2થી 6 સપ્ટેમ્બર યોજાનારા લોકમેળાને શીર્ષક આપવા માટે લોકમેળા અમલીકરણ સમિતિ દ્વારા નગરજનોને જાહેર આમંત્રણ
સૂચિત શીર્ષક ટૂંકું, આકર્ષક, શિષ્ટ, મનોગમ્ય તથા સૌરાષ્ટ્રની ભાતીગળ સંસ્કૃતિ, રહેણી-કરણી અને લોકજીવનને અનુરૂપ હોવું જરૂરી
- Advertisement -
22 જુલાઈ સુધી ઓનલાઈન ગૂગલ ફોર્મ લિંક અથવા ક્યુઆર કોડ સ્કેન કરીને પોતાની એન્ટ્રી મોકલવાની રહેશે
રાજકોટના સુપ્રસિદ્ધ અને પરંપરાગત જન્માષ્ટમી લોકમેળાની જનતા આતુરતાપૂર્વક રાહ જોતી હોય છે, ત્યારે આ વર્ષના મેળાને લઈને વહીવટી તંત્ર દ્વારા તડામાર તૈયારીઓ શરૂ કરી દેવામાં આવી છે. રાજકોટ લોકમેળા અમલીકરણ સમિતિ દ્વારા રેસકોર્સના મેદાનમાં આગામી તા. ૦૨થી ૦૬ સપ્ટેમ્બર, ૨૦૨૬ દરમિયાન પરંપરાગત લોકમેળાનું ભવ્ય આયોજન કરવામાં આવ્યું છે. આ લોકમેળાને દર વર્ષની જેમ આકર્ષક શીર્ષક આપવાની પરંપરાને અનુસરતા, આ વર્ષે પણ નગરજનો પાસેથી લોકમેળાના નામકરણ માટે આકર્ષક શીર્ષકો મંગાવવામાં આવ્યા છે. લોકમેળાના નામ તરીકે પસંદગી પામનાર શ્રેષ્ઠ શીર્ષકના વિજેતા સ્પર્ધકને લોકમેળા સમિતિ તરફથી યોગ્ય પુરસ્કાર આપીને નવાજવામાં આવશે.
- Advertisement -
લોકમેળાના નામકરણની આ સ્પર્ધામાં ભાગ લેવા માટે સમિતિ દ્વારા ચોક્કસ નિયમો અને માર્ગદર્શિકા જાહેર કરવામાં આવી છે. જે મુજબ, નગરજનોએ સૂચવેલું શીર્ષક ટૂંકું, આકર્ષક, શિષ્ટ, મનોગમ્ય તથા સૌરાષ્ટ્રની ભાતીગળ સંસ્કૃતિ, રહેણી-કરણી અને લોકજીવનને અનુરૂપ હોવું જોઈએ. આ સ્પર્ધામાં દરેક સ્પર્ધક માત્ર એક જ શીર્ષક સૂચવી શકશે. સ્પર્ધામાં ભાગ લેવા માટે નગરજનોએ આગામી તા. ૨૨ જુલાઈ, ૨૦૨૬ના રોજ રાત્રે ૨૩.૫૯ કલાક સુધીમાં ઓનલાઈન ગૂગલ ફોર્મ લિંક અથવા આપેલ ક્યુઆર કોડ સ્કેન કરીને પોતાની એન્ટ્રી મોકલવાની રહેશે. તા. ૨૨ જુલાઈની નિર્ધારિત સમય મર્યાદા બાદ આવેલી કોઈ પણ એન્ટ્રીને પસંદગી માટે ધ્યાને લેવામાં આવશે નહીં.
આ નામકરણ સ્પર્ધા માટેની ઓફિશિયલ ગૂગલ ફોર્મ લિંક (https://forms.gle/baqQAMDrrHhsN2p6A) પ્રાદેશિક માહિતી કચેરી – રાજકોટના અધિકૃત ફેસબુક પેજ ‘Info Rajkot GoG’, ઈન્સ્ટાગ્રામ એકાઉન્ટ ‘inforajkotgog’ તેમજ એક્સ એકાઉન્ટ ‘Info Rajkot GoG’ પરથી પણ મેળવી શકાશે. ગૂગલ ફોર્મ સબમિટ કરતી વખતે લોકમેળાના ફક્ત એક શીર્ષકની સાથે સ્પર્ધકે પોતાનું પૂરું નામ, સરનામું અને મોબાઈલ નંબર ખાસ લખવાના રહેશે. નગરજનો તરફથી પ્રાપ્ત થયેલી વિવિધ એન્ટ્રીઓમાંથી લોકમેળા સમિતિ દ્વારા આખરી શીર્ષકની પસંદગી કરવામાં આવશે. આ નામની પસંદગી બાબતે લોકમેળા સમિતિનો નિર્ણય આખરી અને સર્વોપરી ગણાશે તેમ સત્તાવાર યાદીમાં જણાવાયું છે.
