આંતરરાષ્ટ્રીય હેન્ડબોલમાં સૌરાષ્ટ્ર યુનિવર્સિટીનો ગૌરવવંતો ઇતિહાસ
બાંગ્લાદેશમાં યોજાયેલી IHF ટ્રોફી એશિયા ઝોન-2 જુનિયર મેન્સ હેન્ડબોલ ચેમ્પિયનશિપમાં ભારતીય ટીમની ઐતિહાસિક જીતમાં નોંધપાત્ર યોગદાન
- Advertisement -
ખાસ ખબર ન્યૂઝ રાજકોટ
સૌરાષ્ટ્ર યુનિવર્સિટી માટે વધુ એક ગૌરવપૂર્ણ અને ઐતિહાસિક ક્ષણ સર્જાઈ છે. સૌરાષ્ટ્ર યુનિવર્સિટી સાથે સંલગ્ન લીંબડી સ્થિત સખીદા આર્ટ્સ એન્ડ કોમર્સ કોલેજમાં સેમેસ્ટર-3માં અભ્યાસ કરતા પ્રતિભાશાળી હેન્ડબોલ ખેલાડી ભાવેશ બાબુભાઈ તાવિયાએ આંતરરાષ્ટ્રીય કક્ષાએ ભારતનું સફળ પ્રતિનિધિત્વ કરીને ગોલ્ડ મેડલ જીત્યો છે. તેમની આ સિદ્ધિથી સમગ્ર ગુજરાત તેમજ સૌરાષ્ટ્ર યુનિવર્સિટીનું નામ આંતરરાષ્ટ્રીય સ્તરે ગૌરવપૂર્ણ બન્યું છે. ગુજરાત રાજ્યમાંથી એકમાત્ર ખેલાડી તરીકે ભાવેશ તાવિયાની ભારતીય જુનિયર મેન્સ હેન્ડબોલ ટીમમાં પસંદગી કરવામાં આવી હતી. સ્પર્ધા પહેલાં ઉત્તરાખંડમાં યોજાયેલા 10 દિવસીય રાષ્ટ્રીય કોચિંગ કેમ્પમાં તેણે ઉત્કૃષ્ટ પ્રદર્શન કરીને ભારતીય ટીમમાં પોતાનું સ્થાન મજબૂત બનાવ્યું હતું. ત્યારબાદ 10થી 14 જૂન, 2026 દરમિયાન બાંગ્લાદેશના ઢાકામાં યોજાયેલી IHF ટ્રોફી એશિયા ઝોન-2 જુનિયર મેન્સ હેન્ડબોલ ચેમ્પિયનશિપમાં ભારતીય ટીમે શાનદાર રમત દાખવી ચેમ્પિયન બનવાનો ગૌરવ મેળવ્યો હતો. સમગ્ર ટુર્નામેન્ટ દરમિયાન ભારતીય ટીમે ઉત્તમ પ્રદર્શન કરીને ગોલ્ડ મેડલ પોતાના નામે કર્યો હતો. આ ઐતિહાસિક વિજયમાં ભાવેશ તાવિયાનું યોગદાન નોંધપાત્ર રહ્યું હતું.
ભાવેશ હાલમાં લીંબડીની સખીદા આર્ટ્સ એન્ડ કોમર્સ કોલેજમાં અભ્યાસ કરી રહ્યો છે. કોલેજના શારીરિક શિક્ષણના અધ્યાપક ડૉ. વિપુલ પરમારના માર્ગદર્શન હેઠળ તેણે સતત પોતાની રમતને વધુ મજબૂત બનાવી છે અને રાજ્યથી લઈને આંતરરાષ્ટ્રીય સ્તર સુધી સફળતાની નવી ઊંચાઈઓ સર કરી છે. આ વર્ષે સૌરાષ્ટ્ર યુનિવર્સિટીની હેન્ડબોલ ટીમના સભ્ય તરીકે ભાવેશે AIU વેસ્ટ ઝોન આંતર-યુનિવર્સિટી હેન્ડબોલ સ્પર્ધામાં બ્રોન્ઝ મેડલ જીતવામાં મહત્વપૂર્ણ ભૂમિકા ભજવી હતી. ત્યારબાદ જયપુર ખાતે યોજાયેલી AIU ઓલ ઇન્ડિયા આંતર-યુનિવર્સિટી હેન્ડબોલ સ્પર્ધામાં સૌરાષ્ટ્ર યુનિવર્સિટીની ટીમે સમગ્ર દેશમાં ચોથું સ્થાન મેળવી નવો ઇતિહાસ રચ્યો હતો. આ બંને સ્પર્ધાઓમાં ભાવેશના ઉત્કૃષ્ટ પ્રદર્શનની વ્યાપક પ્રશંસા થઈ હતી.
- Advertisement -
ભાવેશ છેલ્લા ઘણા વર્ષોથી S.A.G. ગુજરાત હેન્ડબોલ એકેડમીમાં સી.પી. સર અને પ્રવીણ સરના માર્ગદર્શન હેઠળ નિયમિત તાલીમ મેળવી રહ્યો છે. ઉપરાંત સૌરાષ્ટ્ર યુનિવર્સિટીની હેન્ડબોલ ટીમના કોચ ડૉ. ભાવેશ રાબા અને રાહુલભાઈના માર્ગદર્શન હેઠળ મળેલી તાલીમ અને વિવિધ રાષ્ટ્રીય સ્પર્ધાઓનો અનુભવ તેને આંતરરાષ્ટ્રીય મંચ સુધી પહોંચાડવામાં મહત્વપૂર્ણ સાબિત થયો છે. સૌરાષ્ટ્ર યુનિવર્સિટીમાં રમતગમત ક્ષેત્રે સતત વધી રહેલી સફળતાઓ પાછળ કુલપતિ ડૉ. ઉત્પલ જોશીના દુરંદેશી નેતૃત્વ અને ખેલાડી-કેન્દ્રિત અભિગમને મહત્વપૂર્ણ માનવામાં આવે છે. યુનિવર્સિટી દ્વારા ખેલાડીઓને આધુનિક તાલીમ, ગુણવત્તાસભર રમતગમત સુવિધાઓ અને સતત પ્રોત્સાહન આપવામાં આવતાં આજે યુનિવર્સિટીના ખેલાડીઓ રાષ્ટ્રીય તેમજ આંતરરાષ્ટ્રીય સ્તરે સતત પોતાની પ્રતિભાનો પરિચય આપી રહ્યા છે.
ખાસ નોંધનીય બાબત એ છે કે આ વર્ષે આંતરરાષ્ટ્રીય કક્ષાએ ભારતનું પ્રતિનિધિત્વ કરનાર સૌરાષ્ટ્ર યુનિવર્સિટીનો ભાવેશ તાવિયા પાંચમો ખેલાડી બન્યો છે. સાથે જ આંતરરાષ્ટ્રીય હેન્ડબોલમાં ભારતનું પ્રતિનિધિત્વ કરનાર સૌરાષ્ટ્ર યુનિવર્સિટીના પ્રથમ પુરુષ ખેલાડીઓમાં તેનું નામ ગૌરવપૂર્વક નોંધાયું છે. આ સિદ્ધિ સમગ્ર યુનિવર્સિટી પરિવાર માટે ગર્વની બાબત બની છે. ભાવેશ તાવિયાની આ ઐતિહાસિક સિદ્ધિ બદલ કુલપતિ ડૉ. ઉત્પલ જોશી, રજિસ્ટ્રાર અજયસિંહ જાડેજા, ઇન્ચાર્જ શારીરિક શિક્ષણ નિયામક ડૉ. હરીશ રાબા તેમજ યુનિવર્સિટીના તમામ શારીરિક શિક્ષણના અધ્યાપકોએ અભિનંદન પાઠવ્યા હતા. શુભેચ્છા સંદેશમાં કુલપતિએ વિશ્વાસ વ્યક્ત કર્યો હતો કે ભાવેશ આવનારા સમયમાં પણ આંતરરાષ્ટ્રીય કક્ષાએ વધુ મોટી સિદ્ધિઓ હાંસલ કરીને ભારત, ગુજરાત અને સૌરાષ્ટ્ર યુનિવર્સિટીનું નામ વધુ ગૌરવશાળી બનાવશે.
ખેલાડી: ભાવેશ બાબુભાઈ તાવિયા
કોલેજ : સખીદા આર્ટ્સ એન્ડ કોમર્સ કોલેજ, લીંબડી (સૌરાષ્ટ્ર યુનિવર્સિટી સંલગ્ન)
અભ્યાસ : સેમેસ્ટર-3
રમત : હેન્ડબોલ
સિદ્ધિ : IHF ટ્રોફી એશિયા ઝોન-2 જુનિયર મેન્સ હેન્ડબોલ ચેમ્પિયનશિપમાં ભારત માટે ગોલ્ડ મેડલ
સ્પર્ધા : ઢાકા, બાંગ્લાદેશ
સમય : 10થી 14 જૂન, 2026
વિશેષતા : ગુજરાતમાંથી ભારતીય જુનિયર મેન્સ હેન્ડબોલ ટીમમાં પસંદ થયેલો એકમાત્ર ખેલાડી
અગાઉની સિદ્ધિઓ : AIU વેસ્ટ ઝોન આંતર-યુનિવર્સિટી હેન્ડબોલ સ્પર્ધામાં બ્રોન્ઝ મેડલ અને AIU ઓલ ઇન્ડિયા આંતર-યુનિવર્સિટી સ્પર્ધામાં સૌરાષ્ટ્ર યુનિવર્સિટીને ચોથું સ્થાન અપાવવામાં મહત્વનું યોગદાન
તાલીમ : S.A.G. ગુજરાત હેન્ડબોલ એકેડમી તેમજ સૌરાષ્ટ્ર યુનિવર્સિટીના કોચિંગ હેઠળ સતત તૈયારી
ઐતિહાસિક નોંધ : આંતરરાષ્ટ્રીય કક્ષાએ ભારતનું પ્રતિનિધિત્વ કરનાર સૌરાષ્ટ્ર યુનિવર્સિટીનો આ વર્ષનો પાંચમો ખેલાડી તેમજ આંતરરાષ્ટ્રીય હેન્ડબોલમાં ભારતનું પ્રતિનિધિત્વ કરનાર યુનિવર્સિટીના પ્રથમ પુરુષ ખેલાડીઓમાં સ્થાન.
