ભારતમાં ચીનથી આવતા CCTV કેમેરા પર લાગી શકે છે પ્રતિબંધ

ઈઝરાયલનાં પેજર એટેક પછી ભારતની સતર્કતા

ખાસ-ખબર ન્યૂઝ નવી દિલ્હી, તા.2

લેબનોનમાં તાજેતરમાં પેજર અને વોકી-ટોકીમાં થયેલાં વિસ્ફોટ બાદ ભારત સરકાર પણ સતર્ક થઈ ગઈ છે. દેશમાં મોટી સંખ્યામાં ચાઈનીઝ સીસીટીવી લગાવવામાં આવ્યાં છે. આ સીસીટીવી કેમેરા અંગે સરકારે આદેશ જારી કર્યો છે.

સરકારે સીસીટીવી વેચનારા ચાઈનીઝ વેન્ડરોને દેશમાંથી હાંકી કાઢવાની વાત કરી હતી. કેન્દ્ર સરકાર તેનાં આદેશને તાત્કાલિક લાગુ કરવા પર વિચાર કરી રહી છે. જો આમ થશે તો ચીન માટે આ મોટો ફટકો હશે. સરકારનાં આ પગલાથી સ્થાનિક કંપનીઓને ફાયદો થવાની શક્યતા છે. સીસીટીવી કેમેરા અંગે સરકારની નીતિ 8 ઓક્ટોબરથી અમલમાં આવે તેવી શક્યતા છે. આ પોલિસીના અમલ બાદ તમામ ચીની કંપનીઓ અને સેલર્સ આ સેક્ટરમાંથી બહાર થઈ જશે. આ પછી ભારતીય કંપનીઓને આ ક્ષેત્રમાં તકો મળવાની શક્યતા છે લેબનોનમાં વિસ્ફોટો બાદ ભારતે પણ પોતાનું ધ્યાન સુરક્ષા પર કેન્દ્રિત કર્યું છે. સીસીટીવી મામલે સરકારે આ વર્ષે માર્ચ અને એપ્રિલમાં ગેજેટ નોટિફિકેશન બહાર પાડ્યું હતું.

જો કે લેબનોનમાં થયેલાં વિસ્ફોટો બાદ સરકારે આમાં ઝડપ બતાવી છે. સરકાર સીસીટીવી કેમેરા અંગેની માર્ગદર્શિકાના અમલીકરણને ઝડપી બનાવવા તૈયાર છે. ફક્ત તે જ કંપનીઓને ભારતમાં તેને વેચવાની મંજૂરી આપવામાં આવશે જે વિશ્ર્વસનીય છે.

સૂત્રના જણાવ્યાં પ્રમાણે સરકારનું આ પગલું વિસ્ફોટને લઈને ઓછું અને ડેટા લીક થવાને લઈને વધુ છે. સંવેદનશીલ સ્થળોએ પણ સીસીટીવી કેમેરા લગાવવામાં આવ્યાં છે. આવી સ્થિતિમાં આ સીસીટીવી કેમેરામાંથી આ સ્થળોનો ડેટા પણ લીક થવાની સંભાવના છે.
સરકાર હવે ’મેક-ઈન-ઈન્ડિયા’ ઉત્પાદનો બનાવવા પર ભાર આપી રહી છે. ગેજેટ નોટિફિકેશનમાં ઉલ્લેખ કરવામાં આવ્યો છે કે સીસીટીવી કેમેરા ફક્ત ભારતમાં જ બનાવવા જોઈએ.