પૂર્વ ધારાસભ્ય સિદ્ધાર્થ પરમાર અને રણજીત મકવાણા વિરુદ્ધ CM ભૂપેન્દ્ર પટેલને અરજી

રાજકોટ તાલુકા અનુ.જાતિ સામુદાયિક ખેતી સરકારી મંડળી સામે ગંભીર આક્ષેપો

રાજકોટ, લોધીકા, પડધરી તાલુકાની સરકારી ફાજલ જમીનોનું તોડકાંડ

અનુ.જાતિ સામુદાયિક ખેતી સરકારી મંડળીનાં બનાવટી પ્રમુખો-મંત્રીઓ દ્વારા તોડ કર્યાની અરજીમાં વિગતો રજૂ કરતા ધીરુભાઈ સરવૈયા

ખાસ-ખબર સંવાદદાતા

રાજકોટ જિલ્લાના લોધીકા, પડધરી અનુસુચિત જાતી સામુદાયિક ખેતી સરકારી મંડળીની જમીનમાં બિનઅધિકૃત ફરજી પ્રમુખ મંત્રીઓ દ્વારા સરકારી જમીનોનું વેણાચ, વહીવટ કરીને લાખો રૂપિયાના તોડ/ઉઘરાણા કરનાર ભાજપના પૂર્વ ધારાસભ્ય સિદ્ધાર્થ પરમારના ઈશારે પડદા પાછળ રહિને તેમના માણસો દ્વારા આ મસમોટું કૌભાંડ આચરનાર સામે ગુનો દાખલ કરવા ગુજરાતના મુખ્યમંત્રી ભૂપેન્દ્ર પટેલને ધીરુભાઇ સરવૈયાએ એક અરજી કરી છે જે અરજીમાં અક્ષશ: આ મુજબ છે.

રાજ્ય સરકારના નિયમ અનુસાર રાજ્યના જિલ્લા-તાલુકાના ગ્રામ્ય અનુસુચિત જાતિના ગરીબ, અત્યંત ગરીબ લોકોને સરકારની ફાજલ જમીન, ખેતવિહોણાઓને પોતાનું જીવનનિર્વાહ ચાલે તે અંગે (1) ગુજરાત સહકારી મંડળી અધિનિયમ 1961ની કલમ 37 અન્વયે તથા કાયદાની કલમ 74 નિયમ અનુસાર પાલન કરવાનું રહે છે. પરંતુ રાજકોટ તાલુકાના અનુ.જાતિ સામુદાયિક ખેતી સહકારી મંડળી લી. રાજકોટ ખાતે ખેતવિહોણા, ગરીબ, અત્યંત ગરીબ અનુ. જાતિના બદલે આ મંડળીમાં પૂર્વ ધારાસભ્ય સિદ્ધાર્થભાઈ પરમારના માણસો દ્વારા હાલના આ ફર્જી પ્રમુખ- મંત્રી સાત્વત ઉતરાધિકાર બિનઅધિકૃત હોય તો પણ રાજકોટ તાલુકા અનુ.જાતિ સામુદાયિક ખેતી સહકારી મંડળીમાં ગેરકાયદેસર રીતે સભ્યો બનાવીને લાખો રૂપિયાના તોડ-ઉઘરાણા કરી કૌભાંડ કરી રહ્યા છે. હાલ રાજકોટ તાલુકા અનુ.જાતિ સામુદાયિક ખેતી સહકારી મંડળી લી. રાજકોટ શહેરમાં ફર્જી- પ્રમુખ-મંત્રી રણજીતભાઈ મકવાણા બંને ઉપરોક્ત સહકારી મંડળીમાં તોડ કરીને આ પ્રમુખ-મંત્રીઓની સહીઓ કરીને ખોટા-બોગસ શેર સર્ટી., સનદ, પ્રમાણપત્ર, સભ્યપદની અલગ-અલગ પહોંચો બનાવીને સભ્યોને આપી રહ્યા છે અને લાખો રૂપિયાનો તોડ કરી રહ્યા છે. આ મહાકૌભાંડમાં સાચું કોણ છે તે ખરાઈ કરવી જરૂરી છે. હાલના બોગસ ફર્જી પ્રમુખ-મંત્રીએ રાજકોટ તાલુકા અનુ.જાતિ સામુદાયિક ખેતી સહકારી મંડળી લી. પ્રમુખ-મંત્રી રણજીતભાઈ મકવાણા તથા પી.વી. રાઠોડે એક અનુસુચિત જાતિની વિધવા મહિલા પાસેથી તેનું નામ દેવુબેન રહે. નવાથોરાળા રાજકોટવાળા પાસેથી રૂપિયા છ લાખનો તોડ કરીને કાળીપાટની વિવાદીત જમીનમાં ગૌશાળા બનાવવા માટે બોગસ શેર સર્ટી. સનદ આપેલી છે. હાલ રાજકોટના મહે.કલેકટર સમક્ષ શરતભંગ કેસ ચાલુ છે, આમ આ ફર્જી બોગસ પ્રમુખ-મંત્રી દ્વારા આ રીતે લાખો રૂપિયાના તોડ કરી રહ્યા છે.

છતાં સરકારી ફાજલ જમીનોનું આ રીતે આ મંડળીમાં કૌભાંડ ચાલી રહ્યું છે. આ ઉપરાંત રાજકોટ તાલુકાના ખીજડીયાના રે.સ. નં. 224- પૈકી 17/ પૈકી 1 ખેડવાણ જમીન હે.આરે.ચો.મી. 09-38 એકર 20-0 જેની વેચાણ કિંમત રૂા. 26,00,000માં સબ રજીસ્ટ્રાર રાજકોટમાં રજીસ્ટર દસ્તાવેજ નોંધાયેલ છે. જે રેકર્ડ ઉપરનો પુરાવો છે. (મંડળીમાં આ રીતે દસ્તાવેજ બને છે.) આ ઉપરાંત લોધીકા તાલુકા અનુ.જાતિ સામુદાયિક ખેતી સહકારી મંડળી લી.માં લોધીકાના ગામ પારડી, વડવાજડી, મેટોડામાં પણ આ રીતે બિનઅધિકૃત વેચાણ- વહેવાર થયેલો છે તથા કોટડાસાંગાણી અનુ. જાતિ સામુદાયિક ખેતી સહકારી મંડળી લી.માં પણ આ રીતે કૌભાંડ ચાલી રહ્યું છે જે અંગે જિલ્લા રજીસ્ટ્રારશ્રી રાજકોટ તરફથી લેખિતમાં મંડળીના કર્તાહર્તાઓને પોલીસ ફરિયાદ ગુનો દાખલ કરવા અંગે પત્રથી જણાવેલ છે છતાં કોઈ જ કાર્યવાહી થઈ આવેલ નથી એ જ રીતે પડધરી તાલુકા અનુ.જાતિ સામુદાયિક ખેતી સહકારી મંડળી લી. પડધરીના જે તે સમયના સ્થાપક હાલ અવસાન પામેલ છે તે કાનજીભાઈ ભીખાભાઈ દાફડા મંડળીના પ્રમુખ હતા સદરહુ મંડળીમાં પણ બિનઅધિકૃત ફર્જી પ્રમુખ-મંત્રીઓ દાખલ થઈને ભ્રષ્ટાચાર આચરી રહ્યા હોય તેવું જણાય આવેલું છે.

આ વિષય પરત્વે રાજકોટ અનુ.જાતિ સામુદાયિક ખેતી સહકારી મંડળીઓના માધ્યમથી ફાજલ સરકારી જમીનોનું ખુલ્લેઆમ વેચાણ-વહેવાર કરીને લાખો રૂપિયાના તોડ-ઉઘરાણા કરીને ભાજપના આ પૂર્વ ધારાસભ્યના ઈશારે રણજીતભાઈ મકવાણા પોતે પ્રતિજ્ઞા લઈને માથા ઉપર વાળ નહીં રાખવા, મુંડન કરાવીને નાટક કરીને સરકારી જમીનો વેચીને સરકારને ઉંધા ચશ્મા પહેરાવવા નીકળી પડેલો છે. રાજકોટ જિલ્લાના રાજકોટ, લોધીકા, કોટડાસાંગાણી, પડધરી અનુ.જાતિ સામુદાયિક ખેતી સહકારી મંડળીના નામે બોગસ ફર્જી પ્રમુખ-મંત્રીઓ આ પૂર્વ ધારાસભ્ય સિદ્ધાર્થભાઈ પરમારના ઈશારે ગેરકાયદેસર મંડળીઓની જમીનમાં વેચાણ-વહીવટ કરનાર સામે રાજકોટ જિલ્લાનું વહિવટી તંત્ર બિનઅધિકૃત પ્રમુખ-મંત્રીઓના આ ગોરખ ધંધાને ડામવા ગુનાહિત કૃત્ય સામે શું પગલાં ભરવામાં આવશે?
આ વિષય અંગે યોગ્ય કાર્યવાહી નહીં કરવામાં આવે તો મારે નાછુટકે જાહેર હિતની નામદાર ગુજરાત હાઈકોર્ટમાં પી.આઈ.એલ. અરજી દાખલ કરવાની ફરજ પડશે જેની રાજ્ય સરકાર તથા રાજકોટ જિલ્લા વહિવટી તંત્રને જાણ થવા સારું અરજી ધીરુભાઈ સરવૈયા નામની વ્યક્તિએ ગુજરાતના મુખ્યમંત્રી ભૂપેન્દ્ર પટેલને કરેલી છે.