PAK મંત્રીએ કહ્યું- પુરવઠો ઘટ્યો તો કિંમતો વધશે
પાકિસ્તાનમાં પેટ્રોલનો ભાવ ૧૦૦૦ રૂપિયા પ્રતિ લીટર સુધી મોંઘો થઈ શકે છે. પેટ્રોલિયમ મંત્રી અલી પરવેઝ મલિકે રવિવારે કહ્યું કે જો દેશમાં પેટ્રોલની અછત ઊભી થશે તો કિંમત વધુ વધી શકે છે. મંત્રીના જણાવ્યા મુજબ, પાકિસ્તાનમાં પેટ્રોલ અત્યાર સુધીમાં લગભગ ૫૦% મોંઘું થઈ ચૂક્યું છે. હાલમાં પેટ્રોલ ૩૮૯.૧૪ રૂપિયા પ્રતિ લીટર અને ડીઝલ ૪૨૪.૦૪ રૂપિયા પ્રતિ લીટર છે. મિડલ ઈસ્ટમાં લડાઈ વધવાથી દુનિયામાં ક્રૂડ ઓઇલનો ભાવ વધી રહ્યો છે. હોર્મુઝ સ્ટ્રેટ બંધ થવાથી તેલની સપ્લાયને લઈને પણ ચિંતા વધી છે. તેની અસર પાકિસ્તાનમાં પેટ્રોલની કિંમત પર પડી રહી છે. વધતી કિંમતો વચ્ચે પાકિસ્તાન સરકારે બાઈક, રિક્ષા, ચિંગચી(મોટરસાયકલ આધારિત ઓટો રિક્ષા) અને ૮૦૦ સીસી સુધીની કારો માટે પેટ્રોલ પર સબસિડી યોજના શરૂ કરી છે. તેમાં પેટ્રોલ પર ૧૦૦ રૂપિયા પ્રતિ લીટર સુધીની સબસિડી આપવામાં આવી રહી છે. દરેક પાત્ર વ્યક્તિને મહિનામાં ૪ ટોકન મળશે. દરેક ટોકન પર ૫૦૦ રૂપિયાની સબસિડી મળશે. યોજનામાં હવે ૧ જાન્યુઆરી ૨૦૦૬થી રજિસ્ટર્ડ મોટરસાયકલોનો પણ સમાવેશ કરવામાં આવ્યો છે.
સરકારના જણાવ્યા મુજબ, યોજનામાં ૧૭.૫ લાખથી વધુ લોકોએ રજિસ્ટ્રેશન કરાવ્યું છે. આશરે ૧૫ લાખ ટોકન જારી થઈ ચૂક્યા છે અને ૬.૮૦ લાખથી વધુ ટોકનનો ઉપયોગ થઈ ચૂક્યો છે. પાકિસ્તાન સરકાર દેશમાં નવા તેલ ભંડારો શોધવા માટે કામ કરી રહી છે. પેટ્રોલિયમ મંત્રી અલી પરવેઝ મલિકના જણાવ્યા મુજબ, તેલના કુવાઓ પર કામ શરૂ થઈ ચૂક્યું છે અને ઓક્ટોબર સુધી કાચું તેલ મળવાની આશા છે. સરકારે તેલ અને ગેસની શોધ માટે નવા બ્લોક પણ કંપનીઓને આપ્યા છે. તેનો હેતુ દેશમાં સ્થાનિક ઉત્પાદન વધારવાનો અને વિદેશોમાંથી તેલ ખરીદવા પાછળ થતો ખર્ચ ઘટાડવાનો છે.
- Advertisement -
