કાયદાની ઐસીતૈસીઃ અમરનાથ હોલમાં મનપાનો મનાઈ હુકમ અને સીલ છતાં ગેરકાયદે બાંધકામ યથાવત
અગાઉ નોટિસ અને ડિમોલીશન હિયરીંગ બાદ મનપાએ મિલકતને માર્યું હતું સત્તાવાર સીલઃ RTI એક્ટિવિસ્ટ જીજ્ઞેશ રામાવતે મ્યુનિ. કમિશનરને કરી લેખિત ફરિયાદ
- Advertisement -
રાજકોટ મહાનગરપાલિકા (RMC) ના સેન્ટ્રલ ઝોન હેઠળ આવતા વોર્ડ નં. ૧૭માં બોલબાલા માર્ગ પર પીપળીયા હોલ સામે, અમરનાથ મંદિર પાસે આવેલા ‘અમરનાથ હોલ’ વાળા બિલ્ડિંગમાં થઈ રહેલા ગેરકાયદેસર બાંધકામનો વિવાદ વધુ વકર્યો છે. મનપા દ્વારા અગાઉ મનાઈ હુકમ, નોટિસ અને ત્યારબાદ મિલકતને સીલ મારવાની કાર્યવાહી કરવામાં આવી હોવા છતાં, જવાબદાર બિલ્ડર અને મિલકતધારક દ્વારા સત્તાવાર હુકમોની અવગણના કરીને ફરીથી બાંધકામ શરૂ કરી દેવામાં આવ્યું હોવાની ગંભીર રજૂઆત મ્યુનિસિપલ કમિશનર સમક્ષ કરવામાં આવી છે.માહિતી અધિકાર (RTI) હેઠળ મેળવેલા દસ્તાવેજો મુજબ, આ સમગ્ર પ્રકરણની શરૂઆત તા. ૧૬/૦૨/૨૦૨૬ ના રોજ થઈ હતી, જ્યારે જાગૃત નાગરિક અશ્વિનભાઈ બાલાસરાએ ટી.પી. શાખામાં અરજી કરીને રજૂઆત કરી હતી કે વોર્ડ નં. ૧૭માં ‘અમરનાથ હોલ’નું બાંધકામ ગેરકાયદેસર રીતે થઈ રહ્યું છે અને આગળ છોડેલી માર્જિનની જગ્યામાં પણ સ્લેબ ભરી દેવામાં આવ્યો છે. આ ફરિયાદના પગલે રાજકોટ મહાનગરપાલિકાની ટાઉન પ્લાનીંગ શાખા દ્વારા મિલકતધારક સૂર્યકાન્ત કલ્યાણજી વડગામાને જી.પી.એમ.સી. એક્ટની કલમ ૨૬૭ મુજબ તા. ૦૯/૦૩/૨૦૨૬ ના રોજ ‘મનાઈ હુકમ’ ફટકારવામાં આવ્યો હતો, જેમાં ગ્રાઉન્ડ ફ્લોર (G.F.) ના માર્જિનમાં અને ફર્સ્ટ ફ્લોર (F.F.) પર ચાલતું ગેરકાયદે બાંધકામ તાત્કાલિક બંધ કરવા જણાવાયું હતું. ત્યારબાદ તા. ૨૩/૦૪/૨૦૨૬ ના રોજ કલમ ૨૬૦(૧) હેઠળ નોટિસ પાઠવવામાં આવી હતી અને બાંધકામ દૂર ન થતા નામદાર સુપ્રિમ કોર્ટની માર્ગદર્શિકા મુજબ ડિમોલીશનની કાર્યવાહી અન્વયે તા. ૨૭/૦૭/૨૦૨૬ ના રોજ ટાઉન પ્લાનર સમક્ષ જરૂરી આધાર-પુરાવાઓ સાથે હિયરીંગ માટે હાજર રહેવા નોટિસ આપવામાં આવી હતી.મનપા દ્વારા આ મિલકતને સત્તાવાર રીતે સીલ કરવામાં આવી હોવા છતાં, તાજેતરમાં તા. ૧૬/૧૧/૨૦૨૬ ના રોજ અરજદાર જીજ્ઞેશ એચ. રામાવત દ્વારા મ્યુનિસિપલ કમિશનરને લેખિત ફરિયાદ કરીને ચોંકાવનારો આક્ષેપ કરાયો છે કે સંબંધિત મિલકતધારક અને બિલ્ડર દ્વારા કાયદાના શાસનને ખુલ્લો પડકાર ફેંકીને સીલ મારેલી મિલકતમાં ફરીથી બાંધકામની કામગીરી ચાલુ રાખવામાં આવી છે. આ મામલે માત્ર કાગળ પર કાર્યવાહી કરવાને બદલે અરજદારે માંગણી કરી છે કે સક્ષમ અને ટેકનિકલ અધિકારીઓ દ્વારા તાત્કાલિક સ્થળ તપાસ કરી હાલની સ્થિતિનું વિગતવાર પંચનામું કરવામાં આવે. આ ઉપરાંત, અગાઉ જ્યારે મિલકતને સીલ મારવામાં આવી હતી તે સમયના મૂળ રોજકામ, ફોટોગ્રાફ્સ અને વિડિયોગ્રાફીનો રેકર્ડ મેળવી તેની હાલની બિલ્ડિંગની સ્થિતિ સાથે સામસામે સરખામણી કરવામાં આવે. મંજૂર થયેલા બાંધકામ નકશાના આધારે સ્થળ પર રૂબરૂ માપણી કરી સીલ માર્યા બાદ કેટલા ચોરસ ફૂટમાં વધારાનું બાંધકામ થયું છે તેની ચોક્કસ નોંધ કરી જવાબદાર બિલ્ડર અને મિલકતધારક સામે કડક કાયદેસરની અને શિક્ષાત્મક કાર્યવાહી કરવામાં આવે તેવી રજૂઆત કરાતા, હવે રાજકોટ મહાનગરપાલિકાનું તંત્ર પોતાના જ સીલ અને હુકમોનો અનાદર કરનાર બિલ્ડર સામે કેવા પગલાં ભરે છે તે જોવું રહ્યું.




