ઓનલાઈન વેચાણમાં મોટો વધારો: એસીથી માંડી આઈસ્ક્રીમ સુધીની ઘરે બેઠા ખરીદીનો ટ્રેન્ડ વધ્યો

માર્ચથી મેના સમયગાળામાં ઓનલાઈન ખરીદીમાં ધરખમ વધારો: કંપનીઓએ ડીલીવરી-ઓર્ડરોને પહોંચી વળવા વધુ સ્ટાફ રાખવો પડયો

ગુજરાતથી માંડીને દેશના મોટાભાગના રાજયોએ આ વખતના ઉનાળામાં ભીષણ ગરમી-હીટવેવનો સામનો કર્યો હતો ત્યારે ગરમીમાંથી રાહત મેળવવા માટે લોકોએ આઈસ્ક્રીમથી માંડીને એસી સુધીની ‘ઠંડક’ આપતી ચીજોની ધૂમ ખરીદી કરી હતી. ઈ-કોમર્સ પ્લેટફોર્મ પર ઓનલાઈન વેચાણમાં મોટો વધારો માલુમ પડયો હતો.

એમેઝોન-ફલીપકાર્ટ જેવા ઓનલાઈન પ્લેટફોર્મ પર માર્ચથી મે મહિનાના ગાળામાં વોલ્ટાસના વેચાણમાં 190 ટકાનો ધરખમ વધારો થયો હતો. કંપનીના જ પ્લેટફોર્મ પરનું વેચાણ 60 ટકા વધ્યુ હતું. ફલીપકાર્ટ પરથી એસી તથા કુલરનું વેચાણ વાર્ષિક ધોરણે ડબલ થઈ ગયુ હતું. એપ્રિલમાં દક્ષિણ તથા પુર્વોતર રાજયોની જોરદાર ડીમાંડ હતી જયારે મે માસમાં ઉતર તથા મધ્ય ભારતના રાજયોએ તડાકો સર્જયો હતો. બે ટન કે તેથી વધુના પ્રીમીયમ એગ્મેન્ટમાં વોલ્ટાસ, ગોદરેજ, લોઈડ, હાયર અને ઓનિડાનો મોટો હિસ્સો હતો.

એમેઝોન પર કુલરની ડીમાંડ મુંબઈ, અમદાવાદ, કોલકતા, પુના તથા હૈદ્રાબાદ જેવા શહેરોમાંથી સૌથી વધુ હતી. પેનાસોનિકના એસીના વેચાણમાં 55 ટકા હિસ્સો ફાઈવસ્ટાર ઈન્વર્ટર એસીનો હતો. નિષ્ણાંતોના કહેવા પ્રમાણે ડોરસ્ટેપ ડીલીવરીની સુવિધાને કારણે ઓનલાઈન ટ્રેન્ડ સતત વધી રહ્યો છે. ગરમીના સમયે કે જયારે તાપમાન ઉંચુ હોય ત્યારે લોકો ઓનલાઈન ખરીદી વધુ કરે છે. સવારે 10થી સાંજે 6-7 વાગ્યા સુધી થતી ખરીદીમાં ઓનલાઈન ઓર્ડર વધુ હોય છે.

આકરા તાપમાં બહાર નિકળવાનું ટાળીને લોકોએ ઓનલાઈન ખરીદીનો ટ્રેન્ડ અપનાવ્યો હતો. પરીસ્થિતિ એવી સર્જાઈ હતી કે ઓનલાઈન કંપનીઓએ પણ ડીલીવરીમાં પહોંચી વળવા માટે મેનપાવર વધારવા પડયા હતા. મધર ડેરીના મેનેજીંગ ડાયરેકટરે કહ્યું કે આઈસ્ક્રીમ, દહી સહીતની ડેરી પ્રોડકટની ડીમાંડ ઓનલાઈન ચેનલ પરથી 60 ટકા વધી હતી. અમેરિકન બ્રાન્ડ બાસ્કીન રોબીન્સે પણ ઓનલાઈન પ્લેટફોર્મનો સહારો લીધો હતો. એપ્રિલમાં તેમના આઈસ્ક્રીમ વેચાણમાં 20થી25 ટકા તથા મેમાં 40 ટકાનો વધારો થયો હતો.

માત્ર એસી કે આઈસ્ક્રીમ જ નહીં, બ્યુટી પ્રોકડટના ઓનલાઈન વેચાણમાં પણ વધારો હતો. બ્યુટી રીટેલર કલરબારના કહેવા પ્રમાણે ફીઝીકલ ખરીદી ઘટવા છતાં ઓનલાઈન વેચાણમાં વૃદ્ધિ હતી. ગરમી-આકરા તાપમાં બહાર નીકળવાને બદલે ઘરબેઠા જ ખરીદી કરવાનો ટ્રેન્ડ હતો.