ઇંગ્લેન્ડ-ન્યુઝીલેન્ડ ટેસ્ટમાં પિચે તબાહી મચાવી: પ્રથમ દિવસે જ પડી 16 વિકેટ

ત્રણ દિવસ મેચ ચાલવી પણ મુશ્કેલ: બોલરોના ઘાતક પ્રદર્શન સામે બેટ્સમેનો લાચાર: ઇંગ્લેન્ડ માત્ર 140 રનમાં ઓલઆઉટ, સામે ન્યુઝીલેન્ડે પણ 61 રનમાં ગુમાવી 6 વિકેટ

ખાસ-ખબર ન્યૂઝ નવી દિલ્હી, તા.5

ઇંગ્લેન્ડ અને ન્યુઝીલેન્ડ વચ્ચે રમાઈ રહેલી ત્રણ મેચની ટેસ્ટ શ્રેણીના પહેલા જ દિવસે બોલરોએ સંપૂર્ણ રીતે પ્રભુત્વ જમાવ્યું છે. લંડનની લીલી પીચ અને પ્રતિકૂળ સ્વિંગ સામે બંને ટીમોના દિગ્ગજ બેટ્સમેનોએ ભારે ઝઝૂમવું પડ્યું હતું, જેના કારણે મેચના પ્રથમ દિવસે જ કુલ 16 વિકેટો ધરાશાયી થઈ ગઈ હતી. પિચની આ ભયાનક સ્થિતિ જોતા આ ટેસ્ટ મેચ ત્રણ દિવસ પણ પૂરા નહીં ખેંચી શકે તેવા સ્પષ્ટ એંધાણ વર્તાઈ રહ્યા છે. ટોસ જીતીને પ્રથમ બેટિંગ કરવાનો નિર્ણય લેનાર યજમાન ઇંગ્લેન્ડની શરૂઆત અત્યંત ખરાબ રહી હતી અને આખી ટીમ પ્રથમ ઇનિંગ્સમાં ફક્ત 140 રન બનાવીને ઓલઆઉટ થઈ ગઈ હતી. ટીમે નિયમિત અંતરાલે પોતાની વિકેટો ગુમાવી હતી, જેમાં સ્ટાર બેટ્સમેન જો રૂટ (1) અને કેપ્ટન બેન સ્ટોક્સ (12) જેવા અનુભવી ખેલાડીઓ સસ્તામાં આઉટ થઈ ગયા હતા. હેરી બ્રુક એકમાત્ર એવો બેટ્સમેન હતો જે સમગ્ર ઇનિંગ્સ દરમિયાન કિવી બોલરો સામે મજબૂતાઈથી ક્રિઝ પર ટકી રહ્યો હતો. તેણે 71 બોલમાં 10 ચોગ્ગાની મદદથી 56 રનની શાનદાર અડધી સદી ફટકારી હતી. અંતિમ ઓવરોમાં શોએબ બશીરના 14 અને જોશ ટોંગના અણનમ 10 રનની મદદથી ઇંગ્લેન્ડની ટીમ 39.4 ઓવરમાં 140 રનનો સ્કોર નોંધાવી શકી હતી. ન્યૂઝીલેન્ડના કદાવર ફાસ્ટ બોલર કાયલ જેમીસન ઇંગ્લેન્ડના બેટ્સમેનો માટે દુ:સ્વપન સાબિત થયા હતા. જેમીસને ઘાતક બોલિંગનું પ્રદર્શન કરતા 14 ઓવરમાં 62 રન આપીને 5 મહત્વની વિકેટો ઝડપી હતી, જેના કારણે ઇંગ્લેન્ડનો ધબડકો થયો હતો. તેમને સારો સાથ આપનારા નાથન સ્મિથે 38 રન આપીને 3 વિકેટ લીધી હતી, જ્યારે વિલિયમ ઓ’રોર્કે બે વિકેટ મેળવી હતી.