વેસ્ટ ઈન્ડિઝ બાદ ઝીમ્બાબ્વે પણ ભારતમાં વર્લ્ડકપ રમવા નહીં આવી શકે: હવે સ્કોટલેન્ડ અથવા નેધરલેન્ડમાંથી એક ટીમ થશે ક્વોલિફાય
આઈસીસી વિશ્વકપ-2023ના રમાઈ રહેલા ક્વોલિફાયર રાઉન્ડમાં ઝીમ્બાબ્વેને મોટો ઝટકો લાગ્યો છે. સુપર સિક્સ રાઉન્ડમાં ઝીમ્બાબ્વેને સ્કોટલેન્ડે 31 રને હરાવ્યું છે. આ હાર સાથે જ વર્લ્ડકપ-2023માં રમવાનું ઝીમ્બાબ્વેનું સ્વપ્ન પણ તૂટી ગયું છે. માત્ર સ્વપ્ન જ નથી તૂટ્યું પરંતુ આ હારને કારણે ચાહકો અને ટીમના ખેલાડીઓ અંદરથી હચમચી ગયા છે. ખાસ કરીને ટીમના અનુભવી ખેલાડી સિકંદર રઝા સહિતના ખેલાડીઓ ગ્રાઉન્ડ પર જ રડી પડ્યા હતા.
- Advertisement -
રઝાએ ક્વોલિફાયર રાઉન્ડમાં ટીમ માટે પૂરી તાકાત લગાવી દીધી હતી. તેણે બોલ-બેટ બન્નેથી કમાલ કરી હતી. બેટિંગમાં તેણે 325 રન તો બોલિંગમાં નવ વિકેટ ખેડવી હતી. તેના આ દમદાર પ્રદર્શનથી જ ટીમ સુપર સિક્સ રાઉન્ડમાં પહોંચી હતી. ઝીમ્બાબ્વે 2019 વર્લ્ડકપ ક્વોલિફાયરમાં પણ ક્વોલિફાય થઈ શકી નહોતી જેમાં રઝાએ 196 રન બનાવવાની સાથે 12 વિકેટ મેળવી હતી.
સુપરસિક્સના આ મુકાબલામાં સ્કોટલેન્ડ માટે માઈકલ લીસ્કે ઑલરાઉન્ડ પ્રદર્શન અને ક્રિસ સોલે શાનદાર બોલિંગ કરી હતી. ઝીમ્બાબ્વે હવે ટૂર્નામેન્ટમાંથી બહાર થઈ ચૂક્યું છે. સ્કોટલેન્ડના હવે છ પોઈન્ટ થઈ ગયા છે અને તે શ્રીલંકા બાદ બીજા સ્થાને પહોંચી ગયું છે. ઝીમ્બાબ્વેના પણ છ પોઈન્ટ થઈ ગયા છે પરંતુ તેણે પોતાની તમામ મેચ રમી લીધી છે અને તેની નેટ રનરેટ પણ સારી નથી. આ મેચમાં સ્કોટલેન્ડે પહેલાં બેટિંગ કરતાં 234 રન બનાવ્યા હતા જેના જવાબમાં ઝીમ્બાબ્વે 41.1 ઓવરમાં 203 રને સંકેલાઈ ગયું હતું.
