રાજકોટ બેડી માર્કેડ યાર્ડમાં બે દિવસમાં 1.5 લાખ મણ જણસીની આવક

યાર્ડ બહાર અંદાજે 2000 જેટલા વાહનોનો ખડકલો
ખાસ-ખબર ન્યૂઝ રાજકોટ

રાજકોટ માર્કેટિંગ યાર્ડમાં શનિવાર અને સોમવારના રોજ કૃષિ જણસીઓની નોંધપાત્ર આવક થઈ હતી, જેમાં આ બે દિવસ દરમિયાન માર્કેટયાર્ડમાં 2,000થી પણ વધારે વાહનોનો ખડકલો થયો હતો. યાર્ડના વહીવટીતંત્રે આ ભારે આવકને ધ્યાનમાં રાખીને ઉત્તરાઈની પ્રક્રિયા સુચારુ રીતે ચાલે તે માટે ખાસ વ્યવસ્થા ગોઠવી હતી. રાજકોટ માર્કેટયાર્ડના ચેરમેન જયેશ બોઘરા, વાઇસ ચેરમેન તથા ડિરેક્ટરો સહિતના સ્ટાફ દ્વારા આ સમગ્ર ઉત્તરાઈની વ્યવસ્થાનું સંચાલન કરવામાં આવ્યું હતું. આ બે દિવસોની કુલ આવક પર નજર કરીએ તો, મગફળીની કુલ આવક 41000 મણ નોંધાઈ હતી. (શનિવારે 21000 મણ અને સોમવારે 20000 મણ) મગફળીની આવક થઈ હતી. સોયાબીનની આવક પણ એટલી જ એટલે કે કુલ 41000 મણ (શનિવારે 22000 મણ અને સોમવારે 19000 મણ) રહી હતી. કપાસની કુલ આવક 34500 મણ (શનિવારે 14500 મણ અને સોમવારે 20000 મણ) નોંધાઈ હતી, જેમાં સોમવારના દિવસે કપાસની આવકમાં જંગી વધારો જોવા મળ્યો હતો. મુખ્ય જણસીઓ ઉપરાંત અન્ય જણસીઓની આવક પણ નોંધપાત્ર રહી હતી. ચણાની કુલ આવક 14000 મણ (બંને દિવસે 7000-7000 મણ) થઈ હતી. સફેદ તલની કુલ આવક 11000 મણ (શનિવારે 6000 મણ અને સોમવારે 5000 મણ) રહી હતી, જે સફેદ તલનું સારું ઉત્પાદન દર્શાવે છે. અડદની કુલ આવક 10300 મણ (શનિવારે 6300 મણ અને સોમવારે 4000 મણ), જ્યારે ઘઉંની કુલ આવક 10200 મણ (શનિવારે 5200 મણ અને સોમવારે 5000 મણ) નોંધાઈ હતી. લસણની કુલ આવક 7500 મણ (શનિવારે 4500 મણ અને સોમવારે 3000 મણ) અને મગની કુલ આવક 8900 મણ (શનિવારે 4400 મણ અને સોમવારે 4500 મણ) થઈ હતી.

મગફળીનાં ભાવ ટેકાના ભાવ કરતા ઓછા મળતા ખેડૂતોમાં અસંતોષની લાગણી
સોમવારના દિવસે વિશેષ રૂપે સિંગફાડાની 10000 મણ અને જીરુંની 4500 મણની આવક પણ યાર્ડમાં થઈ હતી. તમામ જણસીઓ ભરેલા વાહનોને માર્કેટયાર્ડમાં ક્રમવાર પ્રવેશ આપીને ઉત્તરાઈની કામગીરી પૂર્ણ કરવામાં આવી હતી. ખેડૂતોને વધુ સમય માટે લાઈનમાં ઉભું રહેવું પડે નહીં તે માટેની વ્યવસ્થા યાર્ડનાં સત્તાધીશો દ્વારા કરવામાં આવી હતી. જોકે મગફળીનાં ભાવ ટેકાના ભાવ કરતા ઓછા મળતા ખેડૂતોમાં ભારે અસંતોષની લાગણી જોવા મળી હતી. અને ટેકાના ભાવે મગફળીની ખરીદી શરૂ કરવામાં આવે તેવી માંગ ખેડૂતોએ કરી હતી.