28 વર્ષનો ઇંતજાર ખતમ : એશિયન ગેમ્સમાં મીરાબાઇએ ભારતને સિલ્વર અપાવ્યો

મીરાબાઈએ એશિયન ગેમ્સમાં પ્રથમ વખત મેડલ જીત્યો

વેઇટલિફ્ટર મીરાબાઈ ચાનુએ એશિયન ગેમ્સમાં ભારતને સિલ્વર મેડલ અપાવ્યો. તેઓ મહિલાઓની ૪૯ કિલોગ્રામ વેઇટ કેટેગરીમાં ૧૯૮ કિલોગ્રામ વજન ઉઠાવીને બીજા સ્થાને રહ્યાં. મીરાબાઈએ સ્નેચમાં ૮૭ અને ક્લીન એન્ડ જર્કમાં ૧૧૧ કિલોગ્રામ વજન ઉઠાવ્યું. મીરાબાઈએ એશિયન ગેમ્સમાં પ્રથમ વખત મેડલ જીત્યો છે. તેઓ ઓલિમ્પિક ગેમ્સ, કોમનવેલ્થ ગેમ્સ અને વર્લ્ડ ચેમ્પિયનશિપ જેવી મોટી સ્પર્ધાઓમાં મેડલ જીતી ચૂક્યાં છે. મીરાબાઈનો મેડલ એશિયાડમાં વેઇટલિફ્ટિંગમાં ભારતનો ૧૯૯૮ પછીનો પહેલો મેડલ છે. ૧૯૯૮માં કર્ણમ મલ્લેશ્વરીએ મેડલ જીત્યો હતો. બુધવારે ગેમ્સના ચોથા દિવસે ભારતને ૪ મેડલ મળ્યા. તેમાંથી ૨ મેડલ શોટગન શૂટિંગના સ્કીટ ઇવેન્ટમાં આવ્યા. જ્યારે એક સોફ્ટ ટેનિસમાં મળ્યો. તેમાં જય મીણાએ બ્રોન્ઝ જીત્યો. શોટગન શૂટિંગના મહિલા સ્કીટ ટીમ ઇવેન્ટમાં રાયજા ઢિલ્લોં, પરિનાઝ ધાલીવાલ અને માહેશ્વરી ચૌહાણની ત્રિપુટી ૩૩૧ પોઇન્ટ સાથે ત્રીજા સ્થાને
રહી.
પુરુષ ઇવેન્ટમાં અનંતજીત સિંહ નારુકા, મેરાજ અહમદ ખાન અને ભવતેગ સિંહ ગિલે શૂટ-ઓફમાં કઝાકિસ્તાનને હરાવીને બ્રોન્ઝ જીત્યો. જોકે, મનુ ભાકર મહિલા ૧૦ મીટર પિસ્તોલ ઈવેન્ટમાં ૫મા સ્થાને રહી. આ જ કેટેગરીના ટીમ ઇવેન્ટમાં ભારત નજીવા અંતરથી મેડલ જીતી શક્યું નહીં. મનુએ ફાઇનલમાં ૧૮૧.૧ પોઇન્ટ મેળવ્યા. એશિયન ગેમ્સ શૂટિંગમાં ઈન્ડિવિજ્યુઅલ ક્વોલિફિકેશન રાઉન્ડ ટીમ ઈવેન્ટનો મેડલ રાઉન્ડ પણ હોય છે. ભારતની ત્રણેય ખેલાડીઓ મનુ, ઈશા અને સુરુચિએ મળીને કુલ ૧૭૧૯ પોઈન્ટ મેળવ્યા. આ ત્રીજા સ્થાને રહેલી વિયેતનામની ટીમના પોઈન્ટ્સ જેટલા જ છે. તેમ છતાં ભારત બ્રોન્ઝથી ચૂકી ગયું. બે ટીમોનો સ્કોર સરખો રહે ત્યારે વધુ પરફેક્ટ ૧૦ની સંખ્યાના આધારે વિજેતાનો નિર્ણય થાય છે. વિયેતનામની શૂટર્સે કુલ ૪૬ પરફેક્ટ ૧૦ ફટકાર્યા હતા. જ્યારે ભારતીય શૂટર્સે માત્ર ૪૪ પરફેક્ટ ૧૦ ફટકાર્યા હતા. ચીને ૧૭૩૫ અંકો સાથે ગોલ્ડ અને સાઉથ કોરિયાએ ૧૭૩૦ પોઈન્ટ્સ સાથે સિલ્વર જીત્યો.