પાર્કિંગ પોલીસી બનાવી પ્રજા ઉપર બોજો નાખવાનો કારસો રચતું ભાજપ – ભાનુબેન સોરાણી

પ્રજાને બરબાદ કરવાનો ભાજપ સરકારનો નવો ખેલ: નાના અને મધ્યમવર્ગીય પરિવારોને તોતિંગ ચાર્જીસ ક્યાંથી પરવડે – વિપક્ષીનેતા

પેટ્રોલ-ડીઝલના ભાવ વધારા બાદ ભાજપે પાર્કિંગ ચાર્જ પોલીસી કરી પ્રજાની સ્થિતિ કફોળી કરી – ભાનુબેન

હવા શુધ્ધ કરવાના અભ્યાસ પાછળ મ.ન.પા. ભાજપના મળતિયાઓને રૂ.૭૭ લાખ ચૂકવશે.

પે એન્ડ પાર્કના નામે લુંટ ચલાવ્યા બાદ ભાજપને પ્રજાના ખિસ્સામાંથી પૈસા કઢાવવા નવો કારસો રચ્યો

મલ્ટી લેવલ પાર્કિંગની વાતો કરનારા ભાજપના શાસકો હવે પાર્કિંગ ચાર્જીસ વસુલશે

વોર્ડ નં.૧૫ માં રામપાર્ક-મૂકેશ પાર્કમાં મેટલીંગ રોડ કરવામાં ભાજપનું રાજકારણ ખુલ્લું પડી ગયું : અગાઉ પાંચ વર્ષ પહેલા કોંગ્રેસના કોર્પોરેટરોએ કામ મુક્યું હતું ત્યારે અધિકારીઓએ ક્વેરી કાઢી હતી અને આજે બિલ્ડર પાસેથી આર્થિક હિત સાચવી કરોડોની જમીન હડપ કરવાનો ભાજપનો ખેલ ખુલ્લો પડ્યો.

રાજકોટ મહાનગરપાલિકાના વિરોધપક્ષના નેતા શ્રીમતી ભાનુબેન સોરાણીએ જણાવ્યું છે કે આજે મળનાર સ્ટેન્ડિંગ કમિટીની બેઠકમાં ભાજપ દ્વારા જે દરખાસ્તો મંજુર કરવામાં આવેલ છે તે દરખાસ્તનો અભ્યાસ કરતા માલુમ પડે છે કે રાજકોટ મહાનગરપાલિકા એ રાજકોટ શહેર માટેની પાર્કિંગ પોલીસી તથા પાર્કિંગ બાય-લોઝ મંજુર કરવા માટે સ્થાયી સમિતિએ દરખાસ્ત મંજુર કરી પ્રજા ઉપર અસહ્ય પાર્કિંગ ચાર્જીસનો બોજો નાખી પ્રજાની હાલત કફોડી કરી છે ત્યારે શ્રીમતી ભાનુબેન સોરાણીએ જણાવ્યું છે કે રાજકોટ મહાનગરપાલિકા ૧૯૯૮ થી આજ દિવસ સુધીમાં એક પણ T.P. સ્કીમ ૧૦૦% અમલીકરણ કરવામાં નિષ્ફળ નીવડી છે તેમજ રાજકોટ શહેરની બીજી કોઈપણ T.P. સ્કીમમાં ૧૦૦% અમલીકરણ કરવાનું કામ છેલ્લા ૨૦ વર્ષથી હાથ ધરવામાં આવેલ નથી તેમજ શહેરમાં મંજુર થયેલ T.P.સ્કીમોના પ્લોટોમાં દબાણ થયા છે તે દુર કરવાનું કામ પણ મહાનગરપાલિકાના T.P. વિભાગનું જ હોય તે કરી શકી નથી જયારે રાજકોટ શહેરના સેન્ટ્રલ ઝોનમાં કે જ્યાં વધુ ટ્રાફિક અને ભીડભાડ વાળા વિસ્તારમાં પાર્કિંગ ની અતિ જરૂર જણાતી હોય અને ટ્રાફિકનું સુવ્યવસ્થા માટે રાજકોટ મહાનગરપાલિકા પાસે ૫૦૦ ચો.મીટર કરતા વધુ જગ્યા અને સુવિધા ધરાવતો એક પણ પાર્કિંગ પ્લોટ નથી તેમજ ધર્મેન્દ્ર રોડ, લાખાજીરાજ રોડ, કોટક શેરી, કડિયા નવ લાઈન, ગરેડીયા કુવા રોડ, સોની બજાર, પેલેસ રોડ, કરણસિંહજી મેઈન રોડ, સહિતના રાજકોટ શહેરના ગીચ વિસ્તારમાં પાર્કિંગ સુવિધા આપવામાં મનપાનું નીંભર તંત્ર કુંભકર્ણની ગાઢ નિંદ્રાધીન સુતું ફરી ઝડપાયું છે જે રાજ્ય સરકારના શહેરી વિકાસ અને શહેરી ગૃહ નિર્માણ વિભાગે તા.૧૬/૦૨/૨૦૨૧ના રોજ પત્ર મોકલ્યા બાદ કામગીરી કરવાની શરુ કરેલ હતી.

રાજકોટ મહાનગરપાલિકાએ જે પાર્કિંગ પોલીસી બનાવી છે તે બાબતે ભાનુબેને વધુમાં જણાવ્યું છે કે રાજકોટ શહેરના વાહન પાર્કિંગ ચાર્જીસ પ્રજાના ખિસ્સાના પરસેવાની કમાણી માંથી વસુલવા માટે જે પોલીસી બનાવી છે તે બાબતે અમારો સખ્ત વિરોધ છે અને પ્રજા પર ભાજપે પેટ્રોલ-ડીઝલના ભાવ વધારો તેમજ PNG-CNGના ભાવમાં વધારો ઝીંકી પ્રજાને હેરાન-પરેશાન કરવામાં પાછીપાની કરી નથી તેવામાં પ્રજા પર આ પાર્કિંગ ચાર્જીસનો બોજો નાખી પ્રજાની હાલત કફોળી બનાવી છે

રાજકોટ શહેરમાં ટુ વ્હીલર માટેના રસ્તા ઉપર અને શેરી-ગલીના ૦ થી ૩ કલાકના રૂ.૫ વસુલશે, ૩ થી ૬ કલાકના રૂ.૧૦ વસુલશે, ૬ થી ૯ કલાકના રૂ.૧૫ વસુલશે, ૯ થી ૧૨ કલાકના રૂ.૨૦ વસુલશે અને ૧૨ થી ૨૪ કલાકના રૂ.૨૫ વસુલવા માટેની પોલીસી ઘડી છે જયારે રાજકોટ શહેરમાં પે એન્ડ પાર્કિંગના નામે ઉધાડી લુંટ ચાલી રહી છે એટલામાં આ પાર્કિંગ પોલીસી ઘડી ભાજપે પ્રજા ના ખિસ્સા ખંખેરવા કારસો કર્યો છે.

જયારે રાજકોટ મહાનગરપાલિકા છેલ્લા ૪ વર્ષથી એક મલ્ટીલેવલ પાર્કિંગ હજુ સુધી બનાવી શકી નથી ત્યારે નવી પાર્કિંગ પોલીસી બનાવી શું કરવા માંગે છે ? અને પ્રજાને દર વર્ષે બજેટમાં નવા નવા સપનાઓ બતાવી એક ને એક યોજના રીપીટ કરી છે અને બજેટ માં લીધેલા કામો માંથી ફક્ત ૨૦% જેટલા કામો જ થયા હોવાનું અખબારો પણ જણાવે છે.

પ્રજા હજુ કોરોના મહામારીના સકંજામાંથી નીકળી રહી છે અને આર્થિક ફટકા ના ઘા બુજાવી રહી છે ત્યાં આ પાર્કિંગ પોલીસી નાખી પ્રજાને બેહાલ કરવાનું ભાજપ સરકારે કૃત્ય કર્યું છે.

પાર્કિંગ પોલીસીનો નાના અને મધ્યમવર્ગીય પરિવારો ને શું આ ભાવ પોસાય તેમ છે ? સામાન્ય માણસને પરવડે તેવો ચાર્જીસ રાખાવમાં આવ્યો છે ? જયારે નવું વાહન ખરીદવામાં આવે ત્યારે જે RTO ટેક્સ ભરવામાં આવે તેના કરતા પણ વધારે પાર્કિંગ ચાર્જ છે એ શું જાણી–જોઈ ને બનાવ્યો ? પ્રજાને અંધારા માં રાખી આ પોલીસી ઘડાઈ રહી છે ત્યારે વિરોધપક્ષને સાથે કેમ ન રાખ્યો ? વર્ષ ૨૦૧૪ માં એક વખત ઠરાવ થઇ ગયા બાદ આજે ૨૦૧૮ પછી ૨૦૨૧ માં શા માટે આટલો તોતિંગ ચાર્જ એડ કરવાની જરૂર પડી ? અને બેંક લોનના હપ્તા, મોંઘવારી, બેરોજગારી, જેવા અનેક પ્રશ્નોથી નાના અને મધ્યમવર્ગીય પરિવારો સંઘર્ષ કરી રહ્યા છે ત્યારે આ પાર્કિંગ પોલીસી રચી ભાજપ પ્રજાને બરબાદ કરવા સિવાય કશું રાખ્યું નથી.

વિપક્ષીનેતા ભાનુબેન સોરાણીએ વોર્ડ નં.૧૫માં મૂકેશ પાર્ક – રામપાર્ક ના મેટલીંગ રોડ બનાવવા અંગે જણાવ્યું છે કે અગાઉ પાંચ વર્ષ પહેલા કોંગ્રેસે આ વિસ્તારોમાં મેટલીંગ રોડ અને વિકાસ કામો કરવા માટે રજુઆતો કરેલ હતી ત્યારે મનપાના જવાબદાર અધિકારીઓએ અલગ અલગ બહાના બતાવી કામ ટલ્લે ચડાવ્યું હતું અને ક્વેરી કાઢેલી હતી કે આ ઇન્ડસ્ટ્રીઅલ એરિયા છે જે એરિયામાં કોર્પોરેશન ગ્રાન્ટ ન ફાળવે તેમજ જ્યાં સુધી સાર્વજનિક પ્લોટ મનપાને ન સોંપે ત્યાં સુધી રાજકોટ મહાનગરપાલિકા વિકાસ કામ હાથ ધરી શકે નહી અને ગ્રાન્ટ ન હોવાના બહાના કાઢ્યા હતા ત્યારે બિલ્ડરના મળતિયા અને અંગત આર્થિકહિત સાચવનારા ભાજપના શાસકો એ પોતાના ઈશારે જ આ કામ થવા દીધું નથી અને કરોડો રૂપિયાની કિંમતી જમીન પચાવી જવા આ કામ કર્યું છે. તેવું ભાનુબેન સોરાણીએ યાદીના અંતમાં જણાવ્યું છે.