કોન્ટ્રાક્ટરોને ચૂકવવામાં આવતાં બિલની પ્રક્રિયા સોફ્ટવેર મારફત શરૂ
નાણાંકીય વર્ષ 2022-23ના રાજકોટ મહાનગરપાલિકાના બજેટમાં પેપરલેસ ઓફિસ એડમિનિસ્ટ્રેશન તરફ આગળ ધપાવી યોજના સામેલ કરવામાં આવેલી છે જેનું રાજકોટ મહાનગરપાલિકા દ્વારા અમલીકરણ શરૂ કરવામાં આવ્યું છે. હાલના તબક્કે મનપા દ્વારા કોન્ટ્રાક્ટરોને ચૂકવવામાં આવતાં બિલની પ્રક્રિયા સોફ્ટવેર મારફત શરૂ કરી દેવામાં આવી છે. આગામી દિવસોમાં અન્ય કામગીરીઓ પણ પેપરલેસ ઓફિસ રૂપી નવી વ્યવસ્થા હેઠળ આવરી લેવામાં આવશે. મનપાના આઈટી વિભાગ અને હિસાબી શાખાની જહેમતથી આ સોફ્ટવેર ઈનહાઉસ ડેવલપ કરવામાં આવ્યું છે તેમ મેયર ડો. પ્રદિપ ડવ, સ્ટેન્ડિંગ કમિટિના ચેરમેન પુષ્કરભાઈ પટેલ અને મ્યુનિ. કમિશનર અમિત અરોરાએ જણાવ્યું હતું.
વધુમાં રાજકોટ મહાનગરપાલિકાના જુદા-જુદા વિભાગો દ્વારા અરજદારો પાસેથી લેવામાં આવતા ડોક્યુમેન્ટસમાં એકસૂત્રતા જળવાઈ રહે તેમજ પેપરલેસ કામગીરી થઈ શકે તે હેતુથી ડિજીટલ ફોર્મમાં જુદા જુદા ડોક્યુમેન્ટ સચવાઈ રહે તે પ્રકારની વ્યવસ્થા ગોઠવવામાં આવશે. આ પ્રોજેક્ટ અંતર્ગત પ્રથમ પ્રોપર્ટી ટેક્સ, વોટર કનેકશન, પ્રોફેશનલ ટેક્સને આવરી લેવામાં આવશે તેમજ વહિવટી પારદર્શિતા વધે તે માટે મહાનગરપાલિકા દ્વારા તમામ વેન્ડરો તેમજ કોન્ટ્રાક્ટરોને કરવામાં આવતાં પેમેન્ટ્સની પ્રોસેસને પેપરલેસ કરવામાં આવશે.
- Advertisement -
રાજકોટ મહાનગરપાલિકા દ્વારા વહિવટી સુધારણાના ભાગરૂપે તેમજ પેપરલેસ ઓફીસ બનાવવા મહાનગરપાલિકાના કોન્ટ્રાક્ટરોને ચૂકવવામાં આવતા બિલની પ્રક્રિયાને સંપૂર્ણપણે પેપરલેસ બનાવવાનું નક્કી કર્યું છે. બ્રાન્ચ દ્વારા કોન્ટ્રાક્ટરના બીલ તેમજ અન્ય જરૂરી ડોક્યુમેન્ટ સોફ્ટવેરમાં અપલોડ થયા બાદ તેનું ઓડિટ પણ સોફ્ટવેરમાં ઓડિટ શાખા દ્વારા થશે. આ સોફ્ટવેરમાં સાથોસાથ કોન્ટ્રાક્ટર પણ પોતાના મહાનગરપાલિકાના ઈનવોઈસ મોબાઈલ એપ વડે અપલોડ કરી શકે તે પ્રકારની વ્યવસ્થા કરવામાં આવી છે.
