આવાસ યોજનાના મેનેજર સૂર્યપ્રતાપસિંહ લાજવાને બદલે ગાજે છે

આવાસ યોજનાનો ભ્રષ્ટાચાર ઢાંકવા પેનલ એડવોકેટને નોટિસ આપી દબાવવાનો પ્રયાસ

RMC પેનલ એડવોકેટએ RTI હેઠળ માહિતી માંગી તો મેનેજર સૂર્યપ્રતાપસિંહે સનદ રદ્દ કરાવવાની ધમકી આપ્યાનો આક્ષેપ

રાજકોટ મહાનગરપાલિકાની આવાસ યોજનામાં લાભાર્થીઓના નામે ગેરરીતિ અને કાનૂની અડચણો ઊભી કરવાના ગંભીર આક્ષેપો સામે આવ્યા છે. મનપાના પેનલ એડવોકેટ હીરલ જાની દ્વારા કરવામાં આવેલા ઘટસ્ફોટ મુજબ, આવાસ યોજના હેઠળ એક જ વ્યક્તિ લાભાર્થીના નામે બે-બે દસ્તાવેજો નોંધાયા હોવાનું ધ્યાને આવ્યું છે. પોતાની આ પ્રકારની ભૂલો અને ગેરરીતિઓ પર ઢાંકપિછોડો કરવા માટે વર્તમાન મેનેજર દ્વારા વકીલોને ટાર્ગેટ કરવામાં આવી રહ્યા હોવાનો આક્ષેપ થયો છે. પ્રાપ્ત વિગતો અનુસાર, લાભાર્થીઓના સગા સંબંધીઓ મારફતે વકીલો વિરુદ્ધ ખોટી અરજીઓ કરાવીને તેમની કાનૂની કામગીરીમાં અવરોધ ઊભો કરવાનો પ્રયાસ ચાલી રહ્યો છે. આવાસ યોજના વિભાગમાં આશરે ૪૫ જેટલા વકીલોની ટીમ કાર્યરત છે. ચર્ચા મુજબ, મેનેજર દ્વારા આ વકીલો પાસેથી બળજબરીપૂર્વક માફી પણ મંગાવવામાં આવી હોવાનું સામે આવ્યું છે, જેના કારણે કાનૂની વર્તુળોમાં ભારે નારાજગી વ્યાપી છે. સમગ્ર મામલે સત્ય બહાર લાવવા માટે એડવોકેટ હીરલ જાનીએ માહિતી અધિકાર (RTI) કાયદા હેઠળ અરજી દાખલ કરી છે. આ RTI અંતર્ગત કેટલા વકીલોને કારણ દર્શક નોટિસ આપવામાં આવી છે તેની સ્પષ્ટતા માંગવામાં આવી છે. આ ઉપરાંત નવેમ્બર ૨૦૨૪થી ફરજ બજાવતા મેનેજર સૂર્યપ્રતાપ સિંહની ભરતી પ્રક્રિયાના દસ્તાવેજો, તેમનું લિવિંગ સર્ટિફિકેટ, આધાર કાર્ડ તેમજ પાન કાર્ડ સહિતના મહત્વપૂર્ણ કાગળોની વિગતો પણ માંગવામાં આવી છે.
આરોપ મુજબ આ RTI અરજી પાછી ખેંચી લેવા માટે મેનેજર દ્વારા વકીલને દબાણ કરવામાં આવ્યું છે. આ માટે રાજકોટ મહાનગરપાલિકાના અધિકૃત લેટરપેડ અને સત્તાવાર જાવક નંબરનો ઉપયોગ કરીને એક પત્ર પાઠવવામાં આવ્યો હતો. તેમાં લાખો રૂપિયાનો માનહાનિનો દાવો માંડવાની તેમજ વકીલની સનદ રદ કરાવવાની ધમકી આપવામાં આવી હોવાનો ઉલ્લેખ છે. સમગ્ર મામલે વકીલોના મતે અંગત વિવાદ કે ધમકી આપવા માટે મહાનગરપાલિકાના સત્તાવાર લેટરપેડ અને જાવક નંબરનો ઉપયોગ કરવો એ સંપૂર્ણપણે ગેરકાયદેસર અને કાયદાકીય જોગવાઈઓનું ઉલ્લંઘન છે. આ સમગ્ર ઘટનાને પગલે મનપાના વહીવટી તંત્રમાં ખળભળાટ મચી ગયો છે.