‘ખાસ ખબર’ની બ્લોકબસ્ટર ટેનિસ ક્રિકેટ ટુર્નામેન્ટનું ભવ્યાતિભવ્ય સમાપન

RAR રિબડા ‘કિંગ’, એકતા XI રનર્સ અપ

વિજેતા ટીમ આર.આર. રિબડાને રૂ.2,00,000 અને રનર્સ-અપ ટીમ એકતા XIને રૂ.1,00,000ના રોકડ પુરસ્કારો મહાનુભાવોના હસ્તે એનાયત કરાયા હતા

ખાસ-ખબર ન્યૂઝ રાજકોટ

રાજકોટના માધવરાવ સિંધિયા ક્રિકેટ ગ્રાઉન્ડ ખાતે તાજેતરમાં ’ખાસ ખબર’ દ્વારા આયોજિત ભવ્ય ’ખાસ ખબર કપ 2026’ રાત્રિપ્રકાશ ટેનિસ ક્રિકેટ ટૂર્નામેન્ટનો રોમાંચક ફિનાલે યોજાયો હતો. આ મેગા ફાઇનલ મુકાબલો આર.એ.આર. રિબડા અને એકતા ઇલેવન વચ્ચે ખેલાયો હતો, જેમાં આર.આર. રિબડાએ શાનદાર વિજય મેળવી ટ્રોફી પોતાના નામે કરી હતી. આ ફાઇનલ મેચમાં આંતરરાષ્ટ્રીય કક્ષાના અમ્પાયરો જેપી જાડેજા અને શૌકત સિપાહીએ સેવા આપી હતી. મેચ દરમિયાન ડ્રોન કેમેરા દ્વારા ખાસ કવરેજ કરવામાં આવ્યું હતું. ’ખાસ ખબર’ ના મેનેજિંગ ડિરેક્ટર પરેશભાઈ ડોડિયા અને તેમની ટીમના નેતૃત્વમાં આ ટુર્નામેન્ટનું આયોજન કરવામાં આવ્યું હતું. ફાઈનલ મેચમાં રાજકોટના ક્રિકેટપ્રેમીઓની જંગી મેદની ઉમટી પડી હતી. ઇનામ વિતરણ સમારોહમાં વિજેતા ટીમને ટ્રોફી અને રોકડ પુરસ્કાર આપી સન્માનિત કરવામાં આવ્યા હતા. 19 રાજ્યોના ખેલાડીઓની ભાગીદારી અને હજારો પ્રેક્ષકોની હાજરી સાથે આ ટુર્નામેન્ટ આંતરરાષ્ટ્રીય કક્ષાની બની રહી હતી. આમ, ’ખાસ ખબર કપ’ની આ બીજી સીઝન રાજકોટના સ્પોર્ટ્સ ઇતિહાસમાં એક યાદગાર સંભારણું બની રહી છે. મેચની શરૂઆતમાં ’એકતા ઇલેવન’ના કેપ્ટને ટોસ જીતીને પ્રથમ બેટિંગ કરવાનો નિર્ણય લીધો હતો. નિર્ધારિત 12 ઓવરની રમતમાં એકતા ઇલેવનની ટીમની શરૂઆત મધ્યમ રહી હતી. ટીમમાં ભાવિક ફિલિપ્સે આક્રમક બેટિંગ કરી હતી, પરંતુ આર.એ.આર. રિબડાના બોલરોએ ચોકસાઈપૂર્વક બોલિંગ કરીને રન ગતિ પર અંકુશ રાખ્યો હતો. એકતા ઇલેવને તેના નિર્ધારિત 12 ઓવરમાં 6 વિકેટ ગુમાવીને 98 રન બનાવ્યા હતા અને આર.આર. રિબડાને જીતવા માટે 99 રનનો લક્ષ્યાંક આપ્યો હતો. લક્ષ્યાંકનો પીછો કરવા ઉતરેલી આર.એ.આર. રિબડાની ટીમ તરફથી સ્ટાર પ્લેયર જગત સરકાર અને સરફરાજ બાહુબલીએ મેદાનના ચારેબાજુ ચોગ્ગા-છગ્ગાની રમઝટ બોલાવી હતી. ખાસ કરીને જગત સરકારે માત્ર 30 બોલમાં 65 રન ફટકારીને પ્રેક્ષકોને મંત્રમુગ્ધ કરી દીધા હતા. તેની આ આક્રમક ઈનિંગમાં 8 ગગનચુંબી છગ્ગા અને 2 ચોગ્ગાએ મેચનું પરિણામ ફેરવી દીધું હતું.