શ્રીલંકામાં યોજાયેલી ‘જાફા’ ક્રિકેટ ટુર્નામેન્ટમાં ગુજરાત (એરિયા-11)ની ટીમ વિજેતા

ખાસ-ખબર ન્યૂઝ રાજકોટ, તા.3
63 વર્ષના ઈતિહાસમાં પ્રથમવાર રાઉન્ડ ટેબલ ઈન્ડિયા દ્વારા વાર્ષિક ક્રિકેટ ટુર્નામેન્ટ-જાફાનું આંતરરાષ્ટ્રીય સ્તરે આયોજન કરવામાં આવ્યું હતું. ટુર્નામેન્ટમાં 18 ટીમોએ ભાગ લીધો હતો. જેમાં ગુજરાત (એરિયા-11)ની ટીમ ચેમ્પિયન બની હતી. રોમાંચક સેમિફાઈનલમાં જીત બાદ ટીમ (એરિયા-9) સામે ફાઈનલમાં ટકરાઈ હતી. એરિયા-9 અને એરિયા-11 ગયા વર્ષે સંયુક્ત વિજેતા રહ્યા હતા. આ વખતે ફાઈનલમાં ગુજરાતની (એરિયા-11) ટીમે પ્રથમ બેટીંગ કરતાં 15 ઓવરમાં 152-5નો સ્કોર કર્યો હતો. જેમાં અંકિતે 25 બોલમાં અણનમ 50 રન કર્યા હતા. જેની સામે હરિફ ટીમ એરિયા-9ની ટીમ 13.5 ઓવરમાં 133 રને ઓલઆઉટ થઈ જતાં ગુજરાતની ટીમનો 19 રને વિજય થયો હતો. કશ્યપ રાવલ પ્લેયર ઓફ ધ ટુર્નામેન્ટ રહ્યો હતો. વિક્રમ લાલવાનીના નેતૃત્વ હેઠળ એરિયા-11 આંતરરાષ્ટ્રીય સ્તરે ટ્રોફી જીતનાર રાજ્યની એકમાત્ર ટીમ છે અને વિક્રમ લાલવાનીના નેતૃત્વમાં સતત બીજી વાર આ ટ્રોફી મેળવી છે. છેલ્લા 14 વર્ષમાં એરિયા-11ની ટીમે ત્રીજી ટ્રોફી જીતી છે. એરિયા ચેરમેન ટેબલ સ્વરાજ લહોતીએ જણાવ્યું ટીમમાં 35 સભ્યોએ ભાગ લીધો હતો જેમાં રાજકોટ, જામનગર, અમદાવાદ, વડોદરા સહિતના શહેરોના ખેલાડીઓ પણ સામેલ હતા.