સર્વેશ્વર ચોક કા રાજા : દુંદાળા દેવની સન્મુખ દીકરીઓએ તલવાર રાસ કરી શૌર્યનું પ્રદર્શન કર્યું

સર્વેશ્વર ચોક કા રાજાના દરબારમાં ભક્તિ, શ્રદ્ધા અને શૌર્યનો સંગમ

રાજકોટના રાજવી પરિવારના યુવરાજ જયદિપસિંહજી સહિત મહાનુભાવોએ મહાઆરતીનો લાભ લીધો

રવિવારે બ્લડ ડોનેશન કેમ્પમાં મોટી સંખ્યામાં રક્તદાતાઓ જોડાયા, આજે પણ રક્તદાન કેમ્પ યોજાશે

રાજકોટ શહેરના યાજ્ઞિક રોડ પર આવેલા સર્વેશ્વર ચોક ખાતે સર્વેશ્વર ચોક ચેરિટેબલ ટ્રસ્ટ દ્વારા આયોજિત ‘સર્વેશ્વર ચોક કા રાજા’ ગણેશ મહોત્સવમાં ભક્તિ, શ્રદ્ધા, સેવા અને શૌર્યનો અનોખો સંગમ જોવા મળી રહ્યો છે. ગણપતિ દાદાના દર્શન અને મહાઆરતીનો લાભ લેવા માટે શહેરના વિવિધ ક્ષેત્રના મહાનુભાવો, સામાજિક આગેવાનો તથા મોટી સંખ્યામાં ભાવિકો ઉમટી રહ્યા છે. ઉત્સવ દરમિયાન ધાર્મિક કાર્યક્રમોની સાથે સેવાકીય પ્રવૃત્તિઓને પણ પ્રાધાન્ય આપવામાં આવી રહ્યું છે.

સર્વેશ્વર ચોક કા રાજા ગજાનન ગણપતિ દાદાના પાવન સાનિધ્યમાં શનિવારે યોજાયેલી મહાઆરતીમાં રાજકોટના રાજવી પરિવારના યુવરાજ જયદિપસિંહજીએ પોતાના મિત્રવર્તુળ સાથે હાજરી આપી હતી. યુવરાજે ગણપતિ દાદાની આરાધના કરી આશીર્વાદ મેળવ્યા હતા. આ પ્રસંગે ભક્તિમય વાતાવરણ વચ્ચે મહાઆરતીમાં સહભાગી બની ભાવિકોએ ધન્યતા અનુભવી હતી. આ ઉપરાંત કાશ્મીરાબેન નથવાણી અને બીનાબેન આચાર્યએ પણ મહાઆરતીમાં હાજરી આપી હતી. બંનેએ ગણપતિ દાદાના દર્શન કરી આશીર્વાદ મેળવ્યા હતા. મહોત્સવમાં ઉપસ્થિત મહાનુભાવોના આગમનથી આયોજકો અને ભાવિકોમાં ઉત્સાહનો માહોલ જોવા મળ્યો હતો.

ગણેશ મહોત્સવને માત્ર ધાર્મિક ઉજવણી પૂરતો મર્યાદિત ન રાખી સમાજસેવા સાથે જોડવાના ઉદ્દેશથી રવિવારે બ્લડ ડોનેશન કેમ્પનું આયોજન કરવામાં આવ્યું હતું. આ રક્તદાન કેમ્પમાં મોટી સંખ્યામાં રક્તદાતાઓએ ઉત્સાહપૂર્વક ભાગ લીધો હતો. રક્તદાન દ્વારા જરૂરિયાતમંદ દર્દીઓ માટે મદદરૂપ થવાનો સંદેશ આપવામાં આવ્યો હતો. સર્વેશ્વર ચોક ચેરિટેબલ ટ્રસ્ટ દ્વારા યોજાયેલા આ સેવાકીય આયોજનમાં રક્તદાતાઓએ સહભાગી બની માનવસેવાના કાર્યમાં યોગદાન આપ્યું હતું. ગણપતિ મહોત્સવ દરમિયાન ધાર્મિક ભાવનાની સાથે સામાજિક જવાબદારીનું મહત્વ ઉજાગર થાય તે દિશામાં આ પ્રકારના કાર્યક્રમોનું આયોજન કરવામાં આવી રહ્યું છે. આજે સોમવારે પણ બ્લડ ડોનેશન કેમ્પ યોજાશે, જેથી રક્તદાન કરવા ઇચ્છુક નાગરિકોને ફરી એક તક મળી રહે. આયોજકો દ્વારા રક્તદાન માટે વધુમાં વધુ લોકો જોડાય તેવી અપીલ કરવામાં આવી છે.

રવિવારે સર્વેશ્વર ચોક કા રાજા ગણપતિ દાદાની મહાઆરતીનો લાભ મહેશભાઈ રાજપૂત અને તેમના પરિવારે લીધો હતો. પરિવાર સાથે ગણપતિ દાદાના દર્શન કરી મહાઆરતીમાં સહભાગી બન્યા હતા. આ પ્રસંગે ધાર્મિક આસ્થા અને ભક્તિભાવ સાથે ગણેશજીની આરાધના કરવામાં આવી હતી. સર્વેશ્વર ચોક ખાતે યોજાઈ રહેલા ગણેશ મહોત્સવમાં રાજકોટ શહેરના પોલીસ કમિશનર બ્રજેશ ઝા, પીસીબીના પીઆઈ ગોંડલીયા તેમજ ગુજરાત રાજ્યના પૂર્વ મુખ્યમંત્રી સ્વ. વિજયભાઈ રૂપાણીના પુત્ર ઋષભભાઈ રૂપાણીએ પણ હાજરી આપી હતી. આ મહાનુભાવોએ સર્વેશ્વર ચોક કા રાજા ગજાનન ગણપતિ દાદાના દર્શન કરી આશીર્વાદ મેળવ્યા હતા. ગણપતિ દાદાના પાવન સાનિધ્યમાં ઉપસ્થિત રહી મહાઆરતી અને ધાર્મિક માહોલનો લાભ લીધો હતો. મહોત્સવમાં વિવિધ ક્ષેત્રના મહાનુભાવોની હાજરીથી આયોજકો અને ભક્તોમાં ઉત્સાહ વધ્યો હતો.

સર્વેશ્વર ચોક કા રાજા ગણપતિ મહોત્સવમાં ધાર્મિક ભક્તિ સાથે ગુજરાતી પરંપરા અને શૌર્યની ઝલક પણ જોવા મળી હતી. રાજકોટના શ્રીશક્તિ તલવારબાજી ગ્રૂપની દીકરીઓએ ગણપતિ દાદાની સન્મુખ તલવાર રાસ રજૂ કર્યો હતો. તલવાર રાસ દરમિયાન દીકરીઓએ પોતાની કળા, તાલમેલ અને શૌર્યનું પ્રદર્શન કર્યું હતું. પરંપરાગત તલવારબાજીની કળા દ્વારા તેમણે દુંદાળા દેવની આરાધના કરી હતી. આ રજૂઆતથી ઉપસ્થિત ભાવિકોમાં ઉત્સાહ જોવા મળ્યો હતો અને દીકરીઓએ પોતાની શક્તિ તથા કૌશલ્યનો પરિચય આપ્યો હતો.

સર્વેશ્વર ચોક કા રાજા ગણેશ મહોત્સવમાં મહાઆરતી, મહાનુભાવોના દર્શન, રક્તદાન કેમ્પ અને તલવાર રાસ જેવા વિવિધ આયોજનો દ્વારા ધાર્મિક ઉત્સવને સામાજિક જોડાણ સાથે ઉજવવામાં આવી રહ્યો છે. એક તરફ ભક્તો ગણપતિ દાદાના દર્શન અને આશીર્વાદ મેળવી રહ્યા છે, તો બીજી તરફ રક્તદાન જેવી સેવાકીય પ્રવૃત્તિઓમાં સહભાગી બની માનવસેવાનો સંદેશ આપી રહ્યા છે. આ રીતે સર્વેશ્વર ચોક ખાતે ગણેશ મહોત્સવમાં ભક્તિ, શ્રદ્ધા, સેવા અને શૌર્યનો સુમેળ જોવા મળી રહ્યો છે. આજે સોમવારે યોજાનારા બ્લડ ડોનેશન કેમ્પમાં પણ નાગરિકો મોટી સંખ્યામાં જોડાશે.