રાજકોટ એ.વી.પી.ટી. ખાતે કાર્યરત સ્ટુડન્ટ સ્ટાર્ટઅપ ઇનોવેશન એન્ડ ડીઝાઇન રીજીયોનલ સેન્ટરની અનેરી સિધ્ધિ

 વિદ્યાર્થીને માઇન્ડ ટુ માર્કેટ કન્સેપ્ટને સાકાર કરવા તમામ પ્રકારની અપાતી મદદ

 ૩ વર્ષમાં ૨૫ વિદ્યાર્થીને રૂા.૧૬ લાખથી વધુની કરાયેલી નાણાંકીય સહાય

 ૮ જેટલા વિદ્યાર્થીઓને સંરક્ષણ ક્ષેત્રે મળેલી રોજગારી   

 માનવીનું મન ખુબ જ ચંચળ છે, તેમાં અનેક અવનવા વિચારો ઉદભવતા હોય છે. જેમાંથી અમુક વિચારોને વાસ્તવિકતાની પાંખો મળે તો તે વિચારો સમગ્ર વિશ્વને નવો રાહ ચીંધે છે. આવા વિચારો માનવજાત માટે જ્ઞાાનની નવી દિશાઓ ખોલી આપે છે. વર્તમાન સમયમાં ગુજરાત સરકારની સોલાર રૂફટોપ યોજના કાર્યાન્વિન્ત બન્યા બાદ ઘરે ઘરે સોલાર પેનલ જોવા મળે છે. જેની સફાઈ કરવી અધરી લાગતી હોય છે. તેના માટે એ.વી.પી.ટી.આઈ-રાજકોટના વિદ્યાર્થીએ સોલાર પેનલ સાફ કરવાની ક્લીંનિંગ સિસ્ટમ વિકસાવી છે. આવા અનેક પ્રોજેક્ટ રાજ્ય સરકાર માન્ય – એ.વી.પી.ટી.આઈ કોલેજ રાજકોટ ખાતે આકાર લઈ રહ્યા છે.

એ.વી.પી.ટી.આઈ કોલેજના પ્રિન્સિપાલ પંડ્યા જણાવે છે કે, સ્ટુડન્ટ સ્ટાર્ટઅપ એન્ડ ઈનોવેશન પોલીસી તથા ડિઝાઈન ઈનોવેશન સેન્ટરના રીજીયોનલ સેન્ટરનો શુભારંભ ગુજરાતમાં ૨૦૧૮ થી શરૂ થયો છે. છેલ્લા સાડા ત્રણ વર્ષ દરમ્યાન ૨૫ જેટલા વિદ્યાર્થીઓને અત્યાર સુધીમાં રૂ. ૧૬.૨૪ લાખની નાણાકીય સહાય કરવામાં આવી છે. જે પૈકી રાજ્ય સરકારની સ્ટાર્ટઅપ પોલીસી અંતર્ગત ૧૪ જેટલા વિદ્યાર્થીઓના પ્રોજેક્ટને રૂ. ૧.૨૪ લાખની નાણાકીય સહાય કરવામાં આવી છે.  જ્યારે ગુજરાત ટેક્નોલોજિકલ યુનિવર્સીટીના ડિઝાઇન ઇનોવેશન સેન્ટર(DIC) અંતર્ગત ૧૧ જેટલા વિદ્યાર્થીઓના પ્રોજેક્ટ અંતર્ગત ૧૫ લાખથી વધું રકમની મદદ કરવામાં આવી છે. આ ડિઝાઈન ઈનોવેશન સેન્ટરના રીજીયોનલ સેન્ટર અંતર્ગત વિદ્યાર્થીને માઈન્ડ ટુ માર્કેટના કન્સેપ્ટને સાકાર કરવા તમામ પ્રકારની હેલ્પ કરવામાં આવે છે.

અત્રે ઉલ્લેખનીય છે કે, સ્ટુડન્ટ સ્ટાર્ટઅપ એન્ડ ઈનોવેશન પોલીસી અંતર્ગત રાજ્ય સરકાર તમામ યુનિવર્સીટીના માધ્યમથી વિદ્યાર્થીઓમાં રહેલા સંશોધનકારો માટે ૧૦૦ કરોડની ગ્રાન્ટની ફાળવણી સાથે કોઈ પણ પ્રોજેક્ટની કલ્પના, તેના પ્રોટોટાઇપ બનાવવા, ઉત્પાદન કરવા, પરીક્ષણના વિવિધ તબક્કામાંથી પસાર થવા ઉપરાંત કોઇ સમસ્યાના નવીન ઉકેલો શોધવા, નવીન ઉકેલોની ફરીથી ડિઝાઇન કરવા માટે પ્રાથમિક તબક્કાની તમામ સુવિધાઓ પુરી પાડે છે. જેના થકી યુવાન વિદ્યાર્થીઓની સર્જનાત્મકતાનો દેશના નિર્માણમાં સકારાત્મક ઉપયોગ કરી શકાય છે. ગુજરાત નોલેજ સોસાયટી આ યોજનાના અમલીકરણ માટેની નોડલ એજન્સી છે અને જી.ટી.યુ. અમલીકરણની ભુમીકા ભજવે છે. આ માટે ૧૨૫ સ્ટુડન્ટ ઇનોવેટર્સ/સ્ટાર્ટ-અપ્સ માટે ઈન્ટેલીજન્ટ પ્રોપર્ટી રાઈટ્સ જેવા કે, કોપીરાઈટ્સ, પેટન્ટ, ટ્રેડમાર્ક ફાઇલ કરવા માટે ૨૫,૦૦૦ સુધીની રકમ આપવામાં આવે છે. પ્રૃફ ઓફ કન્સેપ્ટના તબક્કે ૨૦૦ સ્ટુડન્ટ ઇનોવેટર્સ/સ્ટાર્ટ-અપ્સ માટે પ્રોટોટાઇપિંગ સપોર્ટ માટે રૂ. ૨ લાખની રકમ આપવામાં આવે છે.

આ અંગે ડિઝાઇન ઇનોવેશન સેન્ટરના કો-ઓર્ડીનેટર આર.ડી.રાઘાણી જણાવે છે કે, ડિગ્રી-ડિપ્લોમાના  વિદ્યાર્થીઓ અભ્યાસ પૂર્ણ થયા બાદ બિઝનેસ કરી શકે તે માટે સૌરાષ્ટ્ર – કચ્છ ખાતેનું ગુજરાત ટેક્નોલોજિકલ યુનિવર્સીટી(GTU)નું રીજીયોનલ સેન્ટર – ડિઝાઇન ઇનોવેશન સેન્ટર(DIC) એ.વી.પી.ટી.આઈ રાજકોટ ખાતે કાર્યરત છે. વિદ્યાર્થીઓ માટે આધુનિક સમયના પ્રોજેક્ટ ડેવલોપમેન્ટ માટે ઉપયોગી ઇન્સ્ટ્રુમેન્ટ જેવા કે 3 ડી પ્રિન્ટર, તથા ફ્લેશફોર્જ, લેસર કટિંગ અને એનગ્રેવિંગ મશીનની સુવિધા આ સેન્ટરમાં શરૂ કરવામાં આવી છે. આ સેન્ટર ઉત્સાહ ધરાવતા વિદ્યાર્થીઓ, અધ્યાપક સભ્યો અને સંશોધનકારોને શિક્ષણ અને સર્જનાત્મકતાના અમલ માટે અને તેમના વિચારોને ડિઝાઇનની નવીનતાઓમાં રૂપાંતરિત કરવા પ્લેટફોર્મ પ્રદાન કરશે. જેનાથી વિદ્યાર્થીઓને નવી ટેકનોલોજી અને તેમના નવા વિચારોને સાકાર કરી શકે તે હેતુથી તેમજ પોતાની પેટન્ટ મેળવી શકે તે માટે તમામ માર્ગદર્શન અને કાર્યવાહીમાં મદદ પુરી પાડવામાં આવે છે.

ગુજરાત ટેક્નોલોજિકલ યુનિવર્સીટી દ્વારા અનુદાનિત ફેબલેબ (ફેબ્રિક લેબ) એ.વી.પી.ટી. આઈ રાજકોટ ખાતે કાર્યરત છે. જેના દ્વારા સોલાર પેનલ સાફ કરવાની ક્લીંનિંગ સિસ્ટમ, ડ્રોન વિમાન વડે ખેતરમાં દવાનો છંટકાવ કરવો, બોલતું નોટીસબોર્ડ, આંગળી વડે વ્હિલચેરનો ઉપયોગ કરવો જેવા અનેક પ્રોજેક્ટ રાજકોટ ખાતે આકાર લઈ રહ્યા છે. તેમજ જેનેસ્ટર ઈનોવેશન દ્વારા ડ્રોન વિમાનની મોટરનું ડિઝાઈનિંગ અને મેન્યુફેક્ચરીંગ સહિત અલગ અલગ ૧૪ વિષયો પર પેટન્ટ ફાઈલ કરવામાં આવી છે. જેમાં હેક્ઝાગોનલ ટેલીસ્કોપિક સ્પેનર, પોર્ટેબલ સેન્ટ્રીફ્યુગલ પમ્પ, વેરીયેબલ સ્પીડ મલ્ટીશાફ્ટ મોટર વગેરેનો સમાવેશ થાય છે. આ ફેબ લેબના માધ્યમ દ્વારા સૌરાષ્ટ્ર–કચ્છની ૧૪ જેટલી કોલેજોને ટેકનિકલ મદદ પુરી પાડવામાં આવી છે. પ્રોડક્ટ ડિઝાઈન અને ડેવલપમેન્ટ, માર્કેટ એક્સેસ સપોર્ટ, ઈન્ડસ્ટ્રીયલ એક્ઝીબીશન સપોર્ટ તથા પેટન્ટ, ટ્રેડમાર્ક, ડિઝાઈન કોપીરાઈટ, વગેરે માટે તમામ પ્રકારની સહાય કરવામાં આવે છે, તેમ .આર.ડી.રાઘાણીએ જણાવ્યું હતું.

સંસ્થાના સ્ટુડન્ટ સ્ટાર્ટઅપ એન્ડ ઈનોવેશન પોલીસીના કો-ઓર્ડીનેટર ભગીરથ ભટ્ટે જણાવ્યું હતું કે, નજીવા દરથી મેમ્બરશીપ તેમજ આધુનિક મશીનનો નિયત દરથી વિદ્યાર્થીઓ પોતાના ઇનોવેટિવ વર્ક માટે ઉપયોગ કરી શકશે, આ સુવિધા અન્ય કોઇ સ્થળે ઉપલબ્ધ નથી. વિદ્યાર્થીઓના નવા સ્ટાર્ટઅપ માટે પ્રધાનમંત્રીના “આત્મનિર્ભર ભારત” અભિયાનને મુર્તિમંત સ્વરૂપ આપવા માટે રિજિયોનલ સેન્ટર કાર્યરત છે. વિવિધ ટૂલ્સ અને ઇન્સ્ટ્રુમેન્ટ દ્વારા તેમજ ટેક્નિકલ એકટીવીટી, સેમિનાર,વેબિનાર દ્વારા વિદ્યાર્થીઓને વર્તમાનમાં ઉપયોગમાં લેવાતી તથા ભવિષ્યાની ટેક્નોલોજી સાથે અવગત કરાવવામાં આવે છે તેમજ વિદ્યાર્થીઓને તે અંગેનું માર્ગદર્શન પૂરું પાડવામાં આવે છે. સ્ટુડન્ટ સ્ટાર્ટઅપ એન્ડ ઈનોવેશન પોલીસી અન્વયે વિવિધ માર્ગદર્શન સહાય, ટીંકર લેબ, કો-વર્કીંગ સ્પેસ તથા પેટન્ટ સપોર્ટ આપવામાં આવે છે.

સંસ્થાના કો-ઓર્ડીનેટરએ જણાવ્યું હતું કે, એ.વી.પી.ટી.આઇ. બાયો-મેડિકલ, કમ્પ્યુટર, ઇન્સ્ટ્રુમેન્ટેશન અને કંટ્રોલ, ઇલેક્ટ્રિકલ, ઇલેક્ટ્રોનિક્સ અને કોમ્યુનિકેશન્સ અને કમ્પ્યુટર એડેડ કોસ્ચ્યુમ ડિઝાઇન ક્ષેત્રે ડિપ્લોમા એન્જિનિયરિંગના વિદ્યાર્થીઓને નવીન સંશોધન, અને આધુનિક ટેક્નોલોજી આધારિત વિકાસને પ્રોત્સાહિત કરે છે. એન.બી.એ. એટલે કે નેશનલ બોર્ડ ઓફ એક્રેડીટેશનની માન્યતા નજીકના સમયમાં મળવાની સંભાવના છે. જેના દ્વારા વિધ્યાર્થીઓને આઉટકમ બેઝડ એજ્યુકેશનનો લાભ મળી શકશે.

ઘો.૧૦ પછી ચાલતા વિવિધ અભ્યાસક્રમો જેવા કે  કોમ્પ્યુટર, ઈલેક્ટ્રોનિક્સ એન્ડ કમ્યુનિકેશન, ઈલેક્ટ્રીકલ, બાયો-મેડીકલ, આઈ.સી, કોમ્પ્યુટર એઇડેડ  કોસ્ચ્યુમ ડીઝાઇન એન્ડ ડ્રેસ મેકિંગ (ફક્ત વિદ્યાર્થીનીઓ માટે) કાર્યરત છે. આ ઉપરાંત, રોજગારી પ્રદાન કરવાની બાબતમાં એ.વી.પી.ટી.આઇ.અગ્રેસર રહ્યું છે. છેલ્લા ત્રણ માસમાં ૨૦ જેટલા વિદ્યાર્થીઓએ મલ્ટીનેશનલ કંપનીમાં પ્લેસમેન્ટ મેળવ્યું છે. હાલમાં જ એલ.એન્ડ ટી. ડિફેન્સમાં ૮ વિદ્યાર્થીઓ સિલેક્ટ થયા છે. આ ઉપરાંત, ટાટા, એસ્સાર, વિપ્રો, આદિત્ય બિરલા ગૃપ, અદાણી, સુઝલોન જેવી અનેક કંપનીઓના પ્લેસમેન્ટ સંસ્થામાં યોજવામાં આવે છે.

 એ.વી.પી.ટી.આઈ. એલ્યુમનિના સભ્યો આર્થિક રીતે નબળા વિદ્યાર્થીને પુસ્તકો અને ફી માટે મદદ કરે છે. તેમજ અનેક વેલ્ફેર એક્ટિવિટી જેવી કે વૃક્ષારોપણ, અનાજ વિતરણ અને બ્લડ ડોનેશન કેમ્પ જેવી સામાજિક પ્રવૃત્તિઓ કરે છે.