમાં ભણેલા યુવાન વિદ્યાર્થીઓની જરૂર છે. સ્ટુડન્ટ વિઝાના અરજદારોએ એ વાત જાણી લેવી જોઈએ કે કોન્સ્યુલર ઓફિસરો એમના દુશ્મન નથી. તેઓ અમેરિકાથી ભારતમાં વિઝા આપવા માટે જ ખાસ આવ્યા છે. પર્સનલ ઈન્ટરવ્યૂ 9/11ના આતંકવાદી હુમલાઓ બાદ લેવાનું શરૂ કરવામાં આવ્યું છે. ઓફિસરો એટલું જ જાણવા માગે છે કે પરદેશીઓ વિદ્યાર્થી હોવાનું બહાનું કાઢીને અમેરિકામાં અમેરિકાને નુકસાન પહોંચાડે એવું કાર્ય કરવા તો નથી જતા. તેઓ સામાન્ય રીતે નીચેના અથવા એના જેવા સવાલો સ્ટુડન્ટ વિઝાના અરજદારોને પૂછતા હોય છે. અમેરિકા શા માટે જવા ઈચ્છો છો? અમેરિકામાં શિક્ષણ લેવાનું કેમ વિચારો છો? કેનેડા, ઈંગ્લેન્ડ, ઑસ્ટ્રેલિયા આ દેશોમાં જવાનું કેમ વિચારતા નથી? તમારા પોતાના દેશમાં જ શિક્ષણ કેમ લેતા નથી? જે વિષયમાં શિક્ષણ લેવા વિચારો છો, શું એ વિષયમાં તમારા દેશમાં શિક્ષણ પ્રાપ્ત થતું નથી? ‘આઈલ્ટસ’ યા ‘ટોફેલ’ની પરીક્ષા આપી છે? એમાં કેટલા ગુણાંક આવ્યા છે? કેટલી યુનિવર્સિટીમાં અરજી કરી છે? કેટલીયે પ્રવેશ આપ્યો છે? કેટલીયે નકાર્યા છે? અમેરિકામાં રહેવાનો-ખાવાનો કેટલો ખર્ચો આવશે એ કોણ આપશે? એ વ્યક્તિ શું કરે છે? એમની આવક શું છે? બેન્ક લોન લીધી છે? એ ભરપાઈ કેવી રીતે કરશો? અમેરિકામાં ક્યાં રહેશો? શનિ-રવિની રજાઓ, વેકેશનમાં શું કરશો? અમેરિકામાં કામ કરવાનો ઈરાદો છે? ભણી રહ્યા પછી શું કરશો? એચ-1બી વિઝા ઉપર કામ કરવાનું વિચારો છો? સિટિઝન યા ગ્રીનકાર્ડધારક યુવતી-યુવક જોડે લગ્ન કરવાની ઈચ્છા ધરાવો છો? અમેરિકામાં તમારું કોઈ અંગત સગું રહે છે? જો હા, તો તેઓ શું કરે છે? તમારા દેશમાં કોઈ રાજકીય ચળવળ યા ધાર્મિક પોપેગેન્ડામાં ભાગ લીધો છે? અમેરિકા માટે તમારો શું મત છે? અમારા હાલના પ્રેસિડન્ટ માટે તમારો શું મત છે? આ પહેલાં તમે અમેરિકાના સ્ટુડન્ટ વિઝા કે બીજા કાઈ પણ પ્રકારના વિઝાની અરજી કરી છે? જો કરી હોય તો એનું શું પરિણામ આવ્યું હતું? જો વિઝા મળ્યા હોય તો તમે અમેરિકામાં પ્રવેશ્યા છો? ક્યાં ક્યાં ગયા છો? શું કર્યું છે? કોને કોને મળ્યા છો? વિશ્ર્વના અન્ય કોઈ દેશમાં ગયા છો? કેનેડાના પીઆરની અરજી કરી છે? તમારા લાભ માટે કોઈએ ગ્રીનકાર્ડનું પિટિશન દાખલ કર્યું છે? સ્વદેશમાં તમારા સંબંધો, નાણાકીય તેમ જ કૌટુંબિક, કેવા છે? મને એક એવું કારણ આપો, જેથી મને ખાતરી થાય કે તમે તમારો અભ્યાસ પૂરો થતાં તમારા દેશમાં પાછા જશો? વિઝા મળેથી અમેરિકામાં ભણવા જાવ તો એ વાતનો ખાસ ખ્યાલ રાખજો કે તમે ત્યાં ભણવા ગયા છો. ગેરકાયદેસર કામ કરવાનો મુદ્દલે વિચાર ન કરતા. ટ્યૂશન અને અન્ય ખર્ચાની રકમ હવાલા મારફતે મેળવવાની ગંભીર ભૂલ નહીં કરતા. યુનિવર્સિટી કેમ્પસ ઉપર કે પછી અમેરિકામાં કશે પણ કોઈ પણ પ્રકારના કોઈ જાતિ માટે, કોઈ દેશ માટે, અમેરિકાના પ્રેસિડન્ટ માટે, કોઈ કોંગ્રેસમેન યા સેનેટર માટે દેખાડો થતાં હોય તો એમાં ભાગ લેવાની ભૂલ ન કરતા, મોબાઈલ અને સોશિયલ મિડિયા ઉપર તમારા રાજકીય તેમ જ ધાર્મિક વિચારોની આપ-લે કરવાનું ટાળજો. આવા મેસેસીઝ ફોરવર્ડ પણ કરતા નહીં. શોપલિફ્ટિંગ એ ગંભીર ગુનો છે એ કરતા નહીં. ડ્રગ્સનું સેવન નહીં કરતા. દારૂ પીઈને ગાડી નહીં ચલાવતા. સ્પીડ લિમિટથી વધારે ફાસ્ટ ગાડી નહીં દોડાવતા. ટ્રાફિકના નિયમોનો ભંગ નહીં કરતા. કોઈની જોડે જીભાજોડી કરવાનું, મારામારી, હાથાપાઈ, ગાળો બોલવાનું કે તોફાન કરવાનું ટાળજો. એક વાતનો હરહંમેશ ખ્યાલ રાખજો કે તમે અમેરિકામાં ભણવા માટે ગયા છો. તમારું લક્ષ ફક્ત ને ફક્ત ભણવા પ્રત્યે જ હોવું જોઈએ. જો, આટલું કરશો તો ડોનાલ્ડ ટ્રમ્પ તમારા સ્ટુડન્ટ વિઝા રદ નહીં કરે.