મોરબીમાં ઠેર ઠેર રખડતા ઢોરનો અડિંગો

ખાસ-ખબર સંવાદદાતા
ગુજરાતમાં છેલ્લા ઘણા સમયથી રખડતા ઢોર અને પશુઓનો ત્રાસ વધુ જોવા મળી રહ્યો છે અને તેનો ભોગ સામાન્ય જનતા બની રહી છે. ઘણા કિસ્સામાં તો રખડતા ઢોરના ત્રાસને કારણે લોકોએ જીવ પણ ગુમાવવો પડ્યો છે ત્યારે મોરબીનું તાલુકા સેવા સદન ઢોરવાડામાં ફેરવાયું હોય તેવા દ્રશ્યો સામે આવ્યા છે જેમાં સેવા સદનમાં રખડતા ઢોરનું રાજ જોવા મળી રહ્યું છે જેથી ઢોરનો ત્રાસમાંથી મુક્ત કરવા તાલુકા સેવાસદનમાં સિક્યુરિટી મુકવાની સામાજિક કાર્યકરે માંગ ઉઠાવી છે.

મોરબીના સામાજિક કાર્યકર મહાદેવભાઈ ગોહિલે તંત્રને અપીલ કરતા જણાવ્યું હતું કે, મોરબી તાલુકા સેવાસદન લોકોની સમસ્યા હલ કરવાનું કેન્દ્ર છે કે, પાંજરાપોળ ? મોરબી તાલુકા સેવા સદન જાણે ખુલ્લી બજાર હોય તેમ અંદર ત્રણથી ચાર આખલા આમ તેમ આંટા મારી રહ્યા છે. ખાસ કરીને રજાના દિવસોમાં સેવા સદન રામભરોસે હોય છે જેના કારણે અહીંયા ખુંટીયા તેમજ રખડતા શ્વાન જોવા મળે છે એટલું જ નહીં પરંતુ ચાલુ દિવસો દરમિયાન પણ ખુટીયા તથા શ્વાનનો ત્રાસ રહે છે જેથી સેવા સદનમાં આવતા નગરજનો અને અરજદારોને ભારે મુશ્કેલીનો સામનો કરવો પડે છે જેથી રખડતા ઢોરના ત્રાસ મુદ્દે યોગ્ય કાર્યવાહી કરવામાં આવે અને મોરબીની પ્રજાનું રક્ષણ કરવામાં આવે તેવી માંગ કરવામાં આવી છે.

રખડતા ઢોરથી લમ્પી વાયરસ વધુ પ્રસરવાની ભીતિ
રાજયમાં લમ્પી વાયરસનો કહેર છે. હજારો પશુઓ તેનો શિકાર બની રહ્યા છે. પશુઓમાં લમ્પી વાયરસ એક બીજાના સંપર્કમાં આવવાથી ફેલાતો હોય છે ત્યારે આ રખડતા પશુ દિવસ દરમિયાન બીજા અનેક પશુના સંપર્કમાં આવતા હોય છે તે દરમિયાન આ રીતે માર્ગો પર ઢોર જ્યાં ત્યાં રખડતા હોય સ્વસ્થ ગૌવંશ અને ગાયો પણ લમ્પી વાયરસનો શિકાર થશે અને ચેપ વધુ પ્રમાણમાં ફેલાઈ શકે છે.