ચોખા, ડુંગળી અને લસણ સહિતની ખાદ્ય ચીજોની સાથેસાથે હવાઈ ટિકિટ, મોબાઈલ અને લેપટોપ જેવા ડિજિટલ ઉપકરણો પણ થયા મોંઘા
પુરવઠાની અડચણો વધતા માત્ર વ્યાજદરો વધારવાથી મોંઘવારી નહીં અટકે તેવી મુખ્ય આર્થિક સલાહકારની ચેતવણી
- Advertisement -
ભારતમાં આવશ્યક ચીજવસ્તુઓથી માંડીને તમામ ક્ષેત્રોમાં મોંઘવારીનું ભારણ સતત વધી રહ્યું છે, જેના કારણે સામાન્ય લોકોના ઘરખર્ચમાં સરેરાશ ૨૦ ટકાનો વધારો થયો હોવાનું એક મહત્વપૂર્ણ સર્વેક્ષણમાં બહાર આવ્યું છે. છેલ્લા એક વર્ષ દરમિયાન ચોખા (૧૨.૫ ટકા), મિલેટ્સ (૩૮ ટકા), ડુંગળી (૧૧૬ ટકા), લસણ (૬૦ ટકા), તુવાર (૧૫ ટકા) અને અડદ (૧૧.૬ ટકા) સહિતની આવશ્યક વસ્તુઓના ભાવ આસમાને પહોંચ્યા છે. લોકલ સર્કલ્સના સર્વે અનુસાર, મોંઘવારીના ભારે દબાણને કારણે ૭૪ ટકા લોકોએ બિનજરૂરી ખર્ચમાં કાપ મૂક્યો છે, જ્યારે ૫૦ ટકા લોકોએ આવશ્યક ચીજોની ખરીદી જ ઓછી કરી દીધી છે. સર્વેમાં સામેલ ૬૧ ટકા લોકોએ સ્વીકાર્યું છે કે ગત વર્ષની સરખામણીએ તેમના ઘરના માસિક ખર્ચમાં ૨૦ ટકા સુધીનો વધારો થયો છે. મોંઘવારી હવે માત્ર શાકભાજી કે અનાજ પૂરતી સીમિત નથી રહી, પરંતુ ડિજિટલ ઉપકરણો અને સેમિકંડક્ટર ચિપની કિંમતો વધવાથી ‘ચિપફ્લેશન’ પણ વધી ગયું છે. ઓક્ટોબરમાં મોબાઈલ હેન્ડસેટની મોંઘવારી વધીને ૮.૬૫ ટકા અને કમ્પ્યુટર-લેપટોપની મોંઘવારી ૮.૬૧ ટકા પર પહોંચી ગઈ છે. આ ઉપરાંત, હવાઈ મુસાફરી અને બહાર જમવાના ખર્ચમાં પણ મોટો ઉછાળો જોવા મળ્યો છે. દેશના મુખ્ય આર્થિક સલાહકાર વી. અનંત નાગેશ્વરને ચેતવણી આપી છે કે વૈશ્વિક સ્તરે પુરવઠાની અડચણો વધતી હોવાથી માત્ર વ્યાજદરો વધારીને મોંઘવારી પર કાબૂ મેળવવો મુશ્કેલ બનશે અને સરકારે ઉત્પાદન વધારવા જેવા અન્ય આર્થિક ઉપાયો પર ધ્યાન આપવું પડશે. લોકલ સર્કલ્સના સર્વે મુજબ મોંઘવારી વધવાથી ૬૧ ટકા લોકોના ઘરખર્ચમાં ૨૦ ટકાનો વધારો થયો છે, જેના કારણે ૭૪ ટકા લોકોએ બિનજરૂરી ખર્ચ ઘટાડવાની ફરજ પડી છે.



