જંત્રી દર વધારાથી સરકારને રૂા.3300 કરોડની આવક થશે

રાજ્યમાં 1 એપ્રિલથી નવા જંત્રીના દર અમલ બની જશે

બજેટમાં જંત્રી દર વધારાની અસર હજુ ધ્યાનમાં લેવાઈ નથી : સતાવાર નિર્ણય બાદ આવક અંદાજ સુધારાશે

ખાસ-ખબર ન્યૂઝ ગાંધીનગર
ગુજરાતમાં હવે નવા જંત્રી દરના તબકકાવાર અમલની તૈયારી છે અને રાજય સરકારે બજેટમાં પણ રીયલ એસ્ટેટ સંબંધી કોઈ મોટી રાહત આપી નથી તે સમયે રાજય સરકારની સ્ટેમ્પ ડયુટી અને રજીસ્ટ્રેશન આવકમાં 2025/26ના વર્ષમાં જંત્રી દર વધારવાના કારણે જંગી આવક વધારો થશે અને તે રૂા.3300 કરોડની કુલ આવક હશે.ખુદ રાજય સરકારના અધિકારીઓ માને છે કે જે આવક 2024/25ના વર્ષમાં રૂા.1650 કરોડની હતી. આમ સરકારની આવક ફકત જંત્રી દર વધારાથી ડબલ થઈ જશે. જો કે બજેટમાં આ પ્રકારે સ્ટેમ્પ ડયુટી રજીસ્ટ્રેશનની આવક રૂા.19800 કરોડની થશે તેવું દર્શાવાયુ છે. પણ આ અંગે અધિકારીઓ કહે છે કે બજેટ તૈયારી કરતા સમયે હાલના જંત્રીદર તથા રીયલ એસ્ટેટની વર્તમાન સ્થિતિ અને ટ્રેન્ડના આધારે અંદાજીત આવકનો આંકડો તૈયાર કરવામાં આવે છે. રાજય સરકારે નવી જંત્રીના સમય અંગે હજુ કોઈ આખરી નિર્ણય લીધો નથી. તેથી તેની અસર અંદાજીત આવકમાં દેખાય નહી તે સ્વાભાવિક છે અને જંત્રીદર વધારો નિશ્ચિત છે અને તેથી મહેસુલી આવકમાં તેની અસર પડશે અને અમારા હાલના અંદાજ કરતા તે અનેકગણી વધુ હશે. જંત્રીદર વધારા સામે વ્યાપક ઉહાપોહ થયા બાદ સરકારે તેમાં સુધારા-વધારા ટી-એસેસમેન્ટ વિ. માટે સૂચનો મંગાવ્યા હતા અને તે મળી ગયા છે. આમ ગુજરાત સરકાર બજેટ સત્રમાં વ્યસ્ત છે અને તે સંપન્ન થયા બાદ સંભવત: નવા નાણાકીય વર્ષ 1 એપ્રિલથી નવી જંત્રીનો અમલ શરૂ થઈ જશે અને જે નવા દર છે તેમાં મોટાભાગના રાજયના મહાનગરો અને જયાં ઝડપી વિકાસ છે ત્યાં અનેક ગણા નવા દર લાગુ પડશે. કયાંક તો 2000 ગણો વધારો છે અને સરકાર તબકકાવાર અમલમાં મુકે તો પણ જંત્રી દરના કારણે આચાર વધારો અધધ હશે તે નિશ્ચિત છે. હાલ 25% વધારો પછી દર વર્ષે 25% એટલે કે તે ડબલ થવા લાગશે અને તેથી સરકારને સતત આવક વધતી જ રહેશે.

10 વર્ષ જૂની સોસાયટીનું રજિસ્ટ્રેશન રદ્દ કરતી ‘રેરા’

2023માં પૂર્ણ કરવાનો પ્રોજેક્ટ હજુ ચાલુ હોવાનું દર્શાવાતું હતું: વેંચાણ- માર્કેટીંગ પર પ્રતિબંધ
ગાંધીનગર સ્થિત ગુજરાત રિયલ એસ્ટેટ રેગ્યુલેટરી ઓથોરિટી દ્વારા એક આદેશ પસાર કરીને સુરતની એક હાઉસીંગ સ્કીમનું રજીસ્ટ્રેશન તાત્કાલિક અસરથી સ્થગિત કરવાનો આદેશ કરીને આ સ્કીમ મુકનીર બિલ્ડરને કોઇપણ જાતનું બુકીંગ કે માર્કેટીંગ કરવા ઉપર પ્રતિબંધ લાગુ કરી દીધો છે. વધુ હુકમ ના થાય ત્યાં સુધી તા. 21 ફેબ્રુઆરીનો રોજ આવો આદેશ પસાર કરવામાં આવતા બિલ્ડર આલમમાં ચર્ચાનો મુદ્દો ઉભો થયો છે.કેસની વિગતો મુજબ રેરાના સચિવ એ. જે. દેસાઇ દ્વારા સહજાનંદ ઇન્ફ્રાસ્ટ્રક્ચર ભાગીદારી પેઢીના ભાગીદાર ભુમીનભાઇ રમેશભાઇ બુટણી તથા અન્યોને સંબોધીને પસાર કરવામાં આવેલા આદેશ મુજબ સુરતના કામરેજ વિસ્તારમાં આવેલા સહજાનંદ ગ્રીન સિટી નામનો પ્રોજેક્ટ રહેણાંક અને કોમર્શિયલ યુનિટ્સ માટે વર્ષ 2015માં મુકવામાં આવ્યો હતો. આ પ્રોજેક્ટની નોંધ રેરા સમક્ષ વર્ષ 2018માં કરવામાં આવી હતી. રેરાની વેબસાઇટ ઉપર આપવામાં આવેલી માહિતી મુજબ કુલ છ ટાવરમાં કુલ 571 યુનિટ્સ હતા. આજની તારીખમાં 407 યુનિટ અવેલેબલ છે.
પ્રોજેક્ટ પૂર્ણ તારીખ 30-09-2023ના રોજની છે પરંતુ હાલમાં વેબસાઇટ ઉપર હજુ ઓનગોઇંગ પ્રોજેક્ટ બતાવે છે.