મદુરાઈથી સિંગાપોર જઈ રહેલી એર ઇન્ડિયા એક્સપ્રેસ ફ્લાઈટ નંબર IX684 પર બોમ્બ હોવાની ધમકી મળ્યા બાદ સિંગાપોરના બે ફાઈટર પ્લેને તેને એસ્કોર્ટ કરીને ગીચ વસ્તીથી દૂર ચાંગી એરપોર્ટ પર લેન્ડ કરાવી હતી.
મંગળવારે મદુરાઈથી સિંગાપોર જઈ રહેલા એર ઇન્ડિયા એક્સપ્રેસના વિમાનને અચાનક જ બે ફાઈટર પ્લેને ઘેરી લીધું હતું. જેના કારણે મુસાફરોમાં ગભરાટ ફેલાઈ ગયો હતો. મંગળવારે સોશિયલ મીડિયા પ્લેટફોર્મ ‘X’ પર એક પોસ્ટ દ્વારા એર ઇન્ડિયાના સાત વિમાનોમાં બોમ્બની ધમકીનો મેસેજ મળ્યો હતો. આ લિસ્ટમાં મદુરાઈથી સિંગાપોર જતી એર ઇન્ડિયાની ફ્લાઈટ પણ સામેલ હતી. બોમ્બ હોવાની ધમકી મળ્યા બાદ તરત જ સિંગાપોર એરફોર્સે એક્શન લીધું અને એર ઇન્ડિયાના વિમાનની પાછળ બે ફાઈટર પ્લેન લગાવી દીધા. સુરક્ષા એજન્સીઓએ પણ તાત્કાલિક વિવિધ એરપોર્ટ ખાસ આતંકવાદ વિરોધી કવાયત હાથ ધરી હતી.
- Advertisement -
જયારે સાત વિમાનમાં બોમ્બ હોવાની ધમી મળી, ત્યારે એર ઇન્ડિયા એક્સપ્રેસ ફ્લાઈટ (ફ્લાઈટ નંબર IX684) મદુરાઈથી સિંગાપોર જઈ રહી હતી. ધમકી મળ્યા બાદ સિંગાપોર એરફોર્સે આ પ્લેનની સુરક્ષા માટે તેના બે F-15SG ફાઈટર પ્લેન મોકલ્યા હતા. સિંગાપોરના ફાઈટર પ્લેન એર ઇન્ડિયાની ફ્લાઈટને એસ્કોર્ટ કરીને ગીચ વસ્તીવાળા વિસ્તારમાંથી દૂર લઈ ગઈ. આ પછી એર ઇન્ડિયા એક્સપ્રેસના વિમાનનું ચાંગી એરપોર્ટ પર સુરક્ષિત લેન્ડિંગ કરવામાં આવ્યું. લેન્ડિંગ બાદ વિમાનનું ચેકિંગ કરવામાં આવ્યું, પરંતુ બોમ્બ હોવાની ધમકી અફવા હોવાનું સામે આવ્યું હતું.
આ ઘટના વિશે માહિતી આપતા સિંગાપોરના રક્ષા મંત્રી એનજી એંગ હેને ટ્વિટર પર પોસ્ટ કર્યું, ‘એર ઇન્ડિયા એક્સપ્રેસને ઈમેલ મળ્યો કે સિંગાપોર જતી ફ્લાઈટ AXB684માં બોમ્બ છે. આ પછી, અમારા બે ફાઈટર જેટ્સ RSAF F-15SG વિમાનને વસ્તીવાળા વિસ્તારોથી દૂર લઈ ગયા અને તેને સિંગાપોર ચાંગી એરપોર્ટ પર સુરક્ષિત રીતે લેન્ડ કરાવ્યું. આજે રાત્રે લગભગ 10:04 વાગ્યે પ્લેન સુરક્ષિત રીતે લેન્ડ થયું હતું. આ સમયગાળા દરમિયાન, ગ્રાઉન્ડ બેઝ્ડ એર ડિફેન્સ (GBAD) સિસ્ટમ અને એક્સપ્લોઝિવ ઓર્ડનન્સ ડિસ્પોઝલ (EOD) ટીમો પણ સક્રિય કરવામાં આવી હતી. પ્લેન લેન્ડ થયા બાદ તેને એરપોર્ટ પોલીસને સોંપવામાં આવ્યું હતું અને તપાસ કરવામાં આવી હતી.
- Advertisement -
સિંગાપોરના ચાંગી એરપોર્ટ પર વિમાનનું સિક્યોરિટી ચેકિંગ કર્યા પછી પોલીસે કહ્યું કે ભારતથી સિંગાપોર આવેલા એર ઇન્ડિયા એક્સપ્રેસના વિમાનમાં કોઈ ખતરનાક વસ્તુ મળી નથી. પોલીસે જણાવ્યું કે તેમને રાત્રે 8.25 વાગ્યે બોમ્બની ધમકી વિશે માહિતી મળી અને પ્લેન લેન્ડ થયા બાદ સંપૂર્ણ તપાસ કરી હતી. પોલીસે કહ્યું કે જે લોકો જાણીજોઈને લોકોમાં ભય ફેલાવે છે તેમની સામે કાર્યવાહી કરવામાં આવશે.
2 દિવસમાં 10 વિમાનોમાં બોમ્બની મળી ધમકી
એક દિવસ પહેલા, સોશિયલ મીડિયા પોસ્ટ દ્વારા મુંબઈથી ઉપડતી ત્રણ આંતરરાષ્ટ્રીય ફ્લાઈટ્સ પર બોમ્બ હોવાની ધમકીઓ આપવામાં આવી હતી, જેના કારણે સેંકડો મુસાફરો અને ક્રૂ મેમ્બર્સને મુશ્કેલી પડી હતી. જોકે, બાદમાં આ ધમકી અફવા નીકળી હતી. આ પછી મંગળવારે 7 વિમાનોમાં બોમ્બ હોવાની ધમકીઓ મળી હતી. મળતી માહિતી અનુસાર, ‘X’ એકાઉન્ટથી એવિએશન કંપનીઓ અને પોલીસ એકાઉન્ટને ટેગ કરીને સાત વિમાનોમાં બોમ્બ મૂક્યા હોવાની ધમકીઓ પોસ્ટ કરવામાં આવી હતી.
સોમવારે, મુંબઈથી ઉપડતી ત્રણ ઇન્ટરનેશનલ ફ્લાઈટ્સના સંબંધમાં ચાર અલગ-અલગ ‘X’ એકાઉન્ટ પર સમાન ધમકીભરી પોસ્ટ કરવામાં આવી હતી. અધિકારીઓના જણાવ્યા અનુસાર, બ્યુરો ઓફ સિવિલ એવિએશન સિક્યોરિટી (BCAS) એ ભારતીય સાયબર સુરક્ષા એજન્સીઓ અને પોલીસ પાસેથી આ ધમકીઓ પાછળના વ્યક્તિ અથવા જૂથને શોધી કાઢવા માટે મદદ માંગી છે. BCAS એ આ ઘટના અંગે સાયબર સુરક્ષા એજન્સીઓને પત્ર લખ્યો હતો, જેના પછી X એ એકાઉન્ટને સસ્પેન્ડ કરી દીધું છે.
