આજથી કોમર્શિયલ સિલિન્ડર સસ્તો થયો : નાયરાએ પેટ્રોલના ભાવ રૂ.5, ડીઝલના રૂ.3 ઘટાડ્યા

સામાન્ય પાસપોર્ટની ફી રૂ.1,500 થી વધીને રૂ.2,500 થઈ ગઈ

એક વાહનમાં એક દિવસમાં માત્ર 200 લિટર ડીઝલ ભરવાની મર્યાદા સમાપ્ત થઈ ગઈ

કોમર્શિયલ સિલિન્ડર આજે એટલે કે 1 જુલાઈથી સરેરાશ 180 રૂપિયા સસ્તો થયો છે. દિલ્હીમાં તે રૂ.2930 માં મળી રહ્યો છે. જ્યારે હવે પેટ્રોલ પંપ પર એક વાહનમાં એક દિવસમાં માત્ર 200 લિટર ડીઝલ ભરવાની મર્યાદા સમાપ્ત થઈ ગઈ છે. આ ઉપરાંત, હવે પાસપોર્ટ બનાવવો અથવા રી-ઇશ્યુ કરાવવો મોંઘો થઈ ગયો છે. સામાન્ય પાસપોર્ટની ફી રૂ.1,500 થી વધીને રૂ.2,500 થઈ ગઈ છે.

જુલાઈમાં થનારા 7 મોટા ફેરફારો

1. કોમર્શિયલ ગેસ સિલિન્ડર સરેરાશ 180 રૂપિયા સસ્તો : તેલ કંપનીઓએ કોમર્શિયલ ગેસ સિલિન્ડર સરેરાશ રૂ.180 રૂપિયા સુધી સસ્તો કર્યો છે. દિલ્હીમાં તેની કિંમત રૂ.2930 થઈ ગઈ છે. પહેલા તે રૂ.3113.50માં મળતો હતો. કોમર્શિયલ સિલિન્ડરના ભાવ ઘટવાથી રેસ્ટોરન્ટ માલિકોનો ખર્ચ ઘટશે. આવા સંજોગોમાં તેઓ ચા, નાસ્તો અને થાળી સસ્તા કરી શકે છે. લગ્નોની કેટરિંગ પણ સસ્તી થઈ શકે છે. જો કે 14 કિલોના ઘરેલુ સિલિન્ડરના ભાવમાં કોઈ ફેરફાર નથી.

2. ડીઝલના વેચાણ પરની મર્યાદા 1 જુલાઈથી હટાવાઈ : હવે પેટ્રોલ પંપ પર એક વાહનમાં એક દિવસમાં માત્ર 200 લિટર ડીઝલ ભરવાની મર્યાદા સમાપ્ત થઈ ગઈ છે, એટલે કે હવે તમે તમારા વાહનમાં જેટલું ઈચ્છો તેટલું ડીઝલ ભરાવી શકશો. આ સાથે ફેક્ટરીઓ અને કોમર્શિયલ ખરીદદારો પર લાદવામાં આવેલો પ્રતિબંધ પણ હટાવી દેવામાં આવ્યો છે. પેટ્રોલિયમ મંત્રાલયે 11 જૂને પેટ્રોલ-ડીઝલની અછતને કારણે આ પ્રતિબંધો લગાવ્યા હતા, જે સપ્લાય સુધર્યા બાદ 29 જૂનના નવા આદેશ દ્વારા પાછા ખેંચી લેવામાં આવ્યા છે. છેલ્લા 18 દિવસથી મોટા ગ્રાહકો માત્ર બલ્ક સેલ પોઈન્ટ્સ પરથી જ ઈંધણ ખરીદી રહ્યા હતા. આ નિર્ણયથી સામાન્ય વાહનચાલકો, ટ્રાન્સપોર્ટર્સ અને મોટા કોમર્શિયલ ખરીદદારો તેમની જરૂરિયાત મુજબ જેટલું ઇચ્છે તેટલું ડીઝલ સીધા પેટ્રોલ પંપ પરથી ભરાવી શકશે. આ ઉપરાંત, છેલ્લા 18 દિવસથી ફેક્ટરીઓ અને મોટા ગ્રાહકોને થતી ઇંધણની મુશ્કેલી પણ સમાપ્ત થઈ જશે.

3. પાસપોર્ટ બનાવવો મોંઘો થયો : કેન્દ્ર સરકારે પાસપોર્ટની ફીમાં વધારો કર્યો છે, જે 1 જુલાઈથી લાગુ થઈ ગયો છે. આ પહેલા 2012માં પાસપોર્ટની ફી વધારવામાં આવી હતી. એટલે કે 14 વર્ષ પછી આ વધારો થયો છે. હવે નવો પાસપોર્ટ બનાવનારા અથવા જૂના પાસપોર્ટને ફરીથી ઇશ્યૂ કરાવનારા નાગરિકોના ખિસ્સા પર સીધી અસર પડશે અને તેમને રૂ.1,000 થી લઈને રૂ.2,000 સુધી વધુ ખર્ચ કરવા પડશે.

4. ટ્રેનમાં ટિકિટ વગર મુસાફરી કરવા પર બમણો દંડ ભરવો પડશે : રેલવે મંત્રાલયે ટ્રેનમાં ટિકિટ વગર મુસાફરી કરવા પર લાગતા લઘુત્તમ દંડને રૂ.250 થી વધારીને રૂ.500 કરી દીધો છે. હવે પકડાઈ જવા પર મુસાફરને ટિકિટના વાસ્તવિક ભાડા સાથે ઓછામાં ઓછા રૂ.500નો ચાર્જ ચૂકવવો પડશે. આ ઉપરાંત, મામલો મેજિસ્ટ્રેટ કોર્ટમાં જવા અને દોષિત ઠરવા પર વધુમાં વધુ 6 મહિનાની જેલ, રૂ.1,000નો દંડ અથવા બંને સજાઓ થઈ શકે છે. ટિકિટ વગર મુસાફરી કરનારા મુસાફરોની ખિસ્સા પર હવે બમણો બોજ પડશે. ઉદાહરણ તરીકે, જો ચેકિંગ પોઈન્ટ સુધીનું વાસ્તવિક ભાડું રૂ.150 છે જે મુજબ પહેલાં (જૂના નિયમ મુજબ) ભાડું રૂ.150 + દંડ રૂ.250 = કુલ રૂ.400 ચૂકવવા પડતા હતા. હવે (નવા નિયમ મુજબ) ભાડું રૂ.150 + દંડ રૂ.500 = કુલ રૂ.650 ચૂકવવા પડશે.

5. પેટ્રોલ રૂ.5 અને ડીઝલ રૂ.3 રૂપિયા સસ્તું થયું : પ્રાઇવેટ ફ્યુઅલ રિટેલર કંપની નાયરા એનર્જીએ પેટ્રોલ 5 રૂપિયા પ્રતિ લિટર અને ડીઝલ 3 રૂપિયા પ્રતિ લિટર સસ્તું કર્યું છે. છેલ્લા બે વર્ષથી વધુ સમયમાં આ પહેલીવાર છે જ્યારે કોઈ કંપનીએ દેશમાં પેટ્રોલ-ડીઝલના ભાવ ઘટાડ્યા છે. ખરેખરમાં, પશ્ચિમ એશિયા (મિડલ ઈસ્ટ) માં તણાવ ઓછો થવાને કારણે આંતરરાષ્ટ્રીય બજારમાં ક્રૂડ ઓઈલની કિંમતો નીચે આવી છે, જેના પછી કંપનીએ આ નિર્ણય લીધો છે.

6. આધાર કાર્ડમાં ફ્રી અપડેટ : UIDAI એ 1 જુલાઈથી આધાર કાર્ડ પર ઈમેલ એડ્રેસ અપડેટ કરાવવા માટે લાગતી રૂ.75 ની ફી હટાવી દીધી છે. આ સેવા આગામી છ મહિના એટલે કે 31 ડિસેમ્બર, 2026 સુધી મફત રહેશે. આ સમયમર્યાદા સમાપ્ત થયા પછી જ ફરીથી ચાર્જ લેવામાં આવશે. આ નિર્ણયથી તે કરોડો નાગરિકોને સીધી રાહત મળશે જેઓ પોતાના આધારમાં ઈમેલ આઈડી લિંક અથવા અપડેટ કરાવવા માંગે છે. હવે તેઓ કોઈપણ વધારાના શુલ્ક વિના ઓનલાઈન અથવા નિર્ધારિત કેન્દ્રો દ્વારા પોતાનું ઈમેલ એડ્રેસ મફતમાં અપડેટ કરાવી શકશે.

7. કાર ખરીદવી આજથી મોંઘી : મોટાભાગની ઓટોમોબાઈલ કંપનીઓએ 1 જુલાઈથી પોતાના વાહનોની કિંમતોમાં વધારો કરવાનો નિર્ણય કર્યો છે. આ અંતર્ગત કિયા ઇન્ડિયાએ પોતાના તમામ વાહનોની રેન્જમાં 2% સુધીનો વધારો કર્યો છે, જ્યારે ટાટા મોટર્સ કિંમતોમાં 1.5% સુધીનો વધારો કરવા જઈ રહી છે. 1 જુલાઈથી નવી કાર ખરીદનારા ગ્રાહકોના ખિસ્સા પર બોજ વધશે અને તેમને પહેલા કરતા વધુ કિંમત ચૂકવવી પડશે. ટાટા મોટર્સના વાહનો પસંદ કરતા ગ્રાહકો માટે હવે પરંપરાગત ફ્યુઅલ ગાડીઓ સાથે ઇલેક્ટ્રિક કાર ખરીદવી પણ મોંઘી પડશે.