E20નો વિરોધ હજુ શમ્યો નથી ત્યાં આવ્યું નવું ગતકડું
E20 પેટ્રોલના ઉપયોગથી કોઇ ગંભીર ફરિયાદ ન હોવાનો ગડકરીનો દાવો
- Advertisement -
E20 પેટ્રોલને લઈને ચાલી રહેલી ચર્ચા વચ્ચે કેન્દ્રીય માર્ગ પરિવહન અને રાજમાર્ગ મંત્રી નિતિન ગડકરીએ જણાવ્યું છે કે ભારતમાં ઇથેનોલના ઉપયોગને લઈને અત્યાર સુધી વાહનોમાં કોઈ મોટા પાયે ફરિયાદ સામે આવી નથી. તેમણે એ પણ જાહેરાત કરી હતી કે ઓક્ટોબરમાં ટોયોટાની ૧૦૦ ટકા ઇથેનોલથી ચાલતી કાર રજૂ કરવામાં આવી શકે છે. દિલ્હીમાં એક કાર્યક્રમ દરમિયાન ગડકરીએ જણાવ્યું કે, દુનિયાના ૧૯ દેશોમાં ઇથેનોલનો ઉપયોગ થઈ રહ્યો છે. તેમના જણાવ્યા મુજબ, ભારતમાં પણ E20 પેટ્રોલના ઉપયોગથી વાહનોમાં કોઈ વ્યાપક સમસ્યાની ફરિયાદ મળી નથી. સરકારે અગાઉ પણ સ્પષ્ટ કર્યું છે કે E20 ના ઉપયોગથી મોટા પાયે એન્જિન ખરાબ થવા કે વાહન બંધ પડી જવાના કોઈ પુરાવા મળ્યા નથી. ગડકરીએ ઉમેર્યું કે ટોયોટાની એક એવી કાર આવી રહી છે જે ૧૦૦ ટકા ઇથેનોલથી ચાલી શકશે. આ વાહન ચાલતી વખતે વીજળી પણ પેદા કરશે. તેમણે દાવો કર્યો કે ઇથેનોલના ઉપયોગથી પેટ્રોલની સરખામણીએ બળતણનો ખર્ચ ઓછો થઈ શકે છે અને પ્રદૂષણમાં પણ ઘટાડો થશે. આ પહેલા જૂન મહિનામાં મારુતિ સુઝુકીની પ્રથમ ફ્લેક્સ-ફ્યુઅલ પેસેન્જર કાર રજૂ કરવામાં આવી હતી. ફ્લેક્સ-ફ્યુઅલ વાહનો E20 થી લઈને E100 સુધીના અલગ-અલગ ગુણોત્તર વાળા પેટ્રોલ-ઇથેનોલ મિશ્રણ પર ચાલી શકે છે.
ગડકરીએ ઇથેનોલ નીતિને ખેડૂતોની આવક સાથે પણ જોડી હતી. તેમણે કહ્યું કે મકાઈમાંથી ઇથેનોલ બનાવવાના નિર્ણયથી ઉત્તર પ્રદેશ અને બિહારના ખેડૂતોને લગભગ ૪૫,૦૦૦ કરોડ રૂપિયાનો લાભ થયો છે. કાર્યક્રમમાં તેમણે બાઇક ટેક્સીને પ્રોત્સાહન આપવાની જરૂરિયાત પર પણ ભાર મૂક્યો હતો. તેમણે રાજ્યના પરિવહન મંત્રીઓને યુવાનો માટે એવા પ્લેટફોર્મ ઉપલબ્ધ કરાવવા અપીલ કરી હતી જેથી તેઓ બાઇક ટેક્સી દ્વારા કમાણી કરી શકે, જેનાથી મોટું રોકાણ કર્યા વિના રોજગારીની તકો વધી શકે છે. સરકારના જણાવ્યા મુજબ E20 લાગુ કરતા પહેલા વાહનોની એન્જિન ક્ષમતા, ફ્યુઅલ સિસ્ટમ, ટકાવપણું અને ઉત્સર્જન સહિતના અનેક માપદંડો પર પરીક્ષણ કરવામાં આવ્યા છે. સરકારે જુલાઈમાં કહ્યું હતું કે કરોડો ટુ-વ્હીલર અને પેટ્રોલ કાર E20 બળતણ પર ચાલી રહી છે અને મોટા પાયે એન્જિન ખરાબ થવાના કોઈ પુષ્ટિ થયેલ પુરાવા સામે આવ્યા નથી.
