સૌરાષ્ટ્ર યુનિવર્સિટીમાં ‘વિજ્ઞાન યાત્રાનો પ્રારંભ : દેશભરના અનેક અગ્રણી વિજ્ઞાનીઓ આપશે ઓનલાઇન માર્ગદર્શન

ભૌતિકશાસ્ત્ર ભવન અને વિજ્ઞાન ગુર્જરીના સંયુક્ત ઉપક્રમે 21 સપ્ટેમ્બરથી 9 ઓક્ટોબર સુધી વિશેષ વ્યાખ્યાન શ્રેણી

નેનોટેકનોલોજી, AI, ન્યુક્લિયર ફ્યુઝન અને સ્પેસ સાયન્સ જેવા આધુનિક વિષયો પર સંશોધકોને માર્ગદર્શન મળશે

વિજ્ઞાન માત્ર પ્રયોગશાળાઓ પૂરતું સીમિત ન રહેતાં નવી વિચારસરણી, સંશોધન અને રાષ્ટ્રવિકાસનું શક્તિશાળી માધ્યમ બને તેવા શુભ આશય સાથે સૌરાષ્ટ્ર યુનિવર્સિટીના ભૌતિકશાસ્ત્ર ભવન અને વિજ્ઞાન ગુર્જરી (વિજ્ઞાન ભારતી-ગુજરાત પ્રાંત) દ્વારા સંયુક્ત રીતે વિજ્ઞાન યાત્રા 3.0 – A Travel for Scientific Indian Minds towards Vikshit Bharat નામ વિશિષ્ટ ઓનલાઈન વ્યાખ્યાન શ્રેણીનો શુભારંભ કરવામાં આવ્યો છે. ૨૧ સપ્ટેમ્બરથી ૦૯ ઓક્ટોબર, ૨૦ર૬ દરમિયાન ચાલનારા આ જ્ઞાનસત્રમાં દેશની ટોચની સંસ્થાઓના વૈજ્ઞાનિકો યુવા વિદ્યાર્થીઓ અને રિસર્ચ સ્કોલર્સને વિવિધ આંતરશાખાકીય વિષયો પર માર્ગદર્શન પૂરું પાડશે. આ વ્યાખ્યાન શ્રેણીનું આયોજન રાષ્ટ્રીય શિક્ષણ નીતિ (NEP-2020) ના બહુ-શાખાકીય અભિગમને ધ્યાને રાખીને કરવામાં આવ્યું છે. જેમાં ભૌતિકશાસ્ત્રને માત્ર સૈદ્ધાંતિક વિષય તરીકે નહીં પરંતુ આધુનિક ટેકનોલોજી સાથે સાંકળીને રજૂ કરાશે. આ શ્રેણીમાં સર્ફેસ-એન્હાન્સ્ડ રામન સ્પેક્ટ્રોસ્કોપી (SERS), કોમ્પ્યુટેશનલ ફિઝિક્સ અને ડેટા સિમ્યુલેશન્સ, ભારતની સ્ટાન્ડર્ડ્સ ઈકોસિસ્ટમ, નેનોમટિરિયલ્સ માટે થર્મલ પ્લાઝ્મા પ્રોસેસિંગ, ન્યુક્લિયર ફ્યુઝન ડિવાઇસીસના પડકારો અને ટકાઉ ભવિષ્ય માટે અણુ ઊર્જા જેવા વિષયો આવરી લેવાયા છે. આ ઉપરાંત રિસર્ચ ક્ષેત્રે ઉપયોગી જનરેટિવ AI ટૂલ્સ, છિદ્રાળુ મટિરિયલ્સનું કોઓર્ડિનેશન કેમિસ્ટ્રી, પ્લાઝ્મા સાયન્સના સામાજિક ઉપયોગો, ઓપ્ટોઈલેક્ટ્રોનિક્સ અને પ્લેનેટરી સાયન્સ (ગ્રહ વિજ્ઞાન) જેવા વિષયો પર ઊંડાણપૂર્વક છણાવટ કરવામાં આવશે.
આ ૧૯ દિવસીય જ્ઞાનસત્રમાં દેશની ખ્યાતનામ સંસ્થાઓના તજજ્ઞો વક્તવ્ય આપશે. જેમાં દિલ્હી યુનિવર્સિટીના ડો. ધીરજકુમાર સિંહ, સેન્ટ ઝેવિયર્સ પીયૂષ ગેડિયા, આઈપીઆર ગાંધીનગરના ડો. બાલાસુબ્રમણિયમ સી., ડો. વિપુલ તન્ના અને ડો. મુકેશ રંજન, જેએનયુ દિલ્હીના પ્રો. પવનકુમાર કુલરિયા, એસવીએનઆઈટી સુરતના ડો. વિપુલ ખેરજ અને ડો. યોગેશ સોનવણે, પારુલ યુનિવર્સિટીના ડો. વૈભવ ગાંધી, એસઆરએમ ચેન્નાઈના ડો. પી. સી. કાર્થિકા, સીએસઆઈઆર-સીએસએમસીઆરઆઈ ભાવનગરના ડો. શુભદીપ નેઓગી, પીઆરએલ અમદાવાદના ડો. વિશાલ જોશી, એમએનઆઈટી જયપુરના ડો. શ્રીનિવાસ રાવ નેલામર્રી તેમજ ઇસરો તિરુવનંતપુરમના સ્પેસ ફિઝિક્સ લેબોરેટરીના વૈજ્ઞાનિક ડો. આર. સતીશ થમ્પી પોતાના સંશોધન અનુભવો શેર કરશે.
ઉલ્લેખનીય છે કે વર્ષ ૨૦૨૦ની ‘ભૌતિકી યાત્રા’, ૨૦૨૪ની ‘વિજ્ઞાન યાત્રા ૧.૦’ અને ૨૦૨૫ની ‘વિજ્ઞાન યાત્રા ૨.૦’ની અભૂતપૂર્વ સફળતા બાદ આ શ્રેણીનો ચોથો તબક્કો યોજાઈ રહ્યો છે. સ્વદેશી વિચારધારા સાથે કાર્યરત વિજ્ઞાન ભારતી અને વિજ્ઞાન ગુર્જરી દ્વારા ભારતીય ભાષાઓમાં વિજ્ઞાન પ્રસાર અને વિદ્યાર્થીઓમાં વૈજ્ઞાનિક અભિગમ કેળવવાના ઉમદા હેતુથી આ સેવાયજ્ઞ અવિરત ચલાવવામાં આવી રહ્યો છે.