કોલકાતા રેપની ઘટના બાદ કર્ણાટક સરકારે ડોકટરોની સુરક્ષા માટે વધુ પ્રતિબદ્ધતા દર્શાવી છે. આ શ્રેણીમાં કર્ણાટક સરકાર ટૂંક સમયમાં સુરક્ષા સંબંધિત માર્ગદર્શિકા જારી કરશે.
કોલકાતાની આરજી કર મેડિકલ કોલેજ અને હોસ્પિટલમાં ટ્રેઇની ડૉક્ટરનો બળાત્કાર અને હત્યા બાદ દેશભરમાં વિરોધ પ્રદર્શન ચાલુ છે. દેશના ઘણા રાજ્યોમાં ડૉક્ટરોની સુરક્ષાની માંગ વધવા લાગી છે. જ્યારે ઘણા રાજ્યોએ કોલકાતાની ઘટનાની નિંદા કરી છે, જયારે સુરક્ષા સુનિશ્ચિત કરવાનું પણ કહ્યું છે. ત્યારે કર્ણાટક સરકારે રાજ્યભરની હોસ્પિટલોમાં કામ કરતા ડૉકટરોની સુરક્ષા સુનિશ્ચિત કરવા માટે ઘણા પગલાં સૂચવ્યા છે. મેડિકલ એજ્યુકેશન મિનિસ્ટર શરણપ્રકાશ પાટીલની અધ્યક્ષતામાં મળેલી બેઠકમાં ડૉકટરો, નર્સો અને હોસ્પિટલ સ્ટાફ માટે સલામતીનાં પગલાં અંગે ચર્ચા કરવામાં આવી હતી. ડૉક્ટર્સ એસોસિએશનના સભ્યોને એક દસ્તાવેજ તૈયાર કરવા માટે કહેવામાં આવ્યું જેથી કરીને મેડિકલ એજ્યુકેશન વિભાગ પ્રમાણભૂત એડવાઇઝરી તૈયાર કરી શકે.
- Advertisement -
અહેવાલ અનુસાર, મેડિકલ એજ્યુકેશન મિનિસ્ટર શરણ પ્રકાશ પાટીલે ડૉક્ટરોની સુરક્ષાને લઈને તાત્કાલિક અને વ્યાપક માર્ગદર્શિકા તૈયાર કરવાનો આદેશ આપ્યો છે. આ સાથે મેડિકલ કોલેજો અને હોસ્પિટલોમાં ડૉક્ટરોની સુરક્ષા સુનિશ્ચિત કરવા માટે પણ સૂચના આપવામાં આવી છે. શરણ પ્રકાશ પાટીલે જણાવ્યું કે સુરક્ષા સંબંધિત માર્ગદર્શિકા અને સલાહ ટૂંક સમયમાં જારી કરવામાં આવશે. સલાહ અને માર્ગદર્શિકા પણ ડૉક્ટરોના જૂથો તરફથી મળેલા પ્રતિસાદ અને સૂચનોના આધારે હોવાની વાત પણ કહી.
‘માર્ગદર્શિકા તમામ હોસ્પિટલોને લાગુ પડશે’
પ્રાપ્ત માહિતી અનુસાર, ટૂંક સમયમાં જારી કરવામાં આવનાર માર્ગદર્શિકા સરકારી અને ખાનગી બંને તબીબી સંસ્થાઓ પર લાગુ કરવામાં આવશે. કોલકાતાની આરજી કર મેડિકલ કોલેજ અને હોસ્પિટલમાં એક ટ્રેઇની ડૉક્ટર સામે નિર્દયતાની ઘટના અંગે મંત્રી પાટિલે કહ્યું કે તબીબી વ્યાવસાયિકો સામેની હિંસા કોઈપણ કિંમતે સહન કરવામાં આવશે નહીં. તેમણે કહ્યું કે અમારી સરકાર સંપૂર્ણ રીતે પ્રતિબદ્ધ છે કે તેમની સુરક્ષા માટેના તમામ પગલાં શક્ય તેટલી વહેલી તકે લાગુ કરવામાં આવશે.
- Advertisement -
માર્ગદર્શિકા તૈયાર કરવાનો આદેશ મેડિકલ એજ્યુકેશન (ડીએમઈ) નિયામક ડૉ. સુજાતા રાઠોડને આપવામાં આવ્યો છે. એક અહેવાલમાં ડૉ. સુજાતા રાઠોડને ટાંકીને જણાવાયું કે “અમારા મંત્રીની સૂચના પર, અમે તમામ સરકારી સંસ્થાઓ અને સુપર સ્પેશિયાલિટી હોસ્પિટલોના ડિરેક્ટરો સાથે તેમના સેવા આપતા ડૉકટરોની સુરક્ષા પ્રોફાઇલમાં અંતરને ઓળખવા માટે બેઠક યોજી છે.” ડીએમઈ અનુસાર, મેડિકલ એજ્યુકેશન વિભાગ હેઠળ 22 સરકારી મેડિકલ કોલેજો સહિત 71 મેડિકલ કોલેજો છે. આ ઉપરાંત, રાજ્યમાં નર્સિંગ અને પેરામેડિકલ સંસ્થાઓ છે. બેઠક દરમિયાન વિભાગે સુરક્ષા સંબંધિત ખામીઓની પણ સમીક્ષા કરી હતી. નિર્ભયા એડવાઈઝરી પછી, વિભાગ એ વાત પર ભાર મૂકે છે કે કશે પણ અંધારું ન હોવું જોઈએ અને બધી જગ્યાએ સારી લાઇટિંગ હોવી જોઈએ. સાથે જ મોટાભાગના વિસ્તારોમાં સીસીટીવી કેમેરા લગાવવા જોઈએ.
તમામ સંસ્થાઓમાં પ્રિવેન્શન ઓફ સેક્સ્યુઅલ હેરેસમેન્ટ (POSH) કમિટીઓ હોય છે, જે સાવચેતીનાં પગલાં પણ સૂચવી શકે છે જેથી આવી કોઈ ઘટના બને તો સાવધાન થઈ શકે. રાઠોડે જણાવ્યું કે મહિલાઓ સાથે ઉત્પીડનના બનાવો ન બને તે માટે POSH સમિતિઓ નિયમિતપણે બેઠકો કરે છે. વિભાગ દરેક ડૉક્ટરની સુરક્ષા માટે આર્ટિફિશિયલ ઈન્ટેલિજન્સનો પણ ઉપયોગ કરી રહ્યું છે. ડૉકટરો માટે સેલ્ફ ડિફેન્સ ટ્રેનિંગ અને તબીબી વ્યાવસાયિકોના તેમના તણાવના સ્તર વિશે કાઉન્સેલિંગની પણ ચર્ચા કરવામાં આવી હતી.
