MLA દર્શિતા શાહ, કલેક્ટર અરૂણ મહેશ બાબુ અને અધિક્ષકની ઉપસ્થિતિમાં મોકડ્રીલ યોજાઇ
7 એમ્બ્યુલન્સ કાર્યરત્, ત્રણ માસની દવાઓનો જથ્થો હયાત, 150 બેડ તૈયાર, 13 લિક્વિડ ઓક્સિજન ટેન્ક પણ ઉપલબ્ધ
- Advertisement -
માઈક્રોબાયોલોજી લેબોરેટરીની મુલાકાત લઈને ટેસ્ટિંગ સહિતની વ્યવસ્થાની સમીક્ષા
ખાસ-ખબર સંવાદદાતા
કોવિડની ચોથી લહેરની સંભાવનાઓ વચ્ચે રાજકોટ જિલ્લાનું વહીવટી અને સિવિલ હોસ્પિટલ તંત્ર કોઈપણ સ્થિતિને પહોંચી વળવા માટે સજ્જ છે. રાજકોટ સિવિલ હોસ્પિટલમાં બેડ, કોવિડ ટેસ્ટિંગ, દવાઓ, ઓક્સિજન, એમ્બ્યુલન્સ સહિતની પૂરતી વ્યવસ્થાઓ છે. રાજકોટ સિવિલ હોસ્પિટલ ખાતે આજે યોજાયેલી મોકડ્રીલમાં આ બાબતોની કલેકટરે સમીક્ષા કરી હતી. રાજકોટના ધારાસભ્ય ડો. દર્શિતાબેન શાહ, જિલ્લા કલેક્ટર અરૂણ મહેશ બાબુ, સિવિલ હોસ્પિટલના અધિક્ષક ડો. આર.એસ. ત્રિવેદી તેમજ સ્ટાફ દ્વારા આજરોજ કોવિડ સંદર્ભે મોકડ્રીલ યોજવામાં આવી હતી. જેમાં તમામ ઉપસ્થિતોએ પહેલાં માઈક્રોબાયોલોજી લેબોરેટરીની મુલાકાત લઈને ટેસ્ટિંગ સહિતની વ્યવસ્થાની સમીક્ષા કરી હતી. બાદમાં સિવિલ હોસ્પિટલ પરિસરમાં એમ્બ્યુલન્સની ચકાસણી કરાઈ હતી. એ પછી ઓક્સિજન પ્લાટની મુલાકાત લઈને તેની ક્ષમતાની ચકાસણી કરવામાં આવી હતી.
- Advertisement -
ચૌધરી હાઇસ્કૂલ પરિસરમાં બનાવાયેલી કોવિડ ડોમ હોસ્પિટલની મુલાકાત લઈને બેડ, ઓક્સિજન વ્યવસ્થા, દવાઓ તેમજ અન્ય સ્થિતિની સમીક્ષા કરવામાં આવી હતી. કોવિડ ડેડિકેટેડ હોસ્પિટલના ત્રીજા માળે, ન્યૂરો સર્જરી વિભાગમાં તૈયાર કરાયેલા કોવિડના આઇસોલેશન વોર્ડની મુલાકાત લેવામાં આવી હતી. સિવિલ હોસ્પિટલના અધિક્ષક ડો. આર.એસ. ત્રિવેદીએ જણાવ્યું હતું કે, આપણી પાસે હાલ કોવિડ ડોમ હોસ્પિટલમાં 100 તેમજ કોવિડ આઇસોલેશન વોર્ડમાં 50 મળીને કુલ 150 બેડની વ્યવસ્થા ઉપલબ્ધ છે. જરૂર પડ્યે વધુ બેડની વ્યવસ્થા કરવા માટે જિલ્લ વહીવટીતંત્ર સંપુર્ણ સજ્જ છે. ઓક્સિજન માટે હાલ સાત પી.એસ.એ. પ્લાન્ટ કાર્યરત છે. જેના થકી દર મિનિટે ચાર હજાર લીટર કરતાં પણ વધુ ઓક્સિજન ઉત્પન્ન થાય છે. જ્યારે સ્ટોરેજ માટે 13 લિક્વિડ ઓક્સિજન ટેન્ક પણ ઉપલબ્ધ છે.
દેશભરની તમામ કોવિડ હોસ્પિટલોમાં મોકડ્રીલ યોજાઇ
કોરોનાના દસ્તક વચ્ચે આજે દેશભરમાં ખાનગી અને સરકારી હોસ્પિટલમાં મોકડ્રીલ યોજાઈ હતી. જેમાં ગુજરાતમાં પણ અમદાવાદ, વડોદરા, ગાંધીનગર સહિતની હોસ્પિટલમાં મોકડ્રીલ યોજાઈ રહી છે. કેન્દ્રીય આરોગ્ય પ્રધાન મનસુખ માંડવિયાએ કોવિડ મોકડ્રીલની સમીક્ષા કરવા સફદરજંગ હોસ્પિટલની મુલાકાત લીધી હતી. તેની સાથે જ દેશભરની તમામ કોવિડ હોસ્પિટલોમાં મોકડ્રીલનું આયોજન કરવામાં આવી રહ્યું છે.