પબ્લિક યુનિવર્સિટી બિલ પાસ: સિન્ડિકેટના સ્થાને બોર્ડ ઓફ મેનેજમેન્ટ કાર્યરત બનશે

ચાર વખત નામંજૂર થયેલું બિલ વિધાનસભામાંથી પસાર: વિદ્યાર્થી રાજકારણ થશે પૂર્ણ

જે સેનેટ સભ્ય તરીકે બિનહરીફ થયા છે કે, ચૂંટાયા છે તેનો સમયગાળો હવે માત્ર છ માસ સુધીનો જ રહેશે

ખાસ-ખબર સંવાદદાતા
ગુજરાત વિધાનસભામાં પબ્લિક યુનિવર્સિટી બિલ બહુમતીથી પસાર કરવામાં આવ્યું છે. આ બિલ લાગુ થતાંની સાથે જ રાજ્યની 11 યુનિવર્સિટી સમાન કાયદા-નિયમ આધીન સંચાલન કરવામાં આવશે. ગુજરાત પબ્લિક યુનિવર્સિટી બિલ 2023માં વિદ્યાર્થી રાજકારણ પર પડદો પાડી દેતી જોગવાઈ છે. ઉચ્ચ અને ટેકનિકલ શિક્ષણ વિભાગના મંત્રી ઋષિકેશ પટેલે આ બિલ ગૃહમાં રજૂ કર્યું હતું. આ બિલ પર કેટલાક ધારાસભ્યોએ પોતાના વિચારો રજૂ કર્યા હતા. આ કાયદા હેઠળ યુનિ.ઓમાં સેનેટ અને સિન્ડિકેટ સભ્યોની જોગવાઈ રદ થઈ જશે. ગુજરાતના અનેક રાજકીય નેતાએ વિદ્યાર્થી કાળથી જ રાજકારણમાં સક્રિય હતા, પરંતુ હવે આ બંને હોદ્દા ઉપર પૂર્ણવિરામ મુકાઇ જતા સૌરાષ્ટ્ર યુનિવર્સિટીમાં તાજેતરમાં જે લોકો સેનેટ સભ્ય તરીકે બિનહરીફ થયા છે કે, ચૂંટાયા છે તેનો સમયગાળો હવે માત્ર છ માસ સુધીનો જ રહેશે. આ ઉપરાંત આગામી દિવસોમાં જે બેઠકોની ચૂંટણી યોજવાની બાકી છે તે હવે આ કાયદો લાગુ થયા બાદ ચૂંટણી યોજવી કે કેમ? તે અંગે સરકારનું માર્ગદર્શન લેવાશે. નવા વિધેયકમાં સેનેટ-સિન્ડિકેટની જોગવાઈ રદ કરીને બોર્ડ ઓફ ગવર્નન્સની જોગવાઈ કરવામાં આવી છે. અર્થાત સમગ્ર અંકુશ સરકાર હસ્તક રહેશે.

-11 સરકારી યુનિવર્સિટીમાં એક સમાન અભ્યાસક્રમ, પ્રવેશ અને પરીક્ષા પદ્ધતિ અમલમાં મૂકાશે
– રાજ્યની 11 સરકારી યુનિવર્સિટીની સ્વાયત્તતા ખતમ થઇ સરકારી સત્તાનો અમલ થશે
– યુનિવર્સિટીઓની એકેડેમિક અને ફાઈનાન્સિયલ ઓટોનોમી સમાપ્ત થશે
– કુલપતિની ટર્મ 3ના બદલે 5 વર્ષની અને નો-રિપિટ પોલીસી
– અધ્યાપકો, આચાર્યો, યુનિવર્સિટીના પ્રોફેસર, અધ્યક્ષોની નિમણૂકમાં 33 ટકા મહિલા સભ્યોની જોગવાઈ
– સેનેટ અને સિન્ડિકેટને સ્થાને બોર્ડ ઓફ મેનેજમેન્ટ કાર્યરત બનશે
– નવા પ્રોગ્રામ્સ, કોર્સ શરૂ કરવા માટે સ્વાયત્ત રહેશે
– ઓનલાઈન કોર્સિસ તૈયાર કરી શકશે, દૂરવર્તી પાઠ્યક્રમો પણ ચલાવી શકશે