સૌરભ ચંદ્રાકરે આપેલી માહિતીના આધારે કાર્યવાહી, દરોડામાં મળેલાં ડિજિટલ ડિવાઇસ અને મોબાઇલમાં હવાલા નેટવર્કનો ખુલાસો
સેન્ટ્રલ બ્યુરો ઓફ ઇન્વેસ્ટિગેશન (CBI) એ છેલ્લા કેટલાક દિવસોમાં ‘મહાદેવ ઓનલાઈન બુક એપ’ (Mahadev Online Book App) નામના ગેરકાયદેસર ઓનલાઇન સટ્ટાબાજીના પ્લેટફોર્મ સાથે સંકળાયેલા ‘પેનલ ઓપરેટરો’ના ઠેકાણાઓ પર ગુજરાત સહિત ૬ રાજ્યોમાં આવેલા ૩૩ સ્થળોએ દરોડા પાડયા છે. CBIએ અમદાવાદ, વડોદરા અને સુરતમાં પણ રેડ કરી હતી.
- Advertisement -
આ દરોડા, પ્લેટફોર્મના મુખ્ય પ્રમોટરોમાંના એક અને મુખ્ય આરોપી સૌરભ ચંદ્રાકરને ઓમાન સલ્તનતમાંથી ભારત લાવ્યા (પ્રત્યાર્પણ કર્યા) બાદ તેણે આપેલી માહિતીના આધારે કરવામાં આવ્યા હતા. આ દરોડા દરમિયાન, સક્રિય સટ્ટાબાજી અને જુગારની ‘પેનલ્સ’ (ઓપરેશનલ યુનિટ્સ) ચાલતી મળી આવી હતી, જેને બંધ કરી દેવામાં આવી છે. તપાસ દરમિયાન ડિજિટલ ઉપકરણો, મોબાઈલ ફોન અને એવા મહત્વપૂર્ણ દસ્તાવેજો મળી આવ્યા છે જે ‘મ્યુલ એકાઉન્ટ્સ’ (અન્ય વ્યક્તિઓના નામે ખોલાવેલા ખાતા) અને ‘હવાલા નેટવર્ક’ના ઉપયોગ કરવામાં આવ્યો હોવાનું સામે આવ્યું છે. આ તમામ વસ્તુઓ જપ્ત કરવામાં આવી છે. સૌરભ ચંદ્રાકરને ઓમાનથી ભારત લાવવામાં આવ્યા બાદ ૧ નવેમ્બર ૨૦૨૬ના રોજ CBI દ્વારા ધરપકડ કરવામાં આવી હતી. રાયપુર સ્થિત સ્પેશિયલ જજ (CBI કેસો) એ તેને ૮ દિવસના પોલીસ રિમાન્ડ પર CBIને સોંપ્યો હતો. પૂછપરછ દરમિયાન, પ્લેટફોર્મ કેવી રીતે કામ કરે છે અને ભારતમાં તેના ‘પેનલ ઓપરેટરો’નું નેટવર્ક કેવી રીતે ફેલાયેલું છે, તે અંગેની વિગતો સામે આવી છે. તપાસ દરમિયાન એકત્ર કરાયેલા દસ્તાવેજી અને ડિજિટલ પુરાવાઓ પણ તેને બતાવવામાં આવ્યા હતા. ઉલ્લેખનીય છે કે, છત્તિસગઢ રાજ્ય સરકાર પાસેથી કેસ મળ્યા બાદ, CBIએ ‘મહાદેવ ઓનલાઈન બુક’ કેસમાં બે FIR નોંધી છે. અત્યાર સુધીની તપાસમાં જાણવા મળ્યું છે કે, આ પ્લેટફોર્મ વિદેશમાં આવેલી મુખ્ય ઓફિસ (હેડ ઓફિસ) દ્વારા ચલાવવામાં આવે છે અને ભારતમાં ‘પેનલ ઓપરેટરો’ના વિશાળ નેટવર્ક દ્વારા તેનું સંચાલન થાય છે. આ ઓપરેટરો ગ્રાહકોની ID સંભાળે છે, અન્ય વ્યક્તિઓના નામે ખોલાવેલા કે ભાડે લીધેલા બેંક ખાતાઓમાં સટ્ટાબાજીના નાણાં એકત્ર કરે છે અને હવાલા માધ્યમથી નફો વિદેશ મોકલે છે. પોલીસ રિમાન્ડ પૂરા થતાં, સૌરભ ચંદ્રાકરને ૧૨ નવેમ્બર, ૨૦૨૬ના રોજ રાયપુરના સ્પેશિયલ (CBI કેસો) સમક્ષ રજૂ કરવામાં આવ્યો હતો, જ્યાંથી તેને ૧૯ નવેમ્બર, ૨૦૨૬ સુધી જ્યુડિશિયલ કસ્ટડીમાં મોકલી દેવામાં આવ્યો છે.
સરકારી કર્મચારીઓની ભૂમિકા અંગે તપાસ
આ કેસમાં અન્ય આરોપીઓ (જેમાં વિદેશમાં રહેલા લોકોનો પણ સમાવેશ થાય છે), આ કામગીરીમાં મદદ કરનારા વ્યક્તિઓ અને સંડોવાયેલા સરકારી કર્મચારીઓની ભૂમિકા અંગે તપાસ ચાલુ છે. અન્ય ફરાર આરોપીઓને ભારત લાવવા (પ્રત્યાર્પણ કરવા) માટેની કાર્યવાહી પણ ચાલી રહી છે. જનતાને ચેતવણી આપવામાં આવે છે કે ઓનલાઇન સટ્ટાબાજી અને જુગાર ગેરકાયદેસર છે. આવી પ્રવૃત્તિઓ માટે પોતાનું બેંક ખાતું, સિમ કાર્ડ કે ઓળખના દસ્તાવેજો અન્ય વ્યક્તિઓને આપવા કે ભાડે આપવા એ પણ એક ગુનો છે અને તેના કારણે ખાતાધારક સામે કાયદેસરની કાર્યવાહી થઈ શકે છે.
