પ્રિત પિયુને પાનેતર નાટક ફેમ જાણીતા ગુજરાતી અભિનેત્રી હેપ્પી ભાવસારનું ખૂબ જ નાની વયે ફેફસાના કેન્સરના કારણે નિધન થયું છે. તેઓની ઉંમર માત્ર 45 વર્ષની જ હતી.
નામ પ્રમાણે ખુશમિજાજ રહેનાર અને હસમુખો સ્વભાવ ધરાવનાર એવા ગુજરાતી હિરોઇન હેપ્પી ભાવસાર કે જેઓનું ફેફસાના કેન્સરના કારણે મોડી રાત્રે નિધન થયું છે. જેના લીધે ગુજરાતી ફિલ્મ ઇન્ડસ્ટ્રીમાં ભારે શોકનું મોજું ફરી વળ્યું છે.
- Advertisement -
તેઓ ગુજરાતી સિરિયલ, નાટકો અને ફિલ્મોમાં અભિનય કરી ચૂક્યાં છે
હેપ્પી ભાવસાર કે જેઓએ ગુજરાતી સિરિયલ, નાટકો અને ફિલ્મોમાં સારો એવો રોલ ભજવી ચૂક્યાં છે. તેઓએ 2015માં ગુજરાતી ફિલ્મ પ્રેમજી: રાઇઝ ઓફ અ વોરિયર (Premji: Rise of a Warrior) થી અભિનયની શરૂઆત કરી હતી. એ સિવાય તેઓએ ગુજરાતી ફિલ્મ મોન્ટુની બિટ્ટુ Montu Ni Bittu (2019) અને મૃગતૃષ્ણા (Mrugtrushna – 2021) માં પણ અભિનય કર્યો છે. એ સિવાય તેઓએ ફિલ્મ ‘મહોતું’ અને ’21મું ટિફિન’ જેવી ઉત્તમ ફિલ્મો પણ આપી છે.
હેપ્પી ભાવસાર કે જેઓનું ગુજરાતી ફિલ્મ ઇન્ડસ્ટ્રીમાં મોટું નામ છે તેવા મૌલિક નાયક સાથે લગ્ન થયા હતા. મૌલિક નાયક કે જેઓ તેઓની એક્ટિંગ ઉપરાંત ફિલ્મોમાં તેમની કોમીક ટાઈમિંગ અને સોશ્યલ મીડિયામાં હસાવિ હસાવીને લોટપોટ કરી દે એવા વીડિયોઝ માટે પણ જાણીતા છે. તેઓએ હેલ્લારો અને મોન્ટુની બિટ્ટુ જેવી ઢગલાબંધ ગુજરાતી ફિલ્મોમાં અભિનય કર્યો છે અને ચાહકોએ તેમનાં અભિનયના પણ સારા એવાં વખાણ કર્યા છે.
- Advertisement -
ટ્વિન્સ દીકરીઓને જન્મ આપે અઢી મહિના થયા
હેપીએ અઢી મહિના પહેલાં જ ટ્વિન્સ દીકરીઓને જન્મ આપ્યો હતો. થોડા સમય પહેલાં જ તેઓએ પોતાના ખોળાની તસવીરો પોતાના સોશિયલ મીડિયા એકાઉન્ટ પર શેર કરી હતી.
હેપ્પી ભાવસારના જીવનની કેવી શરૂઆત રહી હતી?
હેપ્પી ભાવસાર કે જેઓનો જન્મ અમદાવાદમાં થયો હતો. તેઓએ અમદાવાદના થલતેજ વિસ્તારમાં આવેલી વિશ્વભારતી સ્કૂલમાંથી અભ્યાસ કર્યો હતો. હેપ્પી ભાવસારે એક્ટિંગની શરૂઆત એચ. કે. આર્ટ્સ કોલેજથી કરી હતી. એ સમયે એચ. કે કોલેજમાં સૌમ્ય જોશી નાટક કરાવતા હતા ત્યારે હેપ્પી ભાવસારે પણ તેઓની સાથે નાટકો કરવાની શરૂઆત કરી હતી.
ગ્રેજ્યુએશન દરમ્યાન ‘મહાત્મા બોમ્બ’ નાટક માટે બેસ્ટ એક્ટ્રેસનો એવોર્ડ મળ્યો હતો
હેપ્પી ભાવસારને ગ્રેજ્યુએશન દરમ્યાન જ ‘મહાત્મા બોમ્બ’ નાટક માટે બેસ્ટ એક્ટ્રેસનો એવોર્ડ મળ્યો હતો. તેઓએ ગ્રેજ્યુએશન બાદ ગૂજરાત વિદ્યાપીઠમાંથી ઓડિયો વિઝ્યુઅલ અને ગુજરાત કોલેજમાંથી ડ્રામેટિક્સની ડિગ્રી મેળવી ચૂક્યા છે. હેપ્પી ભાવસારે કમર્શિયલ ડેબ્યુ દૂરદર્શનની ‘શ્યામલી’ ફિલ્મથી કર્યો હતો. ‘શ્યામલી’ લવ ટ્રાયેંગલ બેઝ્ડ હતી, જો કે તેમાં હેપ્પીનું પાત્ર ‘લજ્જા’ ઘર ઘરમાં જાણીતું બન્યું હતું.
‘પ્રિત પિયુને પાનેતર’ના 500થી વધુ શો તેઓ કરી ચૂક્યા છે
શ્યામલી બાદ હેપ્પી ભાવસાર મારા સાજણજી અને મારી પાનખર ભીંજાઈ જેવી સિરીયલોમાં કામ કરી ચૂક્યા છે. તો રાગી જાની અને સૌનક વ્યાસ સાથે જાણીતા નાટક ‘પ્રિત પિયુને પાનેતર’ના 500થી વધુ શો તેઓ કરી ચૂક્યા છે. તમને કદાચ નવાઇ લાગશે કે ‘પ્રિત પિયુને પાનેતર’માં હેપ્પી ભાવસારે જે મંગળાનું પાત્ર ભજવ્યું હતું તે એક સમયે તેઓના મમ્મી પણ ભજવતા હતા.
તદુપરાંત હેપ્પી ભાવસારને મધુરાય લિખિત અભિનય બેન્કરે ડિરેક્ટ કરેલા નાટક ‘કોઈ પણ એક ફૂલનું નામ બોલો’ તો માટે બેસ્ટ એક્ટ્રેસ અને નરસિંહ મહેતામાં ‘મહેતી’ ના નેગેટિવ રોલ માટે પણ એવોર્ડ મળી ચૂક્યા છે. તેઓ આકાશવાણી ઉપરાંત ઈ-લર્નિંગ પ્રોગ્રામ્સ માટે વોઈસ ઓવર પણ કરતા હતા.
હેપ્પીના નામની પાછળ છે એક નાનકડી રસપ્રદ સ્ટોરી
હેપ્પીના નામની પાછળ એક નાનકડી રસપ્રદ સ્ટોરી છે. આ અંગે હેપ્પી ભાવસારનું કહેવું એમ હતું કે, તે જ્યારે જન્મી હતી ત્યારે તે રડતી ન હોતી. એટલે ડૉક્ટર્સે ખૂબ પ્રયત્ન કર્યા. બાદમાં ચૂંટલી ખણ્યા બાદ હેપ્પી રડી. ત્યારે ડૉક્ટર્સે પપ્પાને કહ્યું હતું કે ‘Your Child is so Happy.’ બસ ત્યારથી તેઓના મમ્મી-પપ્પાએ તેઓનું નામ હેપ્પી પાડ્યું હતું.
