ગ્રો કવરના કારણે સાડા ત્રણ ફૂટથી લઈને ચાર ફૂટની મરચીના છોડ થયા
ખાસ-ખબર ન્યૂઝ જૂનાગઢ, તા.11
ગીર સોમનાથ જિલ્લાના ખેડૂતો પ્રગતિશીલ બનીને ખેતીમાં નવા રસ્તાઓ અપનાવી રહ્યા છે. બાગાયત ખાતા દ્વારા આપવામાં આવતી સહાય ખેડૂતોને બાગાયત ખેતી તરફ આકર્ષી રહી છે. ગ્રો કવર માટે બાગાયત ખાતું 50 ટકા સહાય આપી રહ્યું છે. તાલાલાના ઉમરેઠી ગામના માલદેભાઈ લખમણભાઈ રામ આ યોજનાનો લાભ લઇ ખેતી કરી મરચાનું બમ્પર ઉત્પાદન મેળવ્યું છે. ઉમરેઠી ગામના વતની માલદેભાઈ લખમણભાઈ રામએ શિક્ષણમાં માત્ર દસ ધોરણ પાસ કર્યા હોવા છતાં ખેતીમાં સફળતા મેળવી છે. તેમની પાસે સાત વીઘા જમીન હોવાથી શરૂઆતમાં તેઓ પરંપરાગત પાકની ખેતી કરતા હતા. ત્યારબાદ છેલ્લા 15 વર્ષથી તેઓ સતત મરચાની ખેતી કરી રહ્યા છે.
- Advertisement -
પ્રગતિશીલ ખેડૂત માલદેભાઈએ આ વર્ષે અઢી વીઘામાં મરચીનું વાવેતર કરી ખેતીમાં નવો રાહ ચીંધ્યો છે. ગ્રો કવર અને મલચિંગ પદ્ધતિથી વાવેતર કરાયેલ મરચીનો પાક માર્ચ મહિનામાં તૈયાર થઈ ગયો છે અને ઉત્પાદન શરૂ થઈ ગયું છે.
માલદેભાઈના જણાવ્યા મુજબ, ગ્રો કવર પદ્ધતિથી શિયાળામાં પાક સુરક્ષિત રહે છે તેમજ જીવાત કે અન્ય રોગનો ઉપદ્રવ રહેતો નથી. હાલ મરચાનું ઉત્પાદન શરૂ થયું છે. વેપારીઓને સીધુ વેચાણ કરે છે. દર વર્ષે યાર્ડમાં વેચાણ કરતા હતાં. પરતું આ વર્ષે ઉત્પાદન વધારે હોવાના કારણે પોતાની વાડીએથી વેપારીઓને વેચાણ કરે છે. કિલાના 30 થી 35 રૂપિયા ભાવ મળી રહ્યા છે.
ગ્રો કવરનો ઉપયોગ કરીને પાકનું વાવેતર કરવાથી દવા અને અન્ય ખર્ચમાં બચત થાય છે. ગ્રો કવરનો બીજો ફાયદો એ છે કે તેનાથી ખેડૂતો કોઈપણ પાકનું અગાઉ વાવેતર કરી શકે છે. આનાથી બજારમાં વહેલા ઉત્પાદન શરૂ થાય છે અને ખેડૂતોને પાકના સારા એવા ભાવ મળી શકે છે. ઉત્પાદન પણ વધારે થાય છે. આ વર્ષે સાડા ત્રણ ફૂટથી લઈને ચાર ફૂટની મરચીના છોડ થયા છે. આટલા વર્ષની ખેતીમાં પહેલી વખત આટલા મોટો છોડ થયા છે. મરચાની ખેતીમાં શરૂઆતના 45 દિવસ મહત્વના હોય છે. મરચાનું વાવેતર કરી લાખો રૂપિયાથી આવક મેળવશે.
