રાજકોટમાં પીસીબી બાદ DCBનો સતત બીજા દિવસે સપાટો : ઘાંચીવાડનો શખસ દેશી પિસ્ટલ અને કાર્ટીઝ સાથે ઝડપાયો

રાજકોટ શહેર અને જિલ્લાના ક્રાઇમનાં સમાચાર

રાજકોટમાં તાજેતરમાં પીસીબીની ટીમે વેપન કાર્ટેલ ગેંગના ૨૦ આરોપીઓને ઝડપી લઇ ૩૮ હથિયાર તથા ૩૨ કાર્ટીઝ કબ્જે કર્યા બાદ બાદ DCBની ટીમ સક્રીય થઈ છે. ગઈકાલે બે આરોપીઓ પાસેથી પીસ્ટલ, તમંચો અને ૬ કાર્ટીઝ કબજે લઈ આજે ઘાંચીવાડના શખસને પીસ્ટલ અને એક કાર્ટીઝ સાથે ધરપકડ કરી હતી. શહેરમાં ગેરકાયદેસર હથિયાર ધરાવતા ઈસમો વિરૂધ્ધ કાર્યવાહી કરવાની સુચના અન્વયે ક્રાઈમ બ્રાન્ચના પીઆઇ એ એસ ચાવડાની રાહબરીમાં ટિમ પેટ્રોલિંગમાં હતી ત્યારે ઘાંચીવાડ નદીના કાંઠે ઘોડાના તબેલા પાસેથી ઉભેલા શખસ પાસે હથિયાર અને કાર્ટીઝ હોવાની બાતમી આધારે ટીમે દરોડો પાડી ઉભેલ શખસને પોતાનું નામઠામ પૂછતા પોતે અરબાઝ અલ્તાફભાઈ દોઢીયા જણાવેલ જેથી તેની ઝડતી લેતા પિસ્ટલ અને કાર્ટીસ મળી આવતા પોલીસે રૂ.૧૦,૧૦૦ના મુદામાલ સાથે અરબાઝની ધરપકડ કરી હતી. પ્રાથમિક તપાસમાં આરોપી અગાઉ શહેરના વિવિધ પોલીસ મથકમાં મારામારી સહિતના ગુનામાં પોલીસ ચોપડે ચડી ચુકયો છે. ગુજસીટોક હેઠળ જેલમાં રહેલી ઓળીયા ગેંગ સાથે અગાઉની માથાકૂટ ચાલતી હોય જેથી જસદણના એક શખસ પાસેથી હત્યા લઈ રાખ્યું હોવાની કબુલાત આપતા પોલીસે વિશેષ તપાસ આદરી છે.

રાજકોટમાં મેઘાવી માહોલ વચ્ચે તસ્કરો ધોધમાર વરસ્યા : બાલાજી પાર્કમાં પરિવારને ઊંઘતો રાખી લોકરમાંથી રોકડ-દાગીના સહીત 16.88 લાખની ચોરી

રાજકોટમાં મેઘાવી માહોલ વચ્ચે વરસાદ સાથે તસ્કરો પણ ધોધમાર વરસ્યા હોય તેવા બે કિસ્સા પોલીસ ચોપડે નોંધાયા છે બાલાજી પાર્કમાં પરિવારને ઊંઘતો રાખી તસ્કરો બાજુના રૂમમાંથી રોકડ સહીત 16.88 લાખની મતા ચોરી જતા તાલુકા પોલીસમાં ગુનો નોંધાયો છે જયારે મહાદેવવાડી મેઈન રોડ ઉપર મોબાઈલ શોપના તાળા તોડી રોકડ 2 લાખ સહીત 2,78,500ની તસ્કરો ચોરી કરી નાસી જતા માલવીયાનગર પોલીસમાં ગુનો નોંધાયો છે પોલીસે બંને ચોરીના ભેદ ઉકેલવા તજવીજ હાથ ધરી છે. મૂળ લોધિકાના હાલ બાલાજી પાર્કમાં રહેતા અને ખેતીકામ કરતા રમેશભાઈ ગાંડુભાઈ સખીયા ઉ.58એ 16.88 લાખની ચોરી અંગે તાલુકા પોલીસ સ્ટેશનમાં અજાણ્યા શખ્સ સામે નોંધાવેલી ફરિયાદમાં જણાવ્યું હતું કે ગત 23 તારીખે રાત્રીના અમો બધા જમીને પોત પોતાના રૂમમાં ઊંઘવા ગયા હતા મારા બંન્ને દિકરાઓ ઉપરના ભાગે સુતા હતા અને દરવાજો ખુલ્લો હતો અને બાજુનો બાલ્કનીવાળૉ રૂમ પણ ખુલ્લો હતો સવારે મારા દિકરા ધર્મેશભાઈને બહારગામ જવાનુ હોય જેથી પત્ની ઉઠાડવા ગયા હતા મારા પત્નિ બાલ્કનીવાળા રૂમમાં જતા ત્યાં જોતા રૂમમાં આવેલ ત્રણેય કબાટના દરવાજા ખુલ્લા હતા ત્રીજા નંબરના કબાટમાં મારી પત્નિના સોનાના દાગીના તથા રોકડા રૂપીયા હતા તે કબાટ ખુલ્લો જોવામાં આવતા મારી પત્નિએ જે લોકરની ચાવી સંતાડી હતી તે લોકર ખુલ્લુ હતું તેમાં વચ્ચેના ખાનામાં દાગીના મુકવાના બોક્ષમાંથી સોનાના દાગીના જોવામાં આવેલ નહી જેમા 3.60 લાખનો સોનાનો હાર, 4.50 લાખનુ સોનાનુ મંગળસુત્ર, 4.50 લાખની બે સોનાની બંગડી, 2.40 લાખનો સોનાનો ચેન, 60 હજારની એક સોનાની વીંટી અને 1.20 લાખના ચાર સોનાના કઈડા તથા 8000 રોકડા સહીત 16.88 લાખની વસ્તુઓ ગાયબ હતી જેથી આ અંગે તાલુકા પોલીસમાં ફરિયાદ નોંધાવતા પીએસઆઈ એસ પી ચૌહાણએ ગુનો નોંધી તપાસ હાથ ધરી છે. જયારે રાજકોટના મહાદેવવાડી મેઈન રોડ ઉપર રહેતા અને ઘર પાસે જ મોમાઈ નામની મોબાઈલની દુકાન ચલાવતા હાર્દીકભાઈ ભરતભાઈ બોરીચા ઉ.35એ 2,78,500ની ચોરી અંગે માલવીયાનગર પોલીસ સ્ટેશનમાં નોંધાવેલી ફરિયાદમાં જણાવ્યું હતું કે ગઇ તા.20ના રોજ રાત્રીના હિસાબના 2,02,000 મારી દુકાનના કાઉન્ટરમાં રાખીને લોક મારી દુકાનને તાળુ મારી દુકાન બંધ કરી હતી બાદમાં 21 તારીખે સવારે અમારી દુકાનમાં કામ કરતા તોફીકભાઈ ચાવી લઈને દુકાન ખોલવા ગયા ત્યારે જોયું તો તાળા ન હતા જેથી મારા મોટાભાઈ ધર્મેશભાઈને ફોન કરી દુકાનના તાળા તુંટેલ છે તેમ કહેતા અમે જઈને જોયું તો કેશ કાઉન્ટર તુંટેલ હોય જેમા ગઇ રાત્રીએ રાખેલ 2 લાખ 2 હજાર જોવા મળ્યા ન હતા અને બાજુના કાઉન્ટરમાં રાખેલ બે મોબાઈલ પણ જોવામાં આવેલ ન હોય અને દુકાનના અન્ય કાઉનટરમાં અલગ અલગ કંપનીના મોબાઈલ, દુકાનની અંદર બહાર રાખેલ સી.સી.ટીવી કેમેરાના સ્ટોર કરવા માટે બે ડી.વી.આર. રાખેલ હતા જેમાથી એક ડી.વી.આર. જોવામાં આવેલ નહી તેમજ એક નેટ કનેકશન રાઉટર જે રાઉટર પણ જોવામાં આવેલ ન હતું બાદમાં અમોએ સામેના દુકાનના સી.સી.ટીવી ચેક કરતા રાત્રી ના આશરે બે વાગ્યા ની આસપાસ કોઈ અજાણ્યો ઈસમ કોઇ વસ્તુ વડે અમારી દુકાનના તાળા તોડી ચોરી કરતો હોય તેવું જોવા મળતા અંતે 2,78,500ના મુદ્દામાલની ચોરી અંગે ફરિયાદ નોંધાવતા પીએસઆઇ સી પી રાઠોડએ ગુનો નોંધી તપાસ હાથ ધરી છે.

રાજકોટમાં જુગારના બે દરોડામાં 7 મહિલા સહીત 14 ઝડપાયા

રાજકોટમાં દારૂ જુગારના કેસો કરવાની સૂચના અન્વયે આજી ડેમ પોલીસ મથકના પીઆઇ એચ એન પટેલની રાહબરીમાં ટિમ પેટ્રોલિંગમાં હતી ત્યારે પીએસઆઈ વી જી ડોડીયા સહિતને મળેલી બાતમી આધારે પીઠડ આઈ સોસાયટીમાં દરોડો પાડી જુગાર રમતા ભરત ભીખાભાઇ ધોરાળીયા, વિનોદ જીણાભાઇ મકવાણા, હિતેશ જેરામભાઈ રુદાતાલા, લાલજી રાયધનભાઈ ચાવડા અને સંજય લક્ષ્મણભાઇ ચાવડાની ધરપકડ કરી રોકડા 13,850 કબ્જે કર્યા છે જયારે ગાંધીગ્રામ પોલીસ મથકના પીઆઇ એચ પી ગઢવીના માર્ગદર્શન હેઠળ સ્ટાફ પેટ્રોલિંગમાં હતો ત્યારે એએસઆઈ ચેતનસિંહ ગોહિલ સહિતને મળેલી બાતમી આધારે ગાંધીગ્રામના અંજલિ પાર્કમાં દરોડો પાડી જુગાર રમતા રતનબા મનુભા ઝાલા, ભારતીબેન રવિભાઈ ચાવડા, પારુલબા તખતસિંહ ચુડાસમા, પૂજાબેન અલ્પેશભાઈ માલણ, રુબિનાબેન ઇકબાલભાઇ સંધિ, હંસાબેન હિતેષભાઇ મારુ, રૂપલબેન બળવંતભાઈ વાજા, અક્ષય દિનેશભાઇ વૈષ્ણવ અને હિરેન માધાભાઇ પરમારની ધરપકડ કરી રોકડા 10,250 કબ્જે કર્યા છે.

નવા થોરાળામાંથી 432 ચપલા દારૂ ભરેલી કાર કબ્જે : બેની શોધખોળ

રાજકોટમાં દારૂ જુગારના કેસો કરવાની સૂચના અન્વયે ડીસીબી પીઆઇ એ એસ ચાવડાના માર્ગદર્શન હેઠળ ટિમ પેટ્રોલિંગમાં હતી ત્યારે મહેશભાઈ સોલંકી સહિતના સ્ટાફને મળેલી બાતમી આધારે નવા થોરાળા વણકરવાસમાં દરોડો પાડ્યો હતો દરોડા દરમિયાન પોલીસને જોઈ બે શખ્સો નાસી છૂટ્યા હતા કારની તલાસી લેતા દારૂના 432 ચપલા મળી આવતા 1,40,400 રૂપિયાનો દારૂ, કાર, મોબાઈલ સહીત 3,50,400નો મુદામાલ કબ્જે કરી નાસી છૂટેલા બંને શખ્સોની શોધખોળ હાથ ધરી છે.

ગુજસીટોકના ગુનામાં ફરાર કાળીયો ગેંગના સાગરીતને એલસીબીએ ઝડપી લીધો

સૌરાષ્ટ્રભરમાં ચોરી સહિતના ગુના આચરી તરખાટ મચાવનાર કાળીયો ગેંગના નવ શખ્સો વિરુદ્ધ રાજકોટ ગ્રામ્ય પોલીસે ગુજસીટોક એક્ટ હેઠળ ગુનો નોંધી મુખ્ય સૂત્રધાર સહીત છ શખ્સોની ધરપકડ કરવામાં આવી હતી ગુજસીટોકનો ગુનો નોંધાતા ભૂગર્ભમાં ઉતરી ગયેલો સાગરીત વિક્રમ ચારોલિયાને રૂરલ એલસીબી ટીમે દબોચી લીધો છે. ગઈ તા.8 એપ્રિલના રોજ એસપી વિજયસિંહ ગુર્જરના નેતૃત્વ હેઠળ રાજકોટ સહીત સૌરાષ્ટ્રભરમાં ચોરી સહિતના ગુના આચરી તરખાટ મચાવનાર કાળીયો ગેંગના નવ સભ્યો વિરુદ્ધ ગુજસીટોક એક્ટ હેઠળ ગુનો નોંધવામાં આવ્યો હતો રાજકોટ ગ્રામ્યમાં 26, જૂનાગઢમાં છ, રાજકોટ અને અમરેલીમાં 4-4, બોટાદ, ગીર સોમનાથ, જામનગર, સુરેન્દ્રનગર અને ભાવનગરમાં કુલ 47 ગુનામાં પોલીસ ચોપડે ચડી ચૂકેલી કાળીયો ગેંગના મુખ્ય સૂત્રધાર રણજિત ઉર્ફે કાળીયો ધીરુભાઈ સોલંકી સહીત છ શખ્સોની ધરપકડ કરી લેવાઈ હતી. જયારે એક શખ્સનો જેલમાંથી કબ્જો મેળવવામાં આવ્યો હતો. બીજી બાજુ ગુજસીટોક એક્ટ હેઠળ ગુનો નોંધાતા ગેંગના બે સાગરીત ભૂગર્ભમાં ઉતરી ગયા હતા વોન્ટેડ આરોપીઓને શોધી કાઢવાની જિલ્લા એસપીની સૂચના અન્વયે રૂરલ એલસીબી પીઆઈ જે.પી.રાવની રાહબરીમાં પીએસઆઈ એચ સી ગોહિલ, કે એમ ચાવડા, આર વી ભીમાણી અને પી એન ભરવાડની ટીમ પ્રયત્નશીલ હતી દરમિયાન ગુજસીટોક એક્ટ અને આજીડેમ પોલીસ મથકના 4.07 લાખની ઘરફોડ ચોરીના ગુનામાં ત્રણ મહિનાથી ફરાર આરોપી વિક્રમ ધીરુ ચારોલિયાને બાતમી આધારે ગોંડલની ગુંદાળા ચોકડી નજીક ઓવરબ્રિજ નીચેથી એલસીબી ટીમે ઝડપી લઇ ગોંડલ બી ડિવિઝન પોલીસ મથકના હવાલે કર્યો હતો.