માનવવધ સહિતની ફરિયાદ દાખલ છતાં જવાબદારો હજુ પોલીસ પકડથી દૂર: અજંતા હાઇડ્રો પાવર પ્રોજેક્ટમાં 5 મજૂરનાં મોત મામલે અજંતા એનર્જી સામે ગુનો નોંધાયો છે
જયસુખ ઓધવજી ભાલોડીયા ઉર્ફે જયસુખ પટેલ તેમજ તેમના પરિવારના પાંચ સભ્યો સહિત 6 જણા અજંતા એનર્જી પ્રા.લિ.ના ડિરેક્ટર્સ
- Advertisement -
ખાસ-ખબર ન્યૂઝ રાજકોટ
મોરબી બ્રિજ દુર્ઘટનાના મુખ્ય આરોપી જયસુખ પટેલની માલિકીની અજંતા પ્રાઇવેટ લિમિટેડના કડાણા ડેમ નજીક આવેલા હાઇડ્રો પાવર પ્લાન્ટમાં પાંચ યુવકોના કરુણ મોત થયા હોવા છતાં જવાબદાર વ્યક્તિઓ પોલીસ પકડથી દૂર છે. આ ઘટનામાં તંત્રની બેદરકારી અને ગુનાહિત માનવવધની ફરિયાદ દાખલ કરવામાં આવી છે, પરંતુ હજુ સુધી કોઈની ધરપકડ થઈ નથી. ઉલ્લેખનીય છે કે, જયસુખભાઈ ઓધવજીભાઈ ભાલોડીયા ઉર્ફે જયસુખ પટેલ તેમજ તેમના પરિવારના પાંચ સભ્યો સહિત 6 જણા અજંતા એનર્જી પ્રાઈવેટ લિમિટેડના ડિરેક્ટર્સ છે.
આ ઘટના બની ત્યારથી અજંતા પ્રાઇવેટ લિમિટેડના હાઇડ્રો પાવર પ્લાન્ટના સુપરવાઇઝર પણ ગાયબ થઈ ગયા હતા. ગુનાહિત બેદરકારીથી મોત થયા હોવા છતાં જવાબદાર વ્યક્તિઓ હજુ પોલીસ પકડથી દૂર છે. પોલીસે ફરિયાદ નોંધી છે, પરંતુ હજુ સુધી કોઈની ધરપકડ કરવામાં આવી નથી. જવાબદાર વ્યક્તિઓનું આ બેજવાબદાર વલણ અને પોલીસની નિષ્ક્રિયતાને કારણે લોકોમાં રોષ જોવા મળી રહ્યો છે.
સરકારના મંત્રીએ આ મામલે જવાબદાર સામે કડક કાર્યવાહી કરવાની ખાતરી આપી હતી, પરંતુ પોલીસ દ્વારા માત્ર ફરિયાદ નોંધીને જ સંતોષ માનવામાં આવ્યો છે. આજદિન સુધી પ્લાન્ટના જવાબદાર વ્યક્તિઓ પોલીસના સકંજાથી દૂર છે. આ સમગ્ર ઘટનામાં મોરબી બ્રિજ દુર્ઘટનાના જયસુખ પટેલની માલિકીની કંપની સામે ગંભીર સવાલો ઊભા થયા છે અને લોકો ન્યાયની માંગ કરી રહ્યા છે.
શું છે સમગ્ર ઘટના?
મહીસાગર નદીમાં પાણી છોડાતાં લુણાવાડા તાત્રોલી મહી બ્રિજ પાસે દોલતપુરા ગામ ખાતે આવેલા હાઈડ્રો પાવર પ્રોજેક્ટમાં ચોથી સપ્ટેમ્બરના રોજ પાણીનો પ્રવાહ ધસી આવ્યો હતો. જેમાં 5 કર્મચારીઓ પ્લાન્ટમાં ડૂબ્યા હતા. આ ઘટનામાં બચી ગયેલા એક કર્મચારીએ જણાવ્યું હતું કે, ’બપોરે લગભગ 3 વાગ્યે અચાનક પ્લાન્ટની અંદર 200 ફૂટ નીચે એક બ્લાસ્ટ થયો અને પાણીનો પ્રવાહ એટલી ઝડપથી અંદર ઘૂસી ગયો કે કોઈને સંભાળવાનો સમય જ ન મળ્યો. તે સમયે પ્લાન્ટની અંદર લગભગ 15થી વધુ કર્મચારીઓ હતા, જેમાંથી 10 લોકો બહાર નીકળવામાં સફળ રહ્યા. જેમને તરતા આવડતું હતું અથવા કોઈ વસ્તુ પકડી શક્યા, તેઓનો બચાવ થયો, પરંતુ બાકીના પાંચ કર્મચારીઓ પાણીના પ્રવાહમાં તણાઈ ગયા.’ કડાણા ડેમમાંથી પાણી છોડવાની સૂચના હતી, તેમ છતાં કડ઼ાણા ડેમના વીજ પ્લાન્ટના ઉચ્ચ અધિકારીઓએ આ સૂચનાને અવગણી અને 200 ફૂટ નીચે કામ કરી રહેલા 15થી વધુ કર્મચારીઓને બહાર નીકાળ્યા ન હતા. આ બેદરકારીને કારણે પાંચ યુવકો પાણીમાં ડૂબી ગયા હતા.
- Advertisement -
Ajanta Energyને કેમ બનાવી આરોપી?
અંજતા હાઈડ્રો પાવર પ્રોજેક્ટમાં સર્જાયેલી બેદરકારીના કારણે મજૂરોના મોત નિપજ્યા છે અને આ કારણથી જ લુણાવાડા તાલુકા પોલીસે જવાબદારો સામે ગુનો નોંધ્યો છે. લુણાવાડા તાલુકા પોલીસે અજંતા એનર્જી કંપની અને તેનું સંચાલન કરવા માટે જવાબાદાર ગણાતા શખ્સો સામે કેસ નોંધ્યો છે. પ્રાપ્ત માહિતી અનુસાર અજંતા એનર્જી પ્રા.લી. કંપનીએ બે જુદાજુદા કામો માટે પેટા કોન્ટ્રાક્ટ આપ્યા છે.
મોરબી પુલકાંડ બાદ ફરી જયસુખ પટેલ ફરી ચર્ચામાં
મોરબી ઝૂલતા પુલકાંડમાં જવાબદાર મુખ્ય આરોપી જયસુખ પટેલ 14 મહિનાનો જેલવાસ ભોગવી ચૂક્યાં છે. 30 ઑક્ટોબર 2022ના રોજ પુલ તૂટવાની દુ:ખદ ઘટનામાં 136 લોકોના મોતને ભેટ્યા હતાં. સેશન્સ કોર્ટ અને ગુજરાત હાઇકોર્ટમાંથી જામીન મેળવવામાં નિષ્ફળ રહેલાં જયસુખ પટેલને સુપ્રીમ કોર્ટે માર્ચ-2024માં શરતી જામીન આપ્યા હતા. જયસુખ પટેલ મૃતકોના પરિવારજનોને અદાલતના આદેશ બાદ વળતળ ચૂકવ્યુ છે. અત્રે નોંધનીય છે કે, હાઈડ્રો પાવર પ્રોજેક્ટમાં દુર્ઘટના સર્જાતા અજંતા એનર્જી કંપનીએ આર્થિક સહાય આપવાની જાહેરાત કરી દીધી છે.
