5 વર્ષમાં સરકારી વાહનોમાં 847 કરોડનું પેટ્રોલ-ડીઝલ વાપર્યું!
2026-27ના બજેટમાં રૂપિયા 165 કરોડની ફાળવણી કરાઇ છે
- Advertisement -
ખાસ-ખબર ન્યૂઝ ગાંધીનગર
એક તરફ રાજ્ય સરકાર દ્વારા નાગરિકોને પેટ્રોલ-ડીઝલના ઓછા ઉપયોગ અને જાહેર પરિવહન અપનાવવાની સતત અપીલ કરવામાં આવી રહી છે, ત્યારે બીજી તરફ સરકારના પોતાના વિભાગોમાં જ ઈંધણ ખર્ચના ચોંકાવનારા આંકડાઓ સામે આવ્યા છે. છેલ્લા પાંચ વર્ષ દરમિયાન ગુજરાત સરકારના 12 વિભાગોએ સરકારી વાહનો માટે કુલ 847 કરોડ રૂપિયા જેટલો પેટ્રોલ-ડીઝલ ખર્ચ કર્યો હોવાનું બજેટ દસ્તાવેજોમાંથી સામે આવ્યું છે. આ આંકડા મુજબ સરકારી વાહનો માટે દર મહિને સરેરાશ 14.12 કરોડ રૂપિયા અને દરરોજ અંદાજે 47 લાખ રૂપિયાનું ઈંધણ વપરાયું છે. સરકારના ગૃહ, શિક્ષણ, આરોગ્ય સહિતના મહત્વના વિભાગોમાં અધિકારીઓ અને કચેરીઓ દ્વારા ઉપયોગમાં લેવાતા સરકારી વાહનોના ખર્ચનો સમાવેશ થાય છે. વર્ષવાર આંકડાઓ પર નજર કરીએ તો 2025-26 દરમિયાન સરકારના વિવિધ વિભાગોએ સરકારી વાહનો માટે અંદાજે 181 કરોડ રૂપિયાનું ઈંધણ વાપર્યું હતું. તે પહેલાં 2024-25માં 165 કરોડ, 2023-24માં 155 કરોડ અને 2022-23માં 182 કરોડ રૂપિયા પેટ્રોલ-ડીઝલ પાછળ ખર્ચાયા હતા. આ સતત વધી રહેલા ખર્ચે સરકારની મિતવ્યયી નીતિ અને જાહેર સંદેશાઓ સામે પ્રશ્નો ઊભા કર્યા છે. રાજ્ય સરકાર દ્વારા બજેટમાં સરકારી વાહનો માટે 165 કરોડ રૂપિયાનું ફાળવણી કરવામાં આવી હોવા છતાં વાસ્તવિક ખર્ચ ઘણા કિસ્સાઓમાં વધુ નોંધાયો હોવાનું પણ સ્પષ્ટ થાય છે. સરકારી કચેરીઓમાં વાહનોના વધતા ઉપયોગ, અધિકારીઓની મુસાફરી અને પ્રશાસનિક કામગીરીના નામે વધી રહેલા ઈંધણ ખર્ચ અંગે હવે પારદર્શિતા અને નિયંત્રણની માંગ ઉઠી રહી છે. જ્યારે સામાન્ય નાગરિકોને ઈંધણ બચત અને પર્યાવરણને ધ્યાનમાં રાખીને જાહેર પરિવહનનો ઉપયોગ કરવાની સલાહ આપવામાં આવે છે, ત્યારે સરકારના વિભાગોમાં જ આટલો મોટો ઈંધણ ખર્ચ થવો વિસંગત સ્થિતિ ઊભી કરે છે. પર્યાવરણપ્રેમી સંગઠનોનું કહેવું છે કે સરકાર ઇલેક્ટ્રિક વાહનોનો ઉપયોગ વધારવા, વાહનોના સંકલિત ઉપયોગની નીતિ બનાવવાની અને વિભાગવાર ઈંધણ ઓડિટ કરવાની દિશામાં પગલાં ભરે તો ખર્ચમાં ઘટાડો શક્ય બની શકે.
મંત્રીથી લઇ અધિકારીઓને 15 પ્રકારની કાર અપાય છે
મંત્રીઓ, મુખ્ય સચિવ, બંધારણીય સંસ્થા-બોર્ડ-કોર્પોરેશન-કમિશનના ચેરમેન-સભ્ય, અધિક મુખ્ય સચિવ, અગ્ર સચિવ, બોર્ડ કોર્પોરેશનના એમડી, સીઈઓ અને સચિવ કક્ષાના વડાને 7 સીટર ટોયોટા ઈનોવા, હ્યુડાઈની એલાન્ટ્રા ગાડી અપાય છે. કલેક્ટર, એસપી, ડીડીઓ, જિલ્લા જજને પણ ઈનોવા, ટાટા સફારી ફાળવાય છે. આ ઉપરાંત અન્ય અધિકારીઓને પણ સિઆઝ, ક્રેટા, મહિન્દ્રા એક્સયુવી, બોલેરો, મારુતિ એક્સએલ-6, અર્ટિગા, ડિઝાયર, ટાટા ટિગોર ફાળવવામાં આવે છે.
- Advertisement -
2022-23થી 2026
સુધીમાં 94% ખર્ચ માત્ર
ગૃહ વિભાગમાં કરાયો
વિભાગ ઇંધણ ખર્ચ
ગૃહ 802.45 કરોડ
ઉદ્યોગ-ખાણ 30.59 કરોડ
શિક્ષણ 5.19 કરોડ
આરોગ્ય-પરિવાર 2.87 કરોડ
જીએડી 1.22 કરોડ
બંદર-પરિવહન 1.13 કરોડ
આદિજાતિ 1.08 કરોડ
કૃષિ-સહકાર 77 લાખ
માર્ગ-મકાન 74 લાખ
મહિલા-બાળ વિકાસ 58 લાખ
