ગિરનાર આરોહણ અવરોહણ સ્પર્ધામાં રાષ્ટ્રીય કક્ષાએ પ્રથમ આવનારને 1 લાખનું ઇનામ

રાજ્ય કક્ષાએ પ્રથમ નંબરને 50 હાજર પુરસ્કાર: ઇનામોની રાશિ અંતે વધી
ખાસ-ખબર સંવાદદાતા
જૂનાગઢ ખૂબ કઠિન અને સાહસિક ગણાતી ગિરનાર અવરોહણ સ્પર્ધાની ઈનામી રાશિમાં રાજ્ય સરકારે ખૂબ મોટો વધારો કર્યો છે. ચાર વયજૂથમાં યોજાતી રાષ્ટ્રીય અને રાજ્ય કક્ષાની સ્પર્ધા માટેના પુરકારમાં ચાર ગણો વધારો કરવામાં આવ્યો છે. એટલે કે, રાષ્ટ્રીય કક્ષાની 4 વયજૂથની સ્પર્ધામાં 1 થી 10 સુધીમાં ક્રમાંક મેળવનારને અગાઉ કુલ 5.50 લાખના આપતા, હવે કુલ 19 લાખની ઈનામી રાશિ અપાશે. તેવી જ રીતે રાજ્ય કક્ષાની સ્પર્ધામાં કુલ 66,000ની પુરસ્કાર રાશિ વધારીને રૂ. 8,40 લાખ કરવામાં આવી છે. મુખ્યમંત્રી ભૂપેન્દ્ર પટેલ અને રમત ગમત મંત્રી હર્ષ સંઘવીએ દેશ અને રાજ્યમાંથી આવતા સ્પર્ધકોને મોટી ભેટ આપી છે, જેથી સ્પર્ધકોને પ્રોત્સાહન મળવાની સાથે તેમનો ઉત્સાહ પણ વધશે. ઉલ્લેખનીય છે કે, જૂનાગઢના ધારાસભ્ય સંજય કોરડીયાએ રાજ્ય સરકારમાં ગિરનાર આરોહણ અવરોહણ સ્પર્ધાના પુરસ્કારમાં વધારો કરવા માટે રજૂઆત કરી હતી. આમ, તેમની રજૂઆતને પણ સફળતા મળી છે. અખિલ ભારત ગિરનાર આરોહણ અવરોહણ સ્પર્ધામાં પ્રથમ ક્રમે આવનારને 50,000 જગ્યાએ રૂ.1 લાખ અને રાજ્ય કક્ષાની સ્પર્ધામાં પ્રથમ ક્રમે આવનારને રૂ.7000 જગ્યાએ 50,000નો રોકડ પુરસ્કાર આપવામાં આવશે.આ પુરસ્કાર રાશીના વધારાનો લાભ આગામી સમયમાં યોજાનાર સ્પર્ધામાં મળશે.