SRHના ત્રણ બેટર્સની તોફાની ફિફ્ટી સાથે 255 રન; IPL 2026ની ટોપ-2 ટીમો ક્વોલિફાયર-1 માટે ક્ધફર્મ
ખાસ-ખબર ન્યૂઝ નવી દિલ્હી
- Advertisement -
IPL 2026માં શુક્રવારે રમાયેલી રોમાંચક મેચમાં સનરાઇઝર્સ હૈદરાબાદ (SRH)એ રોયલ ચેલેન્જર્સ બેંગલુરુ (RCB)ને 55 રનથી પરાજય આપ્યો છે. હૈદરાબાદના રાજીવ ગાંધી ઇન્ટરનેશનલ સ્ટેડિયમમાં હોમ ટીમે ટોસ જીતીને પ્રથમ બેટિંગ કરતા 20 ઓવરમાં 4 વિકેટ ગુમાવીને 255 રનનો વિશાળ સ્કોર ખડક્યો હતો. જેના જવાબમાં બેંગલુરુની ટીમ 20 ઓવરમાં 4 વિકેટ ગુમાવીને 200 રન જ બનાવી શકી હતી. આ હાર છતાં બેંગલુરુ પોઇન્ટ્સ ટેબલમાં પહેલા નંબર પર યથાવત રહી છે, જ્યારે ગુજરાતની ટીમ બીજા ક્રમે છે. આ જીત બાદ પણ હૈદરાબાદ ત્રીજા નંબર પર રહ્યું છે. આ મેચ સાથે જ સીઝનની ટોપ-2 ટીમો ક્ધફર્મ થઈ ગઈ છે અને આગામી મંગળવારે ક્વોલિફાયર-1માં બેંગલુરુ અને ગુજરાત વચ્ચે ટક્કર થશે.
256 રનના વિશાળ ટાર્ગેટનો પીછો કરવા ઉતરેલી બેંગલુરુની ટીમ તરફથી વેંકટેશ અય્યરે 19 બોલમાં 44 રનની ઇનિંગ રમી હતી, જ્યારે કેપ્ટન રજત પાટીદારે 56 રનની લડાયક ઇનિંગ રમી હતી, પરંતુ તેઓ ટીમને જીત અપાવી શક્યા નહોતા. સનરાઇઝર્સ હૈદરાબાદ માટે બોલિંગમાં ઇશાન મલિંગા સૌથી સફળ રહ્યો હતો, જેણે 2 વિકેટ ઝડપી હતી, જ્યારે સાકિબ હુસૈન અને ટ્રેવિસ હેડને 1-1 વિકેટ મળી હતી.
પ્રથમ બેટિંગ કરવા ઉતરેલી હૈદરાબાદની ટીમને ઓપનર અભિષેક શર્માએ તોફાની શરૂઆત અપાવી હતી, જેણે માત્ર 22 બોલમાં 56 રન ફટકાર્યા હતા.
ત્યારબાદ ઈશાન કિશને શાનદાર બેટિંગ કરતા 46 બોલમાં 79 રનની ઇનિંગ રમીને સ્કોર આગળ ધપાવ્યો હતો. મિડલ ઓર્ડરમાં હેનરિક ક્લાસેને પણ આક્રમક અંદાજમાં 24 બોલમાં 51 રનનું યોગદાન આપ્યું હતું. અંતિમ ઓવરોમાં નીતિશ કુમાર રેડ્ડીએ 12 બોલમાં અણનમ 29 રન જોડીને ટીમના સ્કોરને 250 રનની પાર પહોંચાડ્યો હતો. બેંગલુરુના બોલરો હૈદરાબાદના બેટર્સ સામે સંપૂર્ણપણે સંઘર્ષ કરતા જોવા મળ્યા હતા, જેમાં રાસિખ સલામે 2 વિકેટ ઝડપી હતી, જ્યારે સુયશ શર્મા અને કૃણાલ પંડ્યાને 1-1 સફળતા મળી હતી.
કોહલી-હેડ વચ્ચે બોલાચાલી, મેચ પછી હાથ ન મિલાવ્યા
બેંગલુરુની ઇનિંગ્સમાં પાવરપ્લે દરમિયાન કોહલી અને ટ્રેવિસ હેડ વચ્ચે કોઈ વાતને લઈને બોલાચાલી થઈ. આ પછી કોહલીએ મેચ પછી હેડ સાથે હેન્ડશેક પણ ન કર્યો. જ્યારે કોહલી, હેડ પાસે પહોંચ્યા, ત્યારે હેડે હાથ લંબાવ્યો, પરંતુ કોહલી તરત જ આગળ નીકળી ગયા.
