દિવાળી વેકેશનમાં પણ ખાનગી શાળાઓના વર્ગો ચાલુ! : DEOની કામગીરી સામે સવાલો
કલ્યાણ સ્કૂલમાં 150, અંબિકા ટાઉનશીપની મોદી સ્કૂલમાં 300 વિદ્યાર્થીનું શૈક્ષણિક કાર્ય બંધ કરાવ્યું
- Advertisement -
શાળા સંચાલકોની અભ્યાસક્રમ પૂર્ણ કરવાની દોડમાં વિદ્યાર્થીઓનું વેકેશન છીનવી લેવાનો કોઈને અધિકાર નથી : રોહિતસિંહ રાજપૂત
રાજ્ય સરકારના શૈક્ષણિક કેલેન્ડર મુજબ દિવાળી વેકેશન જાહેર કરવામાં આવ્યું હોવા છતાં કેટલીક ખાનગી શાળાઓ દ્વારા વેકેશન દરમિયાન પણ ધોરણ 10 અને 12 સિવાયના વિદ્યાર્થીઓને શાળામાં બોલાવી શૈક્ષણિક કાર્ય ચાલુ રાખવામાં આવતું હોવાની ફરિયાદો સામે આવી રહી છે. આ મુદ્દે અગાઉ જિલ્લા શિક્ષણાધિકારી સમક્ષ લેખિત રજૂઆત કરી હોવા છતાં કેટલીક શાળાઓ દ્વારા વેકેશનના નિયમોનું પાલન કરવામાં આવતું ન હોવાથી આજે કોંગ્રેસના વિદ્યાર્થી પ્રતિનિધિઓ દ્વારા રૈયા રોડ પર આવેલી કલ્યાણ સ્કૂલ અને અંબિકા ટાઉનશીપ વિસ્તારમાં આવેલી મોદી સ્કૂલ ખાતે પહોંચીને ચાલતું શૈક્ષણિક કાર્ય બંધ કરાવવામાં આવ્યું હતું.
રૈયા રોડ પર આવેલી કલ્યાણ સ્કૂલમાં ધોરણ 11ના વિદ્યાર્થીઓને દિવાળી વેકેશન દરમિયાન શાળાએ બોલાવી શૈક્ષણિક કાર્ય ચાલુ રાખવામાં આવ્યું હોવાની ફરિયાદ મળતાં કોંગ્રેસના વિદ્યાર્થી પ્રતિનિધિઓ શાળાએ પહોંચ્યા હતા. જ્યાં તપાસ દરમિયાન 150થી વધુ વિદ્યાર્થીઓ શાળામાં હાજર હોવાનું સામે આવતાં તમામ વિદ્યાર્થીઓને શાળામાંથી મુક્ત કરાવવામાં આવ્યા હતા.
- Advertisement -
ત્યારબાદ અંબિકા ટાઉનશીપ વિસ્તારમાં આવેલી મોદી સ્કૂલ ખાતે કોંગ્રેસના કાર્યકરો પહોંચ્યા ત્યારે શાળાના મહિલા આચાર્ય સાથે રકઝક થઈ હતી. આ દરમિયાન કોંગ્રેસના વિદ્યાર્થી નેતા રોહિતસિંહ રાજપૂતે જિલ્લા શિક્ષણાધિકારીને ફોન કરી આચાર્ય સાથે વાત કરાવી હતી. જોકે, આચાર્ય દ્વારા જિલ્લા શિક્ષણાધિકારીને માત્ર ધોરણ 12 સાયન્સના વિદ્યાર્થીઓ જ શાળામાં હાજર હોવાની જાણ કરવામાં આવી હતી. પરંતુ કોંગ્રેસના વિદ્યાર્થી કાર્યકરોએ શાળાના ઉપરના માળે જઈ તપાસ કરતાં ધોરણ 11ના છ વર્ગો એટલે કે 300થી વધુ વિદ્યાર્થીઓનું શૈક્ષણિક કાર્ય ચાલુ હોવાનું સામે આવ્યું હતું. ત્યારબાદ તમામ વિદ્યાર્થીઓને શાળામાંથી મુક્ત કરાવવામાં આવ્યા હતા.
આ અંગે કોંગ્રેસના વિદ્યાર્થી નેતા અને ગુજરાત પ્રદેશ કોંગ્રેસના સૌરાષ્ટ્ર ઝોન પ્રવક્તા રોહિતસિંહ રાજપૂતે જણાવ્યું હતું કે, “અમે અગાઉ જિલ્લા શિક્ષણાધિકારી અને ખાનગી શાળા સંચાલક મંડળના આગેવાનો સાથે આ મુદ્દે ચર્ચા કરી હતી. ધોરણ 10 અને 12ના વિદ્યાર્થીઓને બોર્ડની પરીક્ષાની તૈયારી માટે અભ્યાસની છૂટ આપવાની બાબત અલગ છે, પરંતુ ધોરણ 11 સહિતના અન્ય ધોરણોના વિદ્યાર્થીઓને દિવાળી વેકેશન દરમિયાન શાળામાં બોલાવવાનો કોઈ તર્ક નથી. વિદ્યાર્થીઓની ફરિયાદોના આધારે આજે બંને શાળાઓમાં પહોંચીને ચાલતું શૈક્ષણિક કાર્ય બંધ કરાવ્યું છે.”
તેમણે શિક્ષણ વિભાગની કામગીરી સામે પણ સવાલ ઉઠાવતાં જણાવ્યું હતું કે, “વેકેશન દરમિયાન શાળાઓ સરકારી શૈક્ષણિક કેલેન્ડરનું પાલન કરે છે કે નહીં તેની દેખરેખ રાખવાની જવાબદારી જિલ્લા શિક્ષણ વિભાગના વિસ્તાર પ્રમાણેના એજ્યુકેશન ઇન્સ્પેક્ટરોની છે. તો પછી જે શાળાઓમાં વેકેશન દરમિયાન વર્ગો ચાલુ છે તે જવાબદાર અધિકારીઓને કેમ દેખાતું નથી? શું શિક્ષણ વિભાગના અધિકારીઓ માત્ર કચેરીમાં બેસીને જ કામગીરી કરશે? ખાનગી શાળાઓની સ્થળ તપાસ કરવાની જવાબદારી કોની છે? વાર-તહેવારના નામે ખાનગી શાળાઓને જાણે છૂટછાટ મળી જતી હોય તેમ તંત્રની નિષ્ક્રિયતા સામે આવી રહી છે.”
મોદી સ્કૂલના સંચાલન અંગે આકરા સવાલો ઉઠાવતાં રોહિતસિંહ રાજપૂતે જણાવ્યું હતું કે, “મોદી સ્કૂલના સંચાલકો એવી રીતે વર્તી રહ્યા છે કે જાણે તેઓ શિક્ષણ વિભાગના નિયમો અને નિયંત્રણોથી પર હોય! સ્કૂલની આઠથી દસ જેટલી શાખાઓ છે અને આર્થિક તથા રાજકીય વગના આધારે નિયમોનું પાલન કરવું જરૂરી નથી એવો અભિગમ રાખવામાં આવતો હોય તેવી ફરિયાદો ઊભી થઈ રહી છે. આખા રાજકોટની શાળાઓમાં વેકેશનનો અમલ થઈ રહ્યો હોય ત્યારે મોદી સ્કૂલની વિવિધ શાખાઓમાં જ ધોરણ 11ના વર્ગો ચાલુ હોવાની ફરિયાદો કેમ સામે આવે છે? શું સરકારી નિયમો માત્ર નાની શાળાઓ માટે જ છે? મોટા શાળા સંચાલકોને નિયમો લાગુ પડતા નથી?”
અંતમાં રોહિતસિંહ રાજપૂતે જણાવ્યું હતું કે, “દિવાળી વેકેશન એ વિદ્યાર્થીઓનો અધિકાર છે. બાળકોને અભ્યાસના ભારણમાંથી મુક્તિ મળે, પરિવાર સાથે સમય વિતાવવાની તક મળે અને પોતાના બાળપણનો આનંદ માણી શકે તે માટે વેકેશન આપવામાં આવે છે. શાળા સંચાલકોની અભ્યાસક્રમ પૂર્ણ કરવાની દોડમાં વિદ્યાર્થીઓનું વેકેશન છીનવી લેવાનો કોઈને અધિકાર નથી. વિદ્યાર્થીઓના અધિકારો માટે લડવું અમારી જવાબદારી છે અને આ જવાબદારી નિભાવવામાં અમે કોઈપણ શાળા સંચાલકની વગ કે દબાણ સામે ઝૂકવાના નથી. જિલ્લા શિક્ષણાધિકારી તાત્કાલિક સ્થળ તપાસ કરાવી જવાબદાર શાળાઓ સામે કાર્યવાહી કરે, અન્યથા આગામી દિવસોમાં પણ વિદ્યાર્થીઓના હિતમાં ઉગ્ર વિરોધ કરવામાં આવશે.”



