આલીદર ગામમાં ઘર આંગણે સિંહે વાછરડાનું મારણ કર્યું

ખાસ-ખબર સંવાદદાતા
ગિર જંગલની નજીક સીમ તથા ગ્રામ્ય વિસ્તારમાં વન્ય પ્રાણીઓ અવાર નવાર શિકારની શોધમાં આવી ચઢતા હોય છે. અગાઉ થોડા દિવસો પહેલા ગીર નજીક એક સિંહ આલીદર ગામમાં કોમ્પલેક્ષના પહેલાં માળે ચઢી ગયેલો હતો. બાદમા અલગ અલગ રહેણાંક વિસ્તારોમાં પશુના મારણ કરી મિજબાની માણી હોવાનો વીડિયો વાયરલ થયેલો હતો.ત્યારે આજે ફરી મોડી રાત્રિના સમયે એક સિંહ આલીદર ગામમાં રહેણાંક વિસ્તારમાં આવી એક ઘરના આંગણા પાસે સિંહે વાછડાનું મારણ કરી મિજબાની માણતાં આ સમગ્ર ઘટનાનો લાઈવ વીડિયો સ્થાનિક લોકોએ કેદ કર્યો હતો.ગામમાં આવેલી હાઇસ્કુલ પાસે રાત્રિનાં 3.30 વાગ્યાની આસપાસ જગદીશ મકવાણાના ઘરના ફળીયા સામે એક સિંહ આવતાં ગામમાં પશુઓમાં નાસભાગ મચી ગયેલી અને સિંહે એક રેઢિયાળ વાછડા પર હુમલો કરી મારણની મજિબાની માણી હતી. એ વખતે રહેણાંક મકાન આવેલ હોય વાછડાનો ભાંભરવા લાગતા આજુબાજુમાં રહેતા લોકો જાગી ગયેલ અને આ સમગ્ર ઘટના જગદીશ મકવાણાએ મોબાઈલમાં કેદ કરી લીધેલ હતી.