બાબા રામદેવ અને આચાર્ય બાલકૃષ્ણની મુશ્કેલી ઓછી થવાનું નામ નથી લેતી, સુપ્રીમકોર્ટ આકરા પાણીએ

યોગ ગુરુ બાબા રામદેવની કંપની પતંજલિ આયુર્વેદ દ્વારા જાહેર ખબરોમાં કરાયેલા દાવા અંગે સુપ્રીમ કોર્ટે કેન્દ્ર સરકારને પણ નોટિસ ફટકારી હતી. આ અંગે જવાબ આપતા કેન્દ્રએ કહ્યું છે કે કોઈપણ વ્યક્તિ પોતાની ઈચ્છા મુજબ આયુષ અથવા એલોપેથીની સારવાર લઈ શકે છે. બંને સિસ્ટમમાં જોડાયેલા લોકો માટે એકબીજાને દોષી ઠેરવવા અને નીચા દેખાડવા યોગ્ય નથી. બાબા રામદેવ અને તેમના સહયોગી આચાર્ય બાલકૃષ્ણને આજે ફરી કોર્ટમાં હાજર થયા હતા અને બંનેએ મંગળવારે સાંજે ફરી એકવાર માફી માંગી હતી. ઉલ્લેખનીય છે કે બાબા રામદેવ અને આચાર્ય બાલકૃષ્ણની મુશ્કેલી ઓછી થવાનું નામ નથી લઈ રહી. પતંજલિ આયુર્વેદની ભ્રામક જાહેરાતોના કેસને લઈને સુપ્રીમકોર્ટમાં આજે ફરી સુનાવણી હાથ ધરવામાં આવી હતી. જેમાં સુપ્રીમકોર્ટે બાબા રામદેવ અને આચાર્ય બાલકૃષ્ણને આકરી ફટકાર લગાવી હતી. કોર્ટે રામદેવની માફીને ફગાવતાં કહ્યું કે તમે સોગંદનામામાં છેતરપિંડી કરી રહ્યા છો. કોર્ટે બિનશરતી માફીના રામદેવના સોગંદનામાને સ્વીકારવાનો ઈનકાર કરી દીધો હતો. જસ્ટિસ અમાનુલ્લાહ અને જસ્ટિસ હીમા કોહલીની બેન્ચે આ મામલે સુનાવણી કરતાં કહ્યું કે તમે ત્રણ ત્રણ વખત આદેશની અવગણના કરી છે અને હવે તેના પરિણામ ભોગવવા પડશે. અમે આંધળા નથી. તેની સાથે બેન્ચે આ મામલે કેન્દ્ર સરકારથી મળેલા જવાબ સામે પણ અસંતોષ વ્યક્ત કર્યો હતો.

કેન્દ્રના જવાબથી પણ સુપ્રીમકોર્ટ અસંતુષ્ટ

જસ્ટિસ કોહલીએ કહ્યું કે આયુષ મંત્રાલય અત્યાર સુધી કાર્યવાહી માટે રાહ કેમ જોઈ રહ્યું હતું. અત્યાર સુધી કોઈપણ કોર્ટ સમક્ષ તેની સામે અરજી કેમ ના કરી? સુપ્રીમકોર્ટે ઉત્તરાખંડ સરકારને પૂછ્યું કે જ્યારે પતંજલિએ તમારી સમક્ષ આપેલા નિવેદનનું ઉલ્લંઘન કર્યું તો તમે શું કર્યું? બેસી રહ્યા તમે, અમારા આદેશની રાહ જોતા રહ્યા? તમે કોઈ કાર્યવાહી કેમ ન કરી. આવું 6 વખત થયું છે. વારંવાર લાઈસન્સિંગ ઈન્સપેક્ટર મૌન રહ્યા. અધિકારીઓ તરફથી પણ કોઈ રિપીટ નથી. પછી નિમણૂક અધિકારીએ પણ આવું જ કર્યું. આ ત્રણેય અધિકારીઓને તાત્કાલિક સસ્પેન્ડ કરવામાં આવે.

આ અગાઉ કોર્ટે કહ્યું હતું કે કંપનીની જાહેરાતો નિયમો વિરુદ્ધ છે. આ ઉપરાંત કોર્ટે આચાર્ય બાલકૃષ્ણ અને બાબા રામદેવ પર પણ યોગ્ય એફિડેવિટ દાખલ ન કરવા બદલ પણ નિશાન સાધ્યું હતું. એટલું જ નહીં ગત મહિને કોર્ટે પતંજલિ દ્વારા માંગવામાં આવેલી માફી સ્વીકારવાનો પણ ઈનકાર કરી દીધો હતો. ત્યારબાદ કોર્ટે કહ્યું હતું કે બાબા રામદેવ અને આચાર્ય બાલકૃષ્ણ ફરી એક નવા એફિડેવિટ સાથે હાજર થાય. આજે બંને ફરી કોર્ટમાં હાજર થયા છે.

પતંજલિની ભ્રામક જાહેરાત અંગે સુપ્રીમકોર્ટમાં કેન્દ્ર સરકારનો ઘટસ્ફોટ

આ મામલે સુપ્રીમ કોર્ટે કેન્દ્ર સરકારને પણ તીખા સવાલ પૂછ્યા હતા અને કહ્યું હતું કે અમને આશ્ચર્ય થાય છે કે તેણે પણ આ મામલે પોતાની આંખો કેવી રીતે બંધ રાખી. તેના પર કેન્દ્ર સરકારે જવાબ આપ્યો હતો કે જો કોઈ જાહેરાતમાં જાદુઈ સારવારની વાત કરવામાં આવે છે તો રાજ્યો પાસે તેની વિરુદ્ધ કાર્યવાહી કરવાનો સંપૂર્ણ અધિકાર છે. જોકે, અમે કાયદા પ્રમાણે નિર્ણય લીધો હતો. કેન્દ્ર સરકારે કહ્યું કે પતંજલિએ કોરોનાનો સામનો કરવા માટે કોરોનિલ દવા તૈયાર કરી હતી. તે અંગે જ્યારે જાહેરાતની વાત આવી ત્યારે પતંજલિને કહેવામાં પણ આવ્યું હતું કે તેઓ ત્યાં સુધી આવી જાહેરાતો ન આપે જ્યાં સુધી આ મામલાનું પરીક્ષણ આયુષ મંત્રાલય કરી રહ્યું છે. આટલું જ નહીં કેન્દ્ર સરકારે સંપૂર્ણ પ્રક્રિયા વિશે માહિતી આપતાં કહ્યું કે લાઈસન્સિંગ ઓથોરિટીને જણાવવામાં આવ્યું હતું કે કોરોનિલ દવા સંક્રમણનો સામનો કરવામાં એક સહાયક દવા તરીકે છે. આ ઉપરાંત સરકારે કહ્યું કે કેન્દ્ર સરકારે કોરોનાને ખતમ કરવાના ખોટા દાવા અંગે પણ ચેતવણી આપી હતી. આ સિવાય રાજ્યો અને કેન્દ્રશાસિત પ્રદેશોને કહેવામાં આવ્યું હતું કે, તેઓ આવી જાહેરાતો પર રોક લગાવે. કેન્દ્ર સરકારે કહ્યું કે અમારી નીતિ એ છે કે દેશમાં ચિકિત્સાની આયુષ અને એલોપેથીની પદ્ધતિ એક સાથે કામ કરે.