સર્વેશ્વર ચોક કા રાજા : આજે અનાથ અશ્રામના બાળકોને ભોજન સાથે ભેટ અપાશે

બ્લડ ડોનેશન કેમ્પમાં રક્તદાતાઓનો ઉત્સાહભેર પ્રતિસાદ

સત્યનારાયણ કથામાં મોટી સંખ્યામાં ભાવિકોએ લીધો લાભ

રાજકોટ શહેરના યાજ્ઞિક રોડ પર આવેલા સર્વેશ્વર ચોક ખાતે સર્વેશ્વર ચોક ચેરિટેબલ ટ્રસ્ટ દ્વારા આયોજિત ‘સર્વેશ્વર ચોક કા રાજા’ ગણેશ મહોત્સવમાં ભક્તિ, શ્રદ્ધા અને સેવાભાવનો ત્રિવેણી સંગમ જોવા મળી રહ્યો છે. ગણેશ મહોત્સવ દરમિયાન દાદાના દર્શન અને મહાઆરતીનો લાભ લેવા માટે શહેરના વિવિધ ક્ષેત્રના મહાનુભાવો, સામાજિક આગેવાનો તથા મોટી સંખ્યામાં ભાવિકો ઉમટી રહ્યા છે. ઉત્સવમાં ધાર્મિક કાર્યક્રમોની સાથે સેવાકીય પ્રવૃત્તિઓને પણ વિશેષ પ્રાધાન્ય આપવામાં આવી રહ્યું છે. આજે અનાથાશ્રમના બાળકોને ભોજન કરાવવામાં આવશે તેમજ તેમને ગીફ્ટનું વિતરણ કરવામાં આવશે. આ સેવાકીય આયોજન દ્વારા ગણેશ મહોત્સવને માત્ર ધાર્મિક ઉજવણી પૂરતો સીમિત ન રાખી સમાજસેવા સાથે જોડવાનો પ્રયાસ કરવામાં આવી રહ્યો છે. મહોત્સવ દરમિયાન રાજકોટ મહાનગરપાલિકા (RMC)ની ટીમ દ્વારા પણ સ્વચ્છતા અંગે લોકોને જાગૃત કરવા માટે કાર્યક્રમ યોજાયો હતો. જાહેર સ્થળોએ સ્વચ્છતા જાળવવા, કચરો યોગ્ય જગ્યાએ નાખવા તેમજ સ્વચ્છ શહેરના નિર્માણમાં નાગરિકોની ભૂમિકા અંગે લોકોને સમજ આપવામાં આવી હતી. મહોત્સવમાં મોટી સંખ્યામાં લોકોની અવરજવર રહેતી હોવાથી સ્વચ્છતા જાળવવા માટે જાગૃતિ કાર્યક્રમનું આયોજન કરવામાં આવ્યું હતું.

ગણેશ મહોત્સવ અંતર્ગત રવિવાર અને સોમવારે યોજાયેલા બ્લડ ડોનેશન કેમ્પમાં મોટી સંખ્યામાં રક્તદાતાઓએ ઉત્સાહપૂર્વક ભાગ લીધો હતો. રક્તદાનને મહાદાન ગણાવી આયોજકો દ્વારા લોકોને રક્તદાન માટે પ્રેરિત કરવામાં આવ્યા હતા. શહેરના યુવાનો સહિત વિવિધ વર્ગના લોકોએ રક્તદાન કરીને સેવાભાવનું ઉદાહરણ પૂરું પાડ્યું હતું. સોમવારે મહોત્સવ સ્થળે સત્યનારાયણ કથાનું પણ આયોજન કરવામાં આવ્યું હતું. કથામાં મોટી સંખ્યામાં ભાવિકો ઉપસ્થિત રહ્યા હતા અને શ્રદ્ધાપૂર્વક કથાનું શ્રવણ કરી ધાર્મિક લાભ લીધો હતો. સમગ્ર કાર્યક્રમ દરમિયાન ભક્તિમય વાતાવરણ જોવા મળ્યું હતું.

‘સર્વેશ્વર ચોક કા રાજા’ની મહાઆરતીમાં શહેરના વિવિધ ક્ષેત્રના મહાનુભાવો અને સામાજિક આગેવાનો સહપરિવાર ઉપસ્થિત રહ્યા હતા. જેમાં વી.બી. જાડેજા સહપરિવાર, અંકુર સ્કૂલના પોપટભાઇ સાપરીયા સહપરિવાર, પુષ્પરાજસિંહ જાડેજા માખાવડ સહપરિવાર, એડવોકેટ હિતેષભાઇ મહેતા સહપરિવાર, સુધીરસિંહ જાડેજા નાના મવા સહપરિવાર, મોર્ડન ગ્રુપના મુકેશભાઇ દોશી સહપરિવાર તેમજ દિપકભાઇ ચંદારણા સહપરિવાર સહિતના મહાનુભાવોએ મહાઆરતીનો લાભ લીધો હતો. આ ઉપરાંત ડૉ. પ્રિતેશભાઇ પોપટ સહપરિવાર તેમજ જાનકીબેન અને જીતુભાઇ કોટડીયાએ પણ દાદાના દર્શન કરી આશીર્વાદ મેળવ્યા હતા. મહાનુભાવોના આગમનથી આયોજકો તેમજ ઉપસ્થિત ભાવિકોમાં વિશેષ ઉત્સાહનો માહોલ જોવા મળ્યો હતો.