બે જુથ વચ્ચે છરી-ધોકા-પાઈપથી મારકૂટ : છને ઇજા
તાલુકા પોલીસે 17 શખ્સો વિરુદ્ધ ફરિયાદ નોંધી છની કરી ધરપકડ
ખાસ-ખબર ન્યૂઝ રાજકોટ
ગોંડલના ભુણાવા ગામે બે જૂથ વચ્ચે સશસ્ત્ર ધીંગાણું થતાં સાત લોકો ગંભીર રીતે ઇજાગ્રસ્ત થયાં હતાં જે મામલે 17 શખ્સો સામે ગોંડલ તાલુકા પોલીસ મથકમાં હત્યાના પ્રયાસની કલમ હેઠળ ગુનો નોંધાયો હતો. ગોંડલના ભુણાવા ગામે દરબારગઢમાં રહેતાં વિજયસિંહ બચુભા જાડેજા ઉ.47એ તેના જ ગામના સિદ્ધરાજસિંહ નિરૂભા જાડેજા, નરેન્દ્રસિંહ નિરૂભા જાડેજા, ભરતસિંહ બચુભા જાડેજા, રુદ્રરાજસિંહ સંજયસિંહ જાડેજા, લક્કીરાજસિંહ જગુભા જાડેજા, યશપાલસિંહ સિદ્ધરાજસિંહ જાડેજા, અજયરાજસિંહ નરેન્દ્રસિંહ જાડેજા અને મંગા ચાવડા સામે તાલુકા પોલીસમાં નોંધાવેલી ફરિયાદમાં જણાવ્યું હતું કે, તે ખેતીકામ સાથે વેપાર પણ કરે છે આરોપીઓ સાથે અગાઉ ધંધાકીય બાબતે થયેલી માથાકૂટ અંગે પોલીસ ફરિયાદ પણ નોંધાઈ હતી બાદમાં ફરિયાદી ભુણાવા ગામમાં આવેલ શિવ પ્રોવિઝન સ્ટોર નજીક હતાં ત્યારે આરોપીઓએ જૂની અદાવતનો ખાર રાખી ગેરકાયદેસર મંડળી રચી, પોતાનો બદઈરાદો પાર પાડવા લાકડી, પાઈપ જેવા હથિયારો સાથે ત્રાટકી જીવલેણ હુમલો કર્યો હતો ફરિયાદીને સિદ્ધરાજસિંહ જાડેજાએ માથાના ભાગે લાકડાનો ધોકો મારી દેતાં તેઓ બેભાન થઈ ઢળી પડ્યા હતાં તેમજ તેમની સાથે રહેલા અન્ય તેમના ભાઈઓ તેમને બચાવવા વચ્ચે પડતાં તેમને પણ બેફામ માર માર્યો હતો.
- Advertisement -
જેમાં કૃષ્ણપાલસિંહ જાડેજા, ઓમદેવસિંહ જાડેજા અને ભગિરથસિંહ ઉર્ફે ભગી જાડેજાને પણ માથાના ભાગે અને શરીરે ગંભીર ઇજા પહોંચાડી મારી નાંખવાની ધમકી આપી આરોપી નાસી છૂટ્યા હતાં.
જ્યારે સામાપક્ષે ભુણાવા ગામમાં રહેતાં યશપાલસિંહ સિદ્ધરાજસિંહ જાડેજા ઉ.25એ રાજેન્દ્રસિંહ જાડેજા, વિજયસિંહ જાડેજા, ભગિરથસિંહ જાડેજા, હરપાલસિંહ જાડેજા, ઓમદેવસિંહ જાડેજા, મયુરસિંહ જાડેજા, કૃષ્ણપાલસિંહ જાડેજા અને અજાણ્યા બે શખ્સો સામે નોંધાવેલી ફરિયાદમાં જણાવ્યું હતું કે, તે ખેતી કામ કરે છે ફરિયાદીને આરોપી રાજેન્દ્રસિંહે માથાના ભાગે પાઈપનો ઘા ઝીંકી દેતાં તેઓ લોહીલુહાણ થઈ ગયાં હતાં.
તેમજ તેને બચાવવા આવેલ નરેન્દ્રસિંહ જાડેજા સહિતના તેઓના ભાઈઓને પણ છરી-લાકડાના ઘા ઝીકિ જાનથી મારી નાખવાની ધમકી આપી નાસી છૂટ્યા હતાં.
બનાવમાં ગંભીર રીતે ઘવાયેલા લોકોને સારવાર અર્થે હોસ્પિટલમાં ખસેડાયા હતાં બનાવ અંગે સામસામી ફરિયાદ પરથી ગોંડલ તાલુકા પોલીસ મથકના પીએસઆઈ આર આર સોલંકી અને ટીમે 17 શખ્સો સામે હત્યાના પ્રયાસ સહિતની કલમો હેઠળ ગુનો નોંધી છ આરોપીની ધરપકડ કરી હતી.
