સાવધાન : મોંઘા ઇન્જેકશનની સસ્તી નકલ, જીવ સાથેનો ખતરનાક ખેલ બહાર આવ્યો

ફિટનેસના નામે ફ્રોડ

યુટ્યુબ પરથી વિડીયો જોઇ વજન ઘટાડવાના નકલી ઇન્જેકશન તૈયાર કર્યા 

હરિયાણાના ગુરુગ્રામમાં રહેતા અને બીબીએ ડ્રોપઆઉટ યુવકે ફલેટને જ લેબ બનાવી દીધી

ચીનથી કાચો માલ મંગાવી ઑનલાઇન પ્લેટફોર્મથી દેશભરમાં થતું હતું વેચાણ

ડ્રગ વિભાગની કાર્યવાહી દરમિયાન નકલી ઇન્જેકશન નેટવર્કનો થયો પર્દાફાશ

ખાસ-ખબર ન્યૂઝ નવી દિલ્હી

હરિયાણાના ગુરુગ્રામના સેક્ટર 62 વિસ્તારમાં એક ચોંકાવનારો કિસ્સો સામે આવ્યો છે, જ્યાં એક યુવાને પોતાના ફલેટને જ નકલી ઇન્જેકશન બનાવવાની લેબમાં ફેરવી નાખી હતી. માહિતી મુજબ, બીબીએ ડ્રોપઆઉટ યુવક અવિ શર્મા યુટ્યુબ પર વીડિયો જોઇને વજન ઘટાડવા માટે વપરાતા મોંઘાદાટ ઇન્જેકશનના નકલી વર્ઝન તૈયાર કરતો હતો અને તેને દેશભરમાં વેચતો હતો. પ્રાથમિક તપાસમાં જાણવા મળ્યું છે કે હાઇપ્રોફાઇલ લોકો, સેલિબ્રિટીઝ તેમજ ડાયાબીટીસ અને વજન ઘટાડવા માટે વપરાતા મોનજેરો જેવા ઇન્જેકશનનું નકલી રૂપ આ યુવક બનાવતો હતો. આ ઇન્જેકશન બજારમાં અસલી કરતા ઘણાં સસ્તા ભાવે ઉપલબ્ધ કરાતા હતા, જે ગ્રાહકો માટે આકર્ષણનું કેન્દ્ર બનતા હતા.
આરોપી ચીનમાંથી કાચો માલ મંગાવી રહ્યો હતો અને અલીબાબા મારફતે ઓર્ડર આપતો હતો. ત્યારબાદ તૈયાર ઇન્જેકશનને ઇન્ડિયા માર્ટ જેવા ઓનલાઇન પ્લેટફોર્મ પર વેચાણ માટે મૂકી દેશભરમાં સપ્લાય કરવામાં આવતા હતા. આ સમગ્ર કામગીરી કોઈપણ પ્રકારના કાયદેસર લાઇસન્સ વગર ચાલી રહી હતી. હૈદરાબાદમાં સપ્લાય થયેલા શંકાસ્પદ ઇન્જેકશનના આધારે ડ્રગ વિભાગ સક્રિય બન્યો અને તપાસ શરૂ કરી. દરોડા દરમિયાન ફ્લેટમાંથી નકલી ઇન્જેકશન બનાવવાની સંપૂર્ણ વ્યવસ્થા મળી આવી, જેનાથી અધિકારીઓ પણ ચોંકી ઉઠ્યા.
ડ્રગ ક્ધટ્રોલર અમનદીપસિંહ ચૌહાણે જણાવ્યું કે તપાસ દરમિયાન જાણવા મળ્યું કે ઇન્જેકશનમાં ઉપયોગ થતી પેન અને અન્ય સાધનો ચીનમાંથી મંગાવવામાં આવ્યા હતા. કોઈપણ પ્રકારની મેડિકલ મંજૂરી વગર આ પ્રકારની દવાઓ બનાવવી અને વેચવી ગંભીર ગુનો છે. આ ઘટના એ ગંભીર ચેતવણી સમાન છે કે સસ્તા ભાવે ઓનલાઇન મળતી દવાઓ તમારા આરોગ્ય માટે જીવલેણ સાબિત થઈ શકે છે. નિષ્ણાતોનો મત છે કે દવાઓ હંમેશા પ્રમાણિત સ્ત્રોતમાંથી જ ખરીદવી જોઈએ અને ડોક્ટરની સલાહ વિના તેનો ઉપયોગ ટાળવો જોઈએ. આ સમગ્ર બનાવ ફરી એકવાર એ પ્રશ્ન ઊભો કરે છે કે ઓનલાઇન દવા ખરીદતી વખતે લોકો કેટલી સાવચેત છે? નિષ્ણાતો અને આરોગ્ય વિભાગે લોકોને અપીલ કરી છે કે તેઓ માત્ર પ્રમાણિત ફાર્મસી અથવા ડોક્ટરની સલાહથી જ દવાઓ ખરીદે અને અજાણ્યા સ્ત્રોતો પરથી મળતી સસ્તી ઓફરોથી દૂર રહે. સરકાર અને ડ્રગ નિયામક વિભાગ માટે પણ આ ઘટના એક ચેતવણી સમાન છે કે ઓનલાઇન પ્લેટફોર્મ પર વેચાતી દવાઓ પર વધુ કડક નજર રાખવાની જરૂર છે, જેથી આવી ગેરકાયદેસર પ્રવૃત્તિઓને સમયસર અટકાવી શકાય.

સસ્તું ઇન્જેકશન, ભારે જોખમ : નકલી દવાઓથી જીવ પર સંકટ

વિશેષજ્ઞોના મતે નકલી દવાઓમાં ઉપયોગમાં લેવાતા ઘટકો ઘણી વખત અસુરક્ષિત હોય છે, જેના કારણે શરીર પર ગંભીર પ્રતિક્રિયાઓ થઈ શકે છે. આવી દવાઓ લેવાથી સાઇડ ઇફેક્ટ્સ વધે છે, મહત્વપૂર્ણ અંગો પર નુકસાન થઈ શકે છે અને ગંભીર સ્થિતિમાં જીવ ગુમાવવાનો ભય પણ ઉભો થાય છે. સસ્તી કિંમત અને સરળ ઉપલબ્ધતા લોકોને આકર્ષે છે, પરંતુ આકર્ષણ પાછળ મોટું જોખમ છુપાયેલું હોય છે. આરોગ્ય નિષ્ણાતો ચેતવણી આપે છે કે પ્રમાણિત સ્ત્રોત સિવાયથી દવા ખરીદવી કે ડોક્ટરની સલાહ વિના તેનો ઉપયોગ કરવો જોખમી સાબિત થઈ શકે છે.