ઓગસ્ટ 2016માં શૂન્યથી શરૂ કરીને 23 ગણી તોતિંગ વૃદ્ધિ નોંધાવી
46.4% માર્કેટ શેર સાથે એરટેલ અને વોડાફોન-આઇડિયાને પછાડયા
- Advertisement -
દેશના અગ્રણી ઉદ્યોગગૃહ રિલાયન્સ ઇન્ડસ્ટ્રીઝની ટેલિકોમ પાંખ રિલાયન્સ જિયોએ પોતાના વ્યાવસાયિક લોન્ચિંગ બાદના માત્ર એક દાયકાના સમયગાળામાં ગુજરાતના વાયરલેસ ટેલિકોમ માર્કેટનું સંપૂર્ણ ચિત્ર બદલી નાખ્યું છે. ઓગસ્ટ ૨૦૧૬માં એક પણ ગ્રાહક વગર શરૂઆત કર્યા બાદ કંપનીએ પ્રથમ મહિનામાં એટલે કે સપ્ટેમ્બર ૨૦૧૬માં ૧૪.૬ લાખ સબસ્ક્રાઇબર્સ નોંધાવ્યા હતા. ત્યાંથી સતત વિસ્તરણ જાળવી રાખીને જૂન ૨૦૨૬ના અંત સુધીમાં કંપની ૩૩૫.૫ લાખ ગ્રાહકોના સર્વોચ્ચ શિખરે પહોંચી ગઈ છે. આ સમયગાળા દરમિયાન જિયોએ ૩૨૦.૯ લાખ ગ્રાહકોની ચોખ્ખી વૃદ્ધિ સાથે ૩૭.૯ ટકાનો તોતિંગ સરેરાશ વાર્ષિક વૃદ્ધિ દર (CAGR) નોંધાવ્યો છે. હાલ સમગ્ર ગુજરાત ટેલિકોમ સર્કલમાં નોંધાયેલા કુલ ૭૨૭.૦ લાખ વાયરલેસ કનેક્શન્સમાંથી એકલા જિયો પાસે ૪૬.૪ ટકાનો જંગી બજાર હિસ્સો છે. ટેલિકોમ ક્ષેત્રના વિશ્લેષણ મુજબ, જિયોએ ગ્રાહક સંખ્યામાં આશરે ૨૨.૯ ગણી અસાધારણ વૃદ્ધિ નોંધાવી છે. કંપનીએ જુલાઈ ૨૦૧૭માં ભારતી એરટેલને પાછળ છોડી દીધી હતી અને ત્યારબાદ ડિસેમ્બર ૨૦૨૦માં વોડાફોન-આઇડિયાને પણ પછાડીને ગુજરાત સર્કલમાં પ્રથમ ક્રમાંકનું માર્કેટ લીડર સ્થાન હાંસલ કર્યું હતું, જે આજ દિન સુધી અકબંધ છે. બીજી તરફ, અન્ય હરીફ કંપનીઓની સરખામણી કરીએ તો એરટેલના ગ્રાહકો ઓગસ્ટ ૨૦૧૬માં ૮૬.૮ લાખ હતા, જે જૂન ૨૦૨૬ સુધીમાં વધીને ૧૫૮.૪ લાખે પહોંચ્યા છે, જે ૬.૩ ટકાનો સામાન્ય વાર્ષિક વૃદ્ધિ દર દર્શાવે છે. જ્યારે વોડાફોન અને આઇડિયાના વિલીનીકરણ છતાં તેમનો સંયુક્ત ગ્રાહક આધાર ૩૧૬.૮ લાખથી ઘટીને ૨૦૦.૧ લાખ થઈ ગયો છે, જે એપ્રિલ ૨૦૧૮માં ૩૫૪.૮ લાખની સર્વોચ્ચ સપાટીએ હતો. સરકારી ટેલિકોમ કંપની ઇજાક પણ પીછેહઠ કરતી જોવા મળી છે, જેના ગ્રાહકો ૩૯.૮ લાખથી ઘટીને ૩૩.0 લાખે પહોંચી ગયા છે.
આ દાયકા દરમિયાન ગુજરાતના ટેલિકોમ ક્ષેત્રમાં જબરદસ્ત કોન્સોલિડેશન જોવા મળ્યું હતું. વર્ષ ૨૦૧૬માં કાર્યરત ટાટા, રિલાયન્સ કોમ્યુનિકેશન્સ, એરસેલ, ટેલિનોર અને વીડિયોકોન જેવા નાના-મોટા આઠથી વધુ ઓપરેટરો ધીમે-ધીમે સ્પર્ધામાંથી બહાર ફેંકાઈ ગયા હતા અને તેમનો ૧૭૫.૦ લાખ ગ્રાહકોનો સંયુક્ત આધાર ઘટીને શૂન્ય થઈ ગયો હતો. સમગ્ર ગુજરાતમાં વાયરલેસ ગ્રાહકોની સંખ્યા સપ્ટેમ્બર ૨૦૧૬માં ૬૩૩.૭ લાખથી વધીને જૂન ૨૦૨૬માં ૭૨૭.૦ લાખ થઈ છે. આમ, ૧૪.૭ ટકાના માર્કેટ ગ્રોથ વચ્ચે જિયોએ માત્ર અન્ય કંપનીઓના ગ્રાહકો જ પોતાના તરફ આકર્ષિત નથી કર્યા, પરંતુ છેવાડાના વિસ્તારો સુધી ડિજિટલ કનેક્ટિવિટીનો વ્યાપ પણ વધાર્યો છે.
